كلامك مع ولادك عن الإدمان ممكن ينقذهم من الوقوع فيه

الطفل بمجرد ما يكبر حبة و يوصل لسن المراهقة بيتغير يعنى مش هيفضل بابى سحباه فى أيدك فى كل حته. هيجى يوم و يكبر و يواجه الدنيا لوحده عشان كا لازم نكلم ولادنا عنها زي الإدمان. لأنه كدا كدا هيسألك و المشكلة أنه لو مسألكيش هيسأل بره و الرد مش شرط يكون تربوى. عشان كدا مهم ناخد الخطوة و نكلم ولادنا عن الإدمان بشكل عام و المخدرات بشكل خاص.

أزاى تستعدى للحوار عن الإدمان؟

الخطوة الأولى :

  • اقرأي عن الإدمان ، و أعرفى أنواع المخدرات؟ و تأثيرها على الجسم ، العقل ، السلوك.
  • ثقفى نفسك عشان تقدرى تفهمى الطفل تجاوبى على أسئلته.

الخطوة التانية:

  • تابعى ولادك بس مش بأسلوب المخبر لا بس عاوديه أنه يكلمك عن يومه و كل حاجة بتحصل فيه.
  • أعرفى أصحابه و أهلهم عشان تحاولى تجنبيه صاحب السوء.

الخطوة التالتة:

  • قوى علاقتك بالطفل و بلاش تخليه يخاف يتكلم معاكى بلاش تصديه خلى بابك مفتوح له على طول.
  • المخدرات أنواع كتير و ساعات أعرضها بتتشابه مع أمراض نفسية تانية ذى القلق و الإكتئاب و غيرها.

أيه هى أعراض الإدمان ؟

أعراض إدمان جسدية:

  • فقدان الشهية أو زيادة الشهية أي تغيرات غريبة في عادات الأكل و خسارة او زيادة الوزن من غير سبب.
  • عدم توازن و تلاقيه مش مظبوط و مش عارف هو رايح فين.
  • أرق أوكسل غير مبرر ده غير مواعيد النوم و الصحيان الملخبطة.
  • عنيه حمرا وغريبة و متنح من غير سبب.
  • رعشة أيده و تلاقيهم على طول متلجين.
  • وشه بيكون بهتان و بتجيله حالات ضعف شديدة و مرة واحدة يقلب رغاى ونشاطه زيادة.
  • علامات للحقنة على ذراعه أو منلخيره بايظة على طول حسب نوع المخدر بيتشم و له يتحقن.
  • غثيان وتقيؤ.
  • ضربات قلبه مش منتظمة.

أعراض إدمان سلوكية:

  • بيتقلب حاله فتلاقى تغير فى أسلوبه و شخصيته فجأة.
  • أصحاب غرب عليكى و مش بيحب يقعد مع صحابه القدام كمان خروجاته و مواعدها بيختلف.
  • غير مهتم بشئ أو حد يعنى لو كان بيمارس رياضة بيبطل لو بيحب تجمع العيلة بيبعد عن كل ده.
  • صعوبة كبيرة في الانتباه والتركيز.
  • حساس جدا وعصبي على أهون سبب .
  • يستخبة ورا الخصوصية و يقلق لو حد دخل أوضته.
  • بيكذب و يسحب فلوس كتير حتى لو سرقة.

أزاى نبتدى الكلام عن الإدمان؟

  • ممكن نتدرج نبتدى بالكلام عن التدخين لأنه حاجة الطفل بياخد باله منها لأنه شيفها حواليه.
  • و بعدين بالتدريج نوصل للكلام عن المخدرات عشان نزرع فكرة رفض الإدمان فى عقل الطفل بشكل مبسط طبعا.
  • التكرار يعلم الشطار كررى المعلومة للطفل عشان الفكرة تركز فى دماغها.
  • كمان يا ريت المعلومة تكون مناسبة لسنه.

استغلى الفرص:

  • أتعلمى تستغلى الفرصة صح يعنى أعلان، أغنية أو معلومة عدت عليه و أربطيها بالموضوع عشان يفهم.
  • بلاش أسلوب الدرس الخصوصى تقوليله تعالى عاوزة أكلمك عن الإدمان من الباب للطاق.
  • محدش بيحب جو المحاضرات ده لكن الطفل بطابعه عنده فضول يعرف و بيسأل كتير أستغلى الفرصة صح ووصلى المعلومة فى الوقت المناسب.

الصبر و الصراحة:

  • خليكى صبورة و هادية و متخليش أسئلته تستفزك و جاوبى على أسئلته بصراحة و لو مش عارفة الإجابة دورى و أرجعيله.

علاقة الثقة:

  • دعمى ثقة طفلك بنفسه عشان ميدورش على المخدرات كعلاج لنقص الثقة.

مواعيد دخول البيت:

  • لازم يكون فى أتفاق بينكم عن مواعيد ثابته ميتأخرش عنها .
  • كمان لازم تعرفى تحركاته و أصحابه عشان تعرفى هو بيتعامل مع أيه.

صاحبى إبنــك وبنتك:

لو علاقتك بطفلك علاقة مبنية على الثقة و الصداقة هيسمع نصائحك لأنه متأكد أنكو أصحاب بجد . دى المفروض تكون أقوى و أحسن علاقة فى حياتك لأن مفيش حد أهم من الطفل و كمان بتساعدك تحميه من أضرار نفسية و مجتمعية كتير.

علميه يقول لا:

لو بيوافق على كل حاجة بتتعرص عليه من الصحاب و ملوش رأى ممكن يقع فى مشاكل كتير. لكن لو أتعلم أزاى يرفض أى حاجة متعجبوش بأنه يقول ” لا ” . الرفض ممكن يكون بأدب و اللى مش عاجبه رأيك يبقى مش بيحترمك. علمى الطفل ان الصداقة تبادليه لازم أصحابى يحترموا رأى ذى ما بحترمهم

اترك تعليق