٥ حاجات لازم تعملهم عشان تساعد شخص بيعيش علاقة مُعقدة

79

أي إنسان ممكن يمر بعلاقات معقدة في حياته، حتى الناس اللى على طول بنشوفهم متفائلين ومقبلين على الحياة وارد انهم يختبروا علاقات معقدة في حياتهم، ممكن محدش يحس بالألم النفسي اللى بيمروا بيه، بس ممكن تحس ان حياتهم بقت مش ماشية تمام زى قبل كدة، وخلينا نقول ان في فرق كبير بين العلاقة “المعقدة” والعلاقة “المُهينة”، لأن في العلاقة المُهينة ممكن تحصل إساءة جسدية او عاطفية ودى حاجة مينفعش تعدى عادى او تسامح فيها، لكن العلاقة الصعبة غالبا بتكون علاقة رمادية، يعنى هي علاقة عادية جدا بس في نفس الوقت هي مش علاقة طبيعية صحية وبالتالي بيكون في حالة من عدم الراحة اللى ممكن تأثر على النفسية بشكل كبير، عشان كدة ساعات بيسموا العلاقة المعقدة دي علاقة سامة.

علامات هتوضحلك ان صاحبك بيعيش علاقة صعبة

  • هتحس ان صاحبك ده بينطفى، وبيتحول لشخص أسوأ في كل حاجة.
  • بيبعد ان الأشخاص والحاجات اللى كانت بتخلية دايما مبسوط وسعيد.
  • مزاجه ونفسيته بتكون متغيرة جدا، يعنى هيبقى عصبي جدا وسريع الانفعال ومتقلب المزاج وحزين بطريقة مشفتهاش فيه قبل كدة.
  • ميال أكتر للقلق والاكتئاب والانسحاب بعيد عن التجمعات.

والعلامات دى بتحصل نتيجة أسباب كتير زى:

  • ان الشريك في العلاقة مش مناسب كفاية، مش شرط خالص انه يكون شخص شرير او طبعة صعب.
  • ان الشريك يكون عنده مشاكل كبيرة زي مثلا الإدمان سواء للكحول او غيرة، وبالتالي بيكون مش قادر يتماشى مع شريكة.
  • ممكن يكون الشريك مر بطفولة صعبة، ومعندوش فكرة ازاى يتعامل مع شريكة بطريقة كويسة.
  • وممكن تكون المشكلة أصلا من ناحية صديقك لو كان بيعانى من مشاكل تعلق زيادة بتوصل للتوتر اللي بيعمل خلل في العلاقة.

وبصرف النظر عن الأسباب انت بيكون اهتمامك هو مساعدة صديقك في أزمته وإنك تخلية يحس بالاحترام والتقدير.

إزاى تقدر تساعد صاحبك اللى بيعيش علاقة معقدة

إحساس إنك تلاقى صاحبك او شخص يهمك امرة بيعيش تجربة صعبة مأثرة علية بيكون احساس صعب جدا، وبتكون عاوز تساعده بأي حاجة حتى لو هتتكلم معاة شوية، بس أحيانا بيكون هو مش متقبل أي كلام او مش عاوز يسمع أي تعليق من حد، عموما العلاقات بيكون فيها ابعاد معقدة شوية صعب تتناقش فيها، بس احنا هنقولك على نقط أساسية تقدر تتكلم فيها مع صاحبك لو حسيت انه بيعاني في علاقة صعبة من غير ما يضايق منك.

بلاش أحكام قاسية

لازم تكون عارف اننا كلنا بشر مش كاملين، وكلنا بنغلط ومش من حقنا نحكم على بعض، كمان المشاعر وتجارب “الحب” كتير بتحصل فيها حاجات مش منطقية، وممكن الشخص اللى انت بتحكم علية يكون غلطان من وجهة نظرك، بس انت كمان اكيد مريت بتجارب تشبه التجربة دي وكنت فيها غلطان برضة بس مكنتش مستحمل ان حد ينتقد تصرفاتك، عشان كدة بنقولك اهدى شوية وكفاية احكام قاسية على اللي قدامك.

اعترف بحرية الناس في القرارات وارتكاب الأخطاء

كتير بنكون عاوزين نحمي الناس اللي بيهمنا امرهم ونبعدهم عن أي حاجة ممكن تضايقهم، بس ده مش دايما صح عشان هما بيكونوا محتاجين نسيبهم يغلطوا ويتعلموا من اخطائهم، أكيد دة بيكون صعب علينا بس ده حقهم انهم يعيشوا حياتهم بطريقتهم، يعنى لو فعلا كنت بتهتم بشخص وبتحبة احترم قراراته وأديله الفرصة يعيش حياته بطريقته حتى لو كنت مش متفق معاة.

عبر عن مخاوفك بلطف

عبر عن مخاوفك وافكارك بطريقة لطيفة، متخليش اللي قدامك يحس إنك بتهاجمة، أتكلم بصدق عن مخاوفك وآرائك وملاحظاتك من غير مبالغة، ومن غير فرض مشاعرك على العلاقة، حاول تخلى المناقشة بينكم تكون منطقية ومعتمدة على حقائق، خلى بالك كتر الكلام مالوش لازمة، المناقشة مرة واحدة كافية جدا، اكتر من كدة ممكن صاحبك يزهق وينفر من نصيحتك أصلا، أهم حاجة خليك فاكر اوعى تكون مهاجم لأن ده بيخلى صاحبك في موقف دفاعي وممكن يخليه يتمسك بالعلاقة الصعبة اللي هو فيها أكثر.

متاخدش جنب وتبعد

ممكن في البداية تحس إنك عاوز تبعد عن صاحبك لمجرد إنك مش عاجبك شريك حياته او مش مرتاحلة، بس اوعى تعمل كدة، بالعكس حاول تتقبله على قد ما تقدر، لأن لو فعلا علاقتك بصاحبك تهمك لازم الصداقة اللى بينكم تكون هي الأولوية بصرف النظر عن عدم تقبلك لشريك حياته، وخلى بالك ان ممكن علاقة صاحبك مع شريك حياته تنتهي في أي وقت لكن صداقتك انت وهو هي اللي تدوم لآخر العمر.

خليك مستعد للاحتواء

لو صاحبك رجعلك مجروح او قلبة مكسور وبيشكيلك من اللي حصله، اوعى تقوله “ما هو ده اللي انا حذرتك منة” ولا “لو كنت سمعت كلامي مكنش حصلك كدة” ده مش وقت تأنيب ولا تبكيت، بالعكس لازم تسمعه وتحتويه من غير أي احكام قاسية، انت أكيد هتكون غضبان من اللي حصلة، بس هو محتاج منك دلوقتى انك تسمعه وتديله الحب والاحتواء اللي هو محتاجهم، ولو حسيت ان صاحبك تعبان لسة ممكن تقترح بطريقة كويسة انه يلجأ لأخصائي نفسى يقدر يساعده ويوصله لأساس المشكلة، أهم حاجة تختار الوقت الصح والطريقة المناسبة، والأهم من كل ده انك توصل لصاحبك ان حبك لية غير مشروط ومش ممكن يتأثر بأي أخطاء هو عملها لأن ده هو الحب الحقيقي الغير المشروط.

اترك تعليق