عايز أبطل سجاير! المقال ده يا هايضايقك يا هايساعدك

69

شرب السجاير بقى عادة يومية زي شرب الشاي عند فئة كبيرة من الناس، لازم تعرف إن التدخين بيتحول لادمان بسبب وجود مادة النيكوتين اللي بتعزز هرمون الدوبامين، وبتخلق شعور بالرضا والراحة للعقل، لكن للاسف السجائر والتبغ فيها حوالي 4000 مادة كيميائية مسببة للسرطان وبتجيب أمراض كتير احنا في غني عنها.

أكثر الامراض شيوعا عند إدمان السجاير:

  •  سرطان الرئة.
  •  تضخم الرئة.
  •  التهاب الشعب الهوائية المزمن.
  •  السرطان وخاصة في الجهاز التنفسي.
  • سرطان الدم.
  • السكتة الدماغية.
  • مرض السكر.
  • مشاكل العين ، مثل إعتام عدسة العين والتنكس البقعي.
  • العقم.
  • ضعف جنسى.
  • مضاعفات الإجهاض والحمل.
  • ضعف جهاز المناعة.
  • البرد والانفلونزا والتهابات الجهاز التنفسي.
  • فقدان حاسة التذوق أو الشم.
  • أمراض اللثة ومشاكل الأسنان.
  • ظهور الشيخوخة المبكرة.
  • القرح الهضمية.
  • هشاشة العظام.

أمراض التدخين السلبي:

لو شايف انك بتأذي نفسك بس فا عادي ومش حوار، فلازم تعرف أنك كمان بتأذي أهلك وصحابك وزمايلك بتدخينك، دخول الدخان والتبغ لرئتهم بيسبب أمراض ممكن تلازمهم طول حياتهم.

  • أزمات الربو.
  • متلازمة الموت المفاجئ للرضع.
  • أمراض الاذن.
  • التهابات الجهاز التنفسي.
  • التهابات أخري.

مين اللي عرضه للتدخين؟ 

أفضل وقاية من إدمان التدخين، هو تجنب تجربته في الأساس، 80% من المدخنين بيبدأوا في مرحلة المراهقة وبيكون بسبب انهم حبوا “يجربوا” مع اصحابهم، خصوصا مع اسباب زي انهم على استعداد لإدمانه، ازاي حد يكون مستعد للإدمان؟

  • يكون عنده تاريخ عائلي من المدخنين
  • يكون كبر في بيت فيه شخص مدخن
  • الأمراض النفسية زي: الاكتئاب، اضطراب ما بعد الصدمة وغيرهم.

ازاي اعرف إني أدمنت؟

  • عدم القدرة على التوقف عن شرب السجاير
  • أعراض الانسحاب عند توقف استخدام النيكوتين
  • الرغبة في الاستمرار في التدخين حتى عند ظهور مضاعفات صحية
  • استمرار استخدام منتجات التبغ حتى لو كان لها تأثير سلبي على حياتك

ازاي أبطل سجاير؟

1- الأدوية

طبعا في بعض الأدوية اللي بتساعد على تبطيل السجاير، وبتشتغل على تقليل الرغبة في التدخين، ومن البدائل دي هي الاستحلاب أو بخاخات الأنف أو أجهزة استنشاق بديلة بدون نيكوتين ومواد كيميائية مضرة موجودة في التبغ، الطريقة دي بطيئة بس هتقوي إرادتك، وممكن دكتورك يكتبلك على أدوية مضادة للاكتئاب عشان تحسن مزاجك وتزود دوبامين بدون الحاجة للنيكوتين.

2- مجموعات الدعم

سواء اخترت مجموعة دعم شخصية أو مجموعة افتراضية من على الانترنت، مجموعات الدعم هتعلمك مهارات التأقلم من خلال تجارب ناس تانية مروا بنفس ظروفك ومشاعرك، وهيساعدوك ازاي تتغلب على إدمان التدخين.

3- نمط الحياة الصحي

يركز علاج إدمان النيكوتين بشكل كبير على الأدوية وانك تاخد وقتك في التعود على روتين حياتك الجديد بدون السجاير! جرب الاقتراحات خطوة خطوة على فترة 20 يوم، بعد 20 يوم هيكونوا عادة بتعملها مش محتاج ترجع تقراهم:

  • مارس التمارين الرياضية بانتظام، على الأقل 3 مرات في الاسبوع.
  • اختار وجبات خفيفة تشغل فمك ويدك، حتى لو هتقزقز لب.
  • شيل كل علب السجاير من بيتك وعربيتك.
  • تجنب المواقف اللى تخليك تنتكس،زي التواجد حول مدخنين.
  • اختر وجبات صحية.
  • ضع توقعات واقعية حول علاجك.
  • حط أهداف صغيرة في تقليل السجاير لحد منعها تماما، وكافئ نفسك كل ما تعدي يوم من غير سجاير!

آثار انسحاب النيكوتين

المدخنين اللي بيوقفوا استخدام السجاير أو منتجات النيكوتين بأشكالها، بيعانوا في البداية من أعراض انسحاب زي الأنفعال والقلق النفسي وأعراض جسدية زي الصداع والإرهاق، وبيكون أول اسبوع تبطيل هو الأصعب والأسوأ، لكن كل دا هيمر وهيعدي بمجرد ما تتخطي أول فترة، والرغبة الشديدة المفاجأة للتدخين حاجة شائعة متحبطش نفسك وأفضل مستمر وهتتعود على إنك تتحكم في رغبتك تجاه السجاير.

اترك تعليق