العيال

إضطراب فرط الحركة و نقص الأنتباه فى سن المراهقة

فرط الحركة

إضطراب فرط الحركة و نقص الأنتباه مشكلة بتقابل أطفال كتير أوى و فى الغالب بتكتشفها الأم.
لما بتلاحظ شقاوة زيادة عن الحد فى تصرفات الطفل يبقى مش قادر يركز فى حته و لو دقيقة.
اغلب الناس بتقولك بكرة يكبر و يهدى بس اللى كتير من الأمهات متعرفهوش هو أن فرط الحركة و نقص الأنتباه بيستمر فى حوالى 60 % من الولاد لسن المراهقة.
كمان فى الغالب بيكون الطفل بيعانى من مشاكل ذى صعوبات التعلم و إضطرابات القلق و المزاج أو الإكتئاب.

أيه أعراض أضطراب فرط الحركة و نقص الأنتباه عند المراهقين ؟

  • التشتت و السرحان
  • ضعف التركيز و الأنتباه
  • سرعة الغضب و العصبية الزايدة
  • كتير الحركة مبيثبتش فى حته واحده علطول بيتحرك.
  • مندفع و مش بيقدر الخطر.
  • المشكلة أن الأعراض بتزيد حدتها فى سن المراهقة لأن تغير الهرمونات و المزاج الملخبط للمراهقين بيخالى الحالة أصعب.

يا ترى أيه علاج فرط الحركة و نقص الأنتباه عند المراهقين ؟

أختلف رأى المتخصصين فى الحكاية دى :

  • فى ناس شايفة أن العلاج السلوكى لوحده كفاية.
  • رأى تانى بيقول أن الطفل اللى أتعود على العلاج الدوائى هيحتاج يستمر علي برده فى المراهقة.
  • رأى تالت بيفضل انه يجمع بين الدواء و العلاج السلوكى سوا.

نصائح نساعد بيها ولادنا يتحسنوا؟!

  1. الطفل بيحتاح مساندة كبيرة جدا من الأهل ده بتوفير نشاطات يخرج فيها طاقته و يقوى ثقته بنفسه.
  2. لازم نساعد المراهق على أن يكون عنده روتين يومي منظم نحاول نقللالمشتتات فيه على قد ما نقدر.
  3. يفضل أن كل اللى فى البيت يمشي على الروتين اليومي بتاع المراهق المصاب خصوصا فى مواعيد الأكل و النوم و الخروج.
  4. تشجيعه يلعب رياضة بيحبها أو ممارسة أى هواية مناسبة لمهاراته .
  5. نساعده يبنى ثقته بنفسه التركيز على الحاجات الإيجابية حتى لو كانت بسيطة.
  6. نعوده على أنه يلتزم بالروتين بتاعه و لو ملتزمش لازم نسحب منه شوية أمتيازات ذى الخروج مع صحابه أو الذهاب إلى النادي.
  7. التعاون مع مدرسين المراهق عشان نساعده يحسن مشاكل صعوبات التعلم.
  8. نحط توقعات معقولة عن أنجازاته كمان حدود لتجاوزاته.
  9. نحافظ دايما على علاقة الصداقة عشان نقدر نساعده يتعالج.
  10. بلاش نبالغ فى العقاب عشان منخسرش علاقتنا بيه.
  11. مهم أننا نستخدم أساليب متعددة عشان المراهق إلى أن تجد الأسلوب الذي يناسبه، وذلك مع الحرص على تجنب القسوة الشديدة.
  12. لو كان متعصب يفضل أننا نستنى عليه لحد ما يهدئ عشان الهرمونات بتزود غضبه فيكون أحسن لو أتناقشنا و أحنا أهدى.
  13. نسمع المراهق و نفهم مشاكله مهما كانت تافهة لازم نراعى مشاعره.
  14. التغاضي عن المشاكل الصغيرة كمان بلاش نحمله مشاكل تلبيت و خلافات الأب و الأم.
  15. مراقبة و متابعة يعنى ندى ولادنا الحرية بس نتابعهم و لو من بعيد.
  16. نظهر لولادنا مشاعر الحب بالمعاملة و الحنية أو حتى فى الأبتسامة.

المراهقة فترة متعبة فى العادى عشان كدا بتكون أصعب لما الطفل بيكون بيعاتى من أى نوع من أنواع الإضطرابات .

صحابوا ولادكوا و أحتوهم على قد ما تقدروا لأن اللى بيمروا بيه كتير قوى عليهم و أعرفوا أن العصبية و الغضب مش بأيدهم الهرمونات بتلعب بمشاعرهم طول الفترة دى لحد ما تمر و تستقر مشاعر الطفل.

أيه أصعب مشكلة قابلتك مع فترة المراهقة؟

عن الكاتب

نهلة شعلان