الصحة النفسية

فتور الرغبة الجنسية للستات: بيقولوا عليها بارده

فتور الرغبة الجنسية للستات: بيقولوا عليها بارده

فتور الرغبة الجنسية عند الستات أو البرود الجنسي أو غياب أو نقص الرغبة الجنسية والأفكار والخيالات الجنسية، وغياب الرغبة الجنسية اللي بتنشأ بعد لما تبدأ في العلاقة الجنسية، بصورة مزمنة أو مستمرة، للدرجة اللي بتحس فيها الست بتوتر نفسي بيأثر على علاقتها بجوزها.

من الطبيعي أن الست تفقد اهتمامها بالجنس من وقت للتاني، ده لأن الرغبة الجنسية للست بتكون متغيرة علي مدار حياتها، وممكن تزيد لما تكون راضية عن العلاقة  أو لو كانت لسه في بداية علاقة جنسية جديدة، وممكن تقل لو الست أتعرضت لضغط عاطفي أو لما يحصلها تغييرات هرمونية بسبب الحمل أو انقطاع الدورة الشهرية.

وممكن يكون الفتور الجنسي للست عبارة عن الشعور بعدم الرضا و الضغط النفسي، وبالتالي ما تحس الست بالقلق وإنها مش راضية عن أدائها الجنسي، هي غالبا مش بتعاني من الفتور الجنسي، ممكن تكون رغبتها الجنسية أقل من غيرها من الستات، ولكن ده ما بيسببش أي انزعاج ولا يعتبر مشكلة في حد ذاتها.

وزي ما قالت جمعية أبحاث صحة المرأة  إن اضطراب الفتور الجنسي للست هو من أكثر الاضطرابات الجنسية انتشارًا بين الستات، وأن فيه واحدة ست من كل عشر ستات ممكن يحصلها فتور جنسي في مرحلة عمرية، والدراسات قالت أن حوالي 40% من الستات بيعانوا من الفتور الجنسي في بعض المراحل في الحياة، ودراسات تانية قالت أن النسبة بين 5 إلي15%.

بالرغم من تأثير فتور الرغبة الجنسية بيكون سلبي على العلاقة وبياخد شوية وقت عشان تقدر تعرف إن عندها فتور جنسي وسببه وإيه العلاج المناسب ليه، إلا إن الست بتقدر تمارس حياتها بشكل عادي جدا بعد العلاج.

فتور الرغبة الجنسية عند الستات هو اضطراب معقد، وممكن يحصل لأكثر من سبب اللي بتتنوع بين أسباب جسدية وعاطفية، الأسباب جسدية زي تغير مستويات الهرمونات أو الجراحة اللي ممكن تغير صورة جسم الست، الأسباب العاطفية،فيه كتير من الستات  بيربطوا  المشاعر الإيجابية للتواصل مع جوزها أو شريكها بالمتعة الجنسية، عشان كده  أي تغييرات سلبية في العلاقة ممكن تسبب نقص أو غياب الرغبة الجنسية.

  • الظروف الجسدية

فيه كتير من الأمراض زي السكري والسرطان والتهاب المفاصل واعتلال الشريان التاجي، ممكن تقلل من الرغبة الجنسية للست، وبعض الأدوية بتقلل الرغبة زي مضادات الاكتئاب وأدوية علاج ضغط الدم المرتفع، حتى الإرهاق ليه يد في الموضوع يعني ممكن تكون الست من شدة الإرهاق تكون ملهاش مزاج أو رغبة في ممارسة الجنس.

وكمان ممكن الست تحس أنها ملهاش مزاج أو رغبه في إنها تمارس الجنس بعد ما الدورة الشهرية تقف أو تبطل تيجي بحكم السن يعني، وده بسبب إن هرمون الاستروجين بيحصله أنخفاض في افرازه في الجسم ببصوره  قوية، والهرمون ده هو المسئول عن الرغبة الجنسية، و عادة ما بيرتبط التستوستيرون بالأداء الجنسي للرجل، ولكن بيأثر برضه علي الست، وهنا لو عايز تعرف معلومات أكثر عن الحالة النفسية للست بعد الدورة بص علي المقال ده

والتغييرات الهرمونية كمان اللي بتحصل للست في فترة الحمل بتقلل من الرغبة الجنسية .

  • الأسباب النفسية والعاطفية
  • فيه مجموعه من العوامل النفسية والعاطفية اللي ممكن تأثر علي الرغبة الجنسية للمرأة، ممكن الست يكون عندها  قلق أو اكتئاب أو مش واثقة في نفسها ومش عارفه قيمتها في الحياة أو شايفه نفسها قليلة أو عليها ضغوط كثيرة، أو تكون ضحية لاعتداء جسدي أو جنسي أو اغتصاب.
  • كمان العلاقات ومشكلاتها بتأثر علي الحكاية دي زي إن يكون جوزها خاين أو بيكذب عليها أو بيخدعها ، وده بيخليها تفقد الثقة وبالتالي بيحصل عندها فتور جنسي وضعف في الرغبة في حد ذاتها بسبب ضعف التواصل بينها وبين جوزها أو وجود خلاف مش عارفين يحلوه ، وممكن ما يقدرش الزوجين أنهم يعملوا علاقة جنسية ناحجه لو كانوا مش بيتكلموا مع بعض عن إيه اللي بيبسطهم سوا في السرير أو بيتكسفوا بزيادة من بعضهم، وبالتالي بيحصل بينهم فتور جنسي.

أزاي بيتم شخيص الفتور الجنسي عند الستات؟

العرض الرئيس للفتور الجنسي عن الستات هو نقص الاهتمام بالجنس، ولكن بسبب اختلاف كل ست عن التانية ،مفيش طريقة محددة أو اختبار معين ممكن يحدد هل الست بتعاني من فتور جنسي أو لا، لكن يعتمد التشخيص علي درجة شعورها بالقلق عن أدائها الجنسي وهل فيه  مشكلات مع الزوج بسببه.

وعامتا، لو الست حست بخوف ليه علاقة برغبتها الجنسية الدكاترة بيحاولوا يحددوا الأسباب اللي ورا الموضوع نفسه السبب الأساسي يعني، في الأول بيدوروا في الأسباب الجسدية وبيعملوا جلسة طبية شاملة وبتتضمن التاريخ الطبي وتحاليل وفحص نسا، وبعد كده بينصحوا الست أنها تروح لمعالج نفسي أو أستشاري عشان يحاولوا يعرفوا إليه الأسباب العاطفية اللي ليها علاقة بالموضوع.

علاج الفتور الجنسي ايه؟

فيه كتير من الطرق لعلاج الفتور الجنسي عن الستات، وبما أن ممكن يكون الجمع بين سببين من الأسباب اللي قلناها قبل كده يسبب النوع ده من الأضطراب، كمان ممكن يجمعوا بين نوعين من العلاج عشان يكون أكثر فاعلية.

وبتعتمد علاجات الأسباب الجسدية على علاج الأمراض المتسببة فى فتور العلاقة او الأدوية المسببة للمشكلة دي، مثلا :أنه ممكن تغير الدوا بتاع السكر أو أنها تغير نمط حياتها عشان تقلل من تعرضها للإرهاق والضغط.

فيه بعض الستات بتستفيد من الاستشارة والعلاج الجنسي خاصة فى أنه تقدر تتغلب علي أي صدمات جنسية سابقة وتحسن نظرتها لنفسها أو تفهم العلاقة بزوجها وتزود ثقها بنفسها وتقدر بسهوله إنها تعبر عن اللي محتاجاه من الطرف التاني وإيه اللي بتخاف منه ،وتحصل علي شوية نصايح عشان تمارس علاقة جنسية اكثر حميمية و اثارة ومشوقة. الخيال الجنسي كمان ممكن يحفذ الرغبة بشكل كبير عند الستات.

العلاجات الهرمونية

  • بعض الستات بيلاقوا إن العلاج الهرموني بيكون له فايدة عن طريق الاستروجين دا الهرمون اللي بيأثر على الرغبة الجنسية، وممكن الدكاترة يوصفوا في شكل حبوب أو من خلال الجلد عن طريق اللاصقة أو الجل، والنوع ده من العلاج بسموا العلاج النظامي بالاستروجين، عشان بيساعد المخ إنه يعمل اتصالاته الكيميائية لزيادة الرغبة.

والعلاج الموضعي بالاستروجين، ممكن تطبيقه علي الحالات اللي بتعاني من جفاف المهبل بعد سن انقطاع الدورة عن طريق كريم المهبلي أو الحلقة المهبلية، وده عشان يزود من تدفق الدم للمهبل ويزود الرغبة.

في بعض الحالات، الدكاترة بيوصفوا الاستروجين والبروجيستيرون مع بعض للستات اللي بتعاني من الفتور الجنسي.

التستوستيرون هو هرمون تاني بيأثر على الأداء الجنسي للرجاله والستات، على الرغم من إن منظمة الغذاء والدواء الأمريكية موافقتش على استخدام التستوستيرون للستات في الولايات المتحدة، إلا إن فيه دراسات قالت إن فيه احتمال يحصل شوية آثار جانبية من أستخدامه زي نمو الشعر الزائد وتساقط الشعر وحب الشباب ومشكلات بالكبد وتضخم البظر.

أزاي الوقاية؟

مفيش وسائل أكيدة للوقاية من اضطراب الرغبة الجنسية عند الستات، لكن من الافضل إن يكون فيه تغذية سليمة ووجبات متوازنة وتريح نفسها شوية، غير إنها تتابع مع دكتور نسا لو محتاجه علاج دوائي أو دكتور نفسي عشان تعالج المشكلة وهي لسه في بدايتها سواء كانت مشاكل زوجية عادية وغيرها من المسببات النفسية اللي ممكن تسبب فتور جنسي.

عن الكاتب

حنان جمـال