فرط الحركة: إبنى شاحنه مبيخلصش ولا بيفصلش

تعبت من الجرى ورا الولد طول اليوم

رغى عادي بتسمعه من كل الأمهات بس لما الحركة والشقاوة بتزيد أوى عن الحد الطبيعى تبتدى لمبة الإنذار تنور فى دماغ الأم. إن فى حاجة غلط بالذات لو الحكاية بدأت مع طفلك من أول ما أتعلم يزحف وفضلت تزيد وتزيد معه كل ما يكبر ده بيخلى فى أحتمالية انه يكون عنده فرط حركة أو   Attention hyperactivity disorder.

امتى اللمبة الحمرا بتنور فى دماغك

 لما تحسي انه ميقدرش يقعد ثابت لدقايق وكمان جواه طاقة عجيبة و بيفضل يتحرك طوال الوقت بدون توقف و لا راحة زى باقى العيال اللى فى سنه .

بس لازم نحط في دماغنا إن الحركة الأوفر دى ممكن تبقى غصب عنه لأن النوع ده من الإضطراب بيكون ليه أسباب كتير قوى عشان كدا بيكون أحسن لو خدنا رأى حد متخصص عشان نعرف هو عنده ايه بالظبط و نبتدى الطريق عشان نبقى أحسن .

وعادة الطفل اللى عنده Hyper active بيحس باللجاى : 

ان شاحنه زيادة عن باقى العيال

و ده ياحرام هتلاقيه ميقدرش يقعد دقيقتين ثابت فتلاقيه بيهز راجله و بيحرك أيده … و يا سلام بقى لو عاوزها يقعد فى الفصل شاطر ذى أصحابه تبقى بتحلمى فهو معنديش أستقرار ….. ده طبعا غير مشاكل النوم لان بطاريته مبتفصلش .

مندفع …. و مقاطع دايما

لما هتلاقى ابنك مش قادر يستنى دوره عشان يركب المرجاحة …. او يرد على سؤالك قبل ما تخلصى السؤال أصلا …. كمان مشكلته أنه بيقصر على علاقته باللى حواليه عشان مش مدى حد فرضة انه يعرفه .

معندوش  احساس بالخطر

أندفاعه هو اللى بيخليه يعمل كوارث و حوادث كتيررررر قوى و ده عشان هو بيتصرف من غير تفكيره نتيجة الإضطراب اللى بيسيطر عليه فعشان كده محتاج ماما عندها مهرات كتيررررر قوى يعنى تحطى عينك فى وسط راسك ….. و تتبعى تعليمات الsafty فى اى حاجة ممكن تبقى فى متناول ايده .

قلة الانتباه و التركيز بتخليه عيل ضايع

و عشان هو بيحب يتحرك كتير بيكون تركيزه قليل فى أى حاجة بيعملها …. و دى مشكلة تانية بذات لو ابنك فى سن المدرسة هتلاقى راجع من المدرسة ضايع مش عارف هو خد ايه النهاردة ؟؟ ….. او ايه هو Homework بتاعه ؟؟ و لا دريان باللى كان حاصل هناك أصلا.

طب و ايه هو الحل ؟!!!

طبعا الحكاية بتبقى صعبة على قلبك يا ماما بس لما تعرفى ايه هى المشكلة بدري بنقدر نساعده أكتر و الحل طبعا هو سرعة التشخيص لنوع الإضطراب اللى عنده و بعدين نيتدى الرحلة سوا .

رحلة الى الهدووووووء و ده بنحلم بيه كلنا

العلاج بيكون مهم عشان يقلل الحاجات اللى بيحس بها … من الأخر عشان يهدى شويه و يركز حبة فى الدنيا اللى حوليه … ده طبعا جنب جلسات تعديلات السلوكى اللى هيساعده يعرف أزاى يتعامل مع الناس اللى حوليه و كمان يبقله أصحاب .
فلازم الدنيا تمشى فى الأتجهين العلاج بالجلسات النفسية و الأدوية عشان نقلل الأعراض و تساعده يتحكم فى تصرفات و يعيش حياته .

و طبعا زى أى ماما عندها طفل عنده مشكلة لازم تشاركيه فى كل حاجة بيعملها و طبقى معاه الحاجات اللى عملها فى الجلسة فى البيت …. سواء بقى كانت تعديل سلوك أو تخاطب او نفسى … يعنى تعتبرى نفسك راس الحربة فى الفريق الكسبان.

كمان لازم تتابعى تغيرات طول الوقت عشان تعرف ايه اللى أتحسن فيه ….. و ايه العادات الجديدة السيئة او التصرفات عشان المعالج النفيسة يقولك تعملى ايه فيها .
هى رحلة طويلةلأمر و متعبة جدا جدا جدا …. بس المهم أنك تحاولى تساعديه عشان يبقى أحسن و كمان انه يبقى مبسوط و فرحان دايما لان البطاقة الإيجابية بتنفع عشان نعدى أى مشكلة .

اترك تعليق