البزرميط الدمـاغ

إزاي تحول ساعة الفراغ لـ ساعة الحظ؟

ساعة-الفراغ

كلنا بيمر علينا وقت فراغ ومعظمنا بيستغل وقت فراغه في شكل تفكير زيادة دماغك هتنفجر أرحمهاوبما أننا في الشتاء والشتاء أكثر الفصول الجاذبة للإكتئاب، يبقى لازم نواجه الإكتئاب ونمنعه من الأول ونمنع أوقات فراغنا بشوية طرق بسيطة ومسليه ممكن نعملها في وقت فراغنا، ونستغله صح ونحول ساعة الفراغ لساعة الحظ..

1- أعياد الميلاد: صحابك عيد ميلادهم قرب طيب فكر في تحضير عيد ميلاد جديد، أماكن جديدة”هتلاقي أقتراحات أماكن جديدة على صفحة remood places ” وخروجة جديدة وحتى أفكار الهدايا تبقى جديدة، سواء كان حاجة يدوية بصنع أيدك أو هتشتريله حاجة مميزة

2-الناس المنسية : في زحمة الدنيا بننسى قريبنا، مدرسينا وحتى صحاب زمان، فليه منستغلش وقتنا دا بأننا نشحن ونتصل بيهم نرغي معاهم ونقولهم أد أيه هما وحشونا ولسه فاكرينهم وبنحبهم ونطمن عليهم

3-اللغة: خد جملة وليكن مثلاً صباح الخير دور عليها في 5 لغات معناها أيه ونطقها وبكدا هتعرف تقول صباح الخير بخمس لغات، راجع مهارات التحدث والأستماع عندك في اللغة اللي معاك أو أتعلمها من أول وجديد (نزل أغاني أو أفلام بمعاني الكلمات وأسمع وأنطق مع الأغنية)، أتكلم أنجليزي مع أي حد من صحابك أو على مواقع أجنبي، أختار أي لغة جديدة وغريبة أتعلم نطق كلمتين فيها أتعلم اللغة التاميلية مثلاً مش مفهومة كدا ممكن تتعصب بالتاملي ومحدش هيفهمك

4-خدلك فاصل: بتعرف ترسم، تلعب دوبلاج، الموسيقى، هوايتك أيه راكنها ليه قوم مارسها وشوف الجديد فيه نفض من عليها التراب ورجع الهواية وشغفك بيها، أنزل ألعب رياضة ، أعملي تمارين زومبا في البيت لمزيد من الرشاقة والجمال، أعملي ماسكات للبشرة للشعر ، شغلي فيلم بتحبيه بس بلاش رومانسي أو دراما عشان دول بيجبوا أكتئاب فرفشوا بالكوميدي أو خيال علمي أكشن،ونبعد عن النكد، ألعب يوغا وفرغ كل الطاقة  السلبية بموسيقى هادية مع وضع اليوغا المريح وأبدأ جمع كل طاقتك وجددها

5-رسايل الحب: جمع أسامي اللي بتحبهم طلعوا 2 طلعوا 5 سواء كانوا صحابك أو من أهلك أو حتى شريك حياتك وأبدأ أكتب ليه رسايل صغيره ولفها فيها أسباب حبك ليه وذكريات حلوة بينكم، أكثر الذكريات المضحكة

6-الكتب: عالم الكتب دا عالم تاني مجرد ما تفتح كتاب بتلف معاه العالم وأنت قاعد في البيت، قهوتك أو نسكافيهك وأقعد بكتابك ومخمخ وعيش في عالم الكتب

7- الخروج: الخروج دا من أحلى الإختراعات في أي وقت فاضي أخرج أتمشى حتى لو لوحدك وأعزم نفسك على عصير، وأكل،وأسمع تراك الموسيقى اللي بتحبه وعيش

8- الجانب الروحاني: الجانب المركون دا نفوقه شوية صلي وأقرأ في دينك واعرف عن دينك أكثر وعن ربك وأقعد ادعي كل الدعوات اللي تيجي في بالك ليك ولغيرك وأدعي حتى لناس متعرفهاش أدعيلي مثلاً 😀

9- الأطفال : لو عندك طفل أقل من 3 سنين لأن فوق 3 سنين بيبقى عفاريت، أقل من 3 سنين ويفضل يكون لسه مبيتكلمش ولا بيمشي، بيزحف، أفضل زغزغ فيه وألعب معاه لحد ما يضحك هتلاقي روحك بتضحك معاه ولو فوق 3 سنين معلش خده خرجة وديه ملاهي واتمرجح معاه هيحبك وهيسمع كلامك بعد كدا وأنت هتخرج طاقة الطفولة اللي مركونه جواك

10-شريك حياتك بقى: الحتة الحلوة اللي في الحياة أنه وقت الرومانسية والعاطفة، أقعد معاه وأتكلموا في أي حاجة لو متجوزين ساعده في البيت في شغله، قوله أد أيه هو واحشك وأن حياتك حلوة عشان هو فيها، خوده خرجه، أتمشوا، أعملوا حتى عشاء رومانسي على ضوء الشموع في البيت أطلق عنان العاطفة

هنطبخ أيه النهاردة ، سؤال مصرين نعيش معه

عن الكاتب

سلمى شرف الدين

سلمى شرف الدين ، خريجة إعلام ، وبحب الدوبلاج والكتابة