البزرميط الدمـاغ

مش لازم تستنى صحابك يفضوا عشان تسافر! دول 6 فوايد لـ السفر لوحدك

السفر لوحدك
كتبها سها مطر

واحدة من أكبر فوايد في السفر لوحدك هي أنك بتكسب وعى جديد ، ولما بترجع من الرحلة بتحس  بتغيير كبير وخصوصا لو سافرت لوحدك . باختلاف عمرك وسواء كنت ولد أو كنتى بنت السفر لوحدك هيغير حياتك للأحسن . غير الذكريات الى هتكونها  والأصحاب الى هتتعرف عليهم السفركمان هيضفلك وعى جديد وطريقة تفكير مختلفة  . ودى أهم الصفات الى بتجمع الناس هواة السفر لوحدهم ، لو أنت واحد منهم هتفهم النقط الجايه كويس :

1- بتعرف تستمتع لوحدك حتى لو مفيش حد حواليك :

بمعنى أنك مش بتسنى حد تانى علشان تستمتع بالحياة أو تحقق حاجة ، لكن بتعتمد على نفسك بشكل كبير في أنك تحقق سعادتك بنفسك من غير ما تعتمد على حد وتقدر تقضى وقت ممتع مع نفسك .

2- تقدر تثق في نفسك :

أنت لوحدك الى بتقرر تروح فين و امتى و هتعمل ايه ، وازاى تقدر تتحكم في الفلوس الى معاك لنهاية رحلتك ، السفر بيفرض عليك اختيارات كتيرة بتاخدها لوحدك وبكل حرية وده بيخلى شخصيتك مستقلة وبيثبتك أنك جدير أنك تثق في نفسك .

3- عندك قدرة على التكيف :

لو أنت بتقضى وقت في أنك تستكشف بلاد وثقافات مختلفة فده معناه أنك تقدر تتكيف مع أي ظروف ، كمان بيكون عندك مرونة أكتر وقابلية للتغيير ومش بتخاف من القرارات الجديدة والمجازفة .

4- تقدر تتعامل وتتواصل مع الناس بشكل كويس :

أحيانا بتكون مضطر أنك تواجة ثقافات ولغة مختلفة فلازم يكون عندك الصبر والقوة الكافيين ، النتيجة أنك هتتعرف على ناس من ثقافات مختلفة وهتقدر تتواصل مع الناس بشكل أحسن .

5- معتمد على نفسك :

أنك تكون المسئول الوحيد والمتحكم ازاى تقدر تستمتع برحلتك هيشجك على أنك تعتمد أكتر على نفسك . ولو أنت مسافر لفترة طويلة ، فأنت أكيد هتواجه مشاكل وصعوبات بس المهم ازاى هتتغلب عليها . لما تلاقى أن مفيش حد ممكن ينقذك ، وقتها هتكتشف قوتك الى ممكن متكنش عارف أنك بتمتلكها  .

6- عندك فرصة كبيرة أنك تتأمل نفسك :

السفر لوحدك هيخلى عندك الوقت والمساحة  أنك تتأمل نفسك . من غير شريك في السفر هتقدر أكتر تتعرف على نفسك وتستعيد ذكرياتك وتجاربك ، الموضوع ممكن يسببلك ألم أحيانا بس خليك متأكد أنه مفيد جدا ليك .

علشان كده المرة الجاية الى هتسافر فيها لوحدك هنى نفسك لأن مع كل رحلة وعيك بيزيد وتفكيرك بيختلف و بيساعدك أنك تبنى مهارات نفسية تساعدك في كل مجالات حياتك .

عن الكاتب

سها مطر