كيف اتخلص من اكتئاب الحمل؟

73

محدش عارف بالظبط أي اللي بيسبب اكتئاب الحمل. لكن الاحتمال الأكبر أن الهرمونات هي السبب، لأنها بتأثر على أجزاء في الدماغ اللي مسئولية عن العواطف والمزاج. كمان ممكن خوف الست مالولادة أو أنها متقدرش تهتم بطفلها أو حتى الوراثة وغيرها من الحاجات.

بغض النظر عن السبب لازم تهتمي بعلاج الاكتئاب، لأن لو سبتيه هيضرك ويضر اللي فبطنك. كمان ممكن يتحول لاكتئاب ما بعد الولادة. لكن الخبر الحلو هو أن في علاجات كتيرة ممكن تساعدك.

اختبار-الاكتئاب-bannerشاكك إن عندك اكتئاب؟ دوس هنا واعمل اختبار الاكتئاب أونلاين

علاج اكتئاب الحمل من غير أدوية

بالنسبة لكتير من الأمهات الحوامل، ممكن تكون العلاجات من غير أدوية كفاية للسيطرة على اكتئابهم، وفأوقات كتيرة الدكاترة بتبدأ بيها. ومنها:

  • العلاج النفسي أو العلاج بالكلام. الجلسات مع الدكتور المعالج سواء كانت فردية أو مع مجموعة من الناس اللي بيمروا بنفس المشكلة، هتساعدهم في حل مشاكلهم والتعود على مشاكل الحياة.
  • مجموعات الدعم. ممكن تسألي دكتورك عن مجموعات الدعم في منطقتك، علشان تقدري تتكلمي مع الحوامل اللي زيك. كمان ممكن تتواصلي معاهم على النت.
  • العلاج بالضوء. دا ببساطة بتستخدمي فيه كشاف ضوئه شديد هيساعدك في زيادة مستويات هرمون السيروتونين اللي بينظم الحالة المزاجية في الدماغ.
  • العلاج بالإبر. الوخز بالإبر طريقة قديمة ممكن تساعد في إطلاق مواد كيميائية تدي الشعور بالسعادة في الدماغ اسمها الإندورفين. كمان المادة دي بتساعد في تحسين مزاجك وتخفيف أعراض الحمل التانية زي غثيان الصباح أو آلام الظهر.

علاج اكتئاب الحمل بمضادات الاكتئاب

لو كانت أعراض اكتئاب الحمل شديدة، فهنا ممكن الدكتور يشوف أنك محتاجة مضادات الاكتئاب. وفي أنواع كتيرة منها:

  • مثبطات امتصاص السيروتونين الانتقائية (SSRIs)، زي فلوكستين وسيرترالين وسيتالوبرام. دي أكتر مضادات الاكتئاب اللي بتتوصف للحوامل.
  • مثبطات امتصاص السيروتونين والنوربينفرين (SNRIs)، زي دولوكستين وفينلافاكسين.
  • البوبروبيون Bupropion، ودا مش أول حاجة بيتفكر فيها، لكن لو كانت الحامل مش بتستجيب للأنوع التانية فبيوصفه الدكاترة.
  • مضادات الاكتئاب ثلاثية الحلقات، زي نورتريبتيلين.

عمومًا مضادات الاكتئاب مش الخيار الصح للكل، ولازم أنتي ودكتورك تقارنوا الفوايد بالأضرار. لسه الأبحاث مبينتش الآثار طويلة المدى لمضادات الاكتئاب في الحمل، لكن أدلة بتقول أن الأطفال حديثي الولادة اللي اتعرضوا لمثبطات استرداد السيروتونين الانتقائية في الرحم، ممكن يعانوا من أعراض انسحاب لفترة قصيرة.

لكن على الرغم من المخاطر دي، ففي ستات لازم تاخدها لأن مخاطر عدم علاج الاكتئاب أكتر عندهم. أما إذا كنتي بتاخدي مضادات الاكتئاب قبل الحمل، فهتحتاجي تتابعي مع دكتورك علشان يشوف هتكملي فيه ولا لأ. كمان ممكن يغيرلك الجرعة أو يديكي نوع تاني. أو يخلي أدويتك زي ما هي خوفًا من الانتكاسة.

في حالات بتحتاج العلاجات اللي مفيهاش أدوية واللي فيها. مهما كان العلاج اللي هتاخديه، المهم أنك تهتمي بنفسك.

نصايح هتساعدك في علاج الاكتئاب

  • استريحي. الإرهاق في الحمل بيزود من تقلبات المزاج اللي ممكن تحسي بيها، علشان كدا لازم تتأكدي من أنك مرتاحة. نامي بدري، أو حتى متأخر المهم في الوقت اللي يريحك.
  • اخرجي شوية. الخروج من وقت للتاني بيقلل من أعراض التوتر والاكتئاب. علشان كدا بننصحك تروحي جنينة أو عالبحر أو حتى تتمشي تحت البيت، المهم خروجة وخلاص.
  • بالراحة في شغل البيت. شغل البيت مش هيطير، مش لازم تطبقي الدولاب من الأول أو تخزني أكل أو غيرها من الحاجات اللي مش ضرورية. ولو في حاجات لازمي تتعمل ممكن تطلبي مساعدة جوزك أو حد من أهلك أو أصحابك.
  • نظام غذائي مظبوط. لازم تاكلي كويس، يعني أكل صحي وابعدي عن الأكل اللي من بره واللي دهونه كتيرة. كمان جاولي تاكلي وجبات خفيفة من وقت للتاني، متسبيش نفسك. علشان الأكل الكويس هيحميكي من تقلبات المزاج. كمان بلاش كافيين وسكر كتير. وزودي مالأكل اللي فيه أحماض أوميغا 3 الدهنية، زي الجوز والسمك والبيض.
  • العبي رياضة. لعب الرياضة بانتظام بيساعد في فرز الدماغ لمادة الإندورفين ودي بتدي إحساس بالسعادة وبتساعد في استقرار الحالة المزاجية. كمان التمارين في الهواء بتعالج الاكتئاب.
  • قضي وقت مع عيلتك وأصحابك. تخصيص وقت للأهل والأصحاب بيساعدك في تحسين مزاجك.
  • ابعدي عن التغييرات الكبيرة في الحياة. التغييرات الكبيرة بتسبب إجهاد للجسم والعقل، يعني مثلًا تغيير البيت متعب جدًا ممكن تأجلي الخطوة دي. لكن لو كان التغيير مفيش مفر منه، فحاولي تجهزي نفسك من قبلها بكتير علشان متضغطيش وكمان اطلبي المساعدة من اللي حواليكي.
  • اتكلمي عن مشاعرك. لو كنتي قلقانة على المستقبل، فاعملي اللي عليكي وسيبي الأمور تمشي زي ما تمشي. كمان لازم تقولي للي حواليكي اللي أنتي حاسة بيه علشان يساعدوكي.

إزاي تمنعي اكتئاب الحمل

أحسن حاجة علشان تحمي نفسك من اكتئاب الحمل، هي الاهتمام وعلاج أي أعراض أولية للاكتئاب. يعني تاخدي بالك كويس من صحتك النفسية خاصة لو كان عندك حاجات تزود فرصة الاكتئاب زي:

  • عندك قبل الحمل علامات أو أعراض الاكتئاب.
  • تاريخ من الاكتئاب أو غيره من حالات الصحة العقلية.
  • الانفصال العاطفي.
  • ضغوط كبيرة زي قلة الفلوس أو مفيش شغل.
  • ضحية للعنف المنزلي.

ومع ذلك، اكتئاب الحمل ممكن يأثر على أي واحدة. لكن الاهتمام بأي تغيير هو الخطوة الأولى في حمايتك.

المراجع:

المصدر

اترك تعليق