إزاي تعالج صُداع التوتر من غير إسبرين؟

292

الإجهاد بيسبب الصُداع والصُداع بيسبب ضغط نفسي وعشان تحمي نفسك من الحالتين دول لازم تبعد عن التوتر بقدر الإمكان عشان التوتر بيمنعك من إنك تعيش حياتك بشكل طبيعي، بيخليك دايمًا حاسس إن فايتك حاجة أو هيفوتك حاجة أو هتحصل مُشكلة أو هيقلل ثِقتك بنفسك في اجتماع مُهم وألف حاجة هتشتت دماغك وتخليك تصدع والصداع ده هيقوم مسببلك الإجهاد اللي هيسببلك ضغط وهتفضل في دايرة مقفولة من الألم النفسي وكل ده بسبب التوتر.

وعشان تحمي نفسك من كُل ده، لازم متخليش التوتر يسيطر على دماغك:

يا راجل كبّر مُخك

مش هنقدر ننكر إن فيه أحداث كبيرة بتسبب التوتر، زي ضغط الشُغل وزحمة المواصلات وعصافير الشركة والديدلاين، بس مش كُل حدث كبير يستدعي التوتر زي ولادة طِفل جديد أو نقل مكان الشُغل بالعكس دي حاجات لازم تفرح فيها وتفكر إزاي هتتعامل معاها صح من غير ما تقلق كدة، لإنك لو وقفت على كُل حاجة بتحصلك واعتبرتها حدث يستحق التوتر، هتبقى بتموت نفسك بالبطئ، ولو فضلت مركز عالساقطة والاقطة هتضغط نفسك وهتشد أعصابك وعضلاتك وهتجزّ على سنانك ومفيش أسبرينة هتخلصك من الصُداع اللي هيجيلك.

اتعلم ازاي تستريح

عشان تعرف تعيش مرتاح لازم تتعلم التقنيات اللي هتوصلك للراحة دي، غير إنك لازم تدي نفسك كل يوم حوالي ١٠ دقايق تمارس فيها رياضة من رياضات الإسترخاء زي اليوجا والتنفس العميق، وتقنيات الراحة دي:

  1. عيش ببساطة: مش لازم تعمل كُل حاجة في نفس الوقت وتستنى إنها تكون بيرفيكت، اسأل نفسك قبل أي حاجة إيه أهم حاجة لازم أعملها النهاردة وإيه الحاجة اللي ممكن تستنى وبكدة هتقلل الضغط على نفسك.
  2. اتمرن كويس.
  3. كُل أكل صِحي.
  4. حافظ عالنوم في مواعيد ثابتة.
  5. اطلب المساعدة لو عندك مسؤليات كتيرة.
  6. نظمّ وقتك بشكل ذكي.
  7. خليك مُستعد لأي تغير ممكن يحصل في حياتك.
  8. اتعامل عادي مع الحاجات اللي عارف تسيطر عليها.
  9. متفرطش في أجازاتك وأوقات راحتك في اليوم.
  10. اضحك والضحكة هتبفى ضحكتين.
  11. اكسر القواعد اللي ممكن تعكر صفو حياتك.

اتعلم امتى تروح لدكتور

مش كُل صداع هيجيلك هيكون بسبب التوتر وتجري عالعلاج النفسي متوهمش نفسك، وفي نفس الوقت مينفعش تكون حياتك واقفة بسبب الصداع والتعب وانت منفّض ومفكر إنه عادي، عشان كدة لو لقيت إن الصُداع ده مش عَرضي ومستمر ومعطلّك عن حياتك يبقى لازم وقفة ولازم تلجأ لطبيب نفسي وبشري، غير إن فيه علامات لازم تخليك تقلق زي إن الصُداع يجي فجأة بس معاه أعراض زي التشنج أو نوبات الهلع أو صعوبة الرؤية وتنميل الجسم، أو إن الصداع ده يخليك يُغمى عليك أو ميروحش بسهولة بأي اسبرين، فكُل دي تحذيرات بتقولك إنك فورًا لازم تزور الدكتور وتتطمن على نفسك.

اترك تعليق