البزرميط

زميلك اللي بيشتغلك من أول يوم شغل

زميلك-اللي-بيشتغلك

عمرك جربت تتعامل مع Dr. Jekyll and Mr. Hyde ؟ متستغربش كتير ،كلنا اتعاملنا مع الشخصيات المصابة بحالة انفصام الشخصية دى وبالذات فى الشغل . فى ناس عايشة مع الشخصية دى بإرادتها وفى اللى مش قادر يعيش منغير شر ،فتلاقيه بيظهر الخير ودور الملاك لكن من ورا ظهرك شيطان يحب ياذي الناس .

أفتكر معايا كدا أول يوم ليك فى الشغل مش حصل برده و قابلت ملاك طيب كزميل ليك فى الشغل وبيعملك من أول يوم كأنه يعرفك من سنين ابن حلال صحيح .
وفضلت عايش على الفكرة دى عنه لفترة طويلة أوى لحد ما عرفته على حقيقته وبان الوش المستخبي ولو متعرفهوش تعالى نعرف سوا .

حرص و لا تخون ، طيب ليه ؟

عشان فى ناس متعودة دايما على انها تظهر حب الغير لله فى لله و طبعا ده ممكن يكون حقيقى .بس لو مش حقيقى بيكونوا ايه صفاتهم ! .

إيه صفات زميلك في الشغل ابو وشين :

  • فالاغلب بيكون فى نفس منصبك فى العمل وعنده مسئوليات مشابه لعملك .
  • بيغير ويخاف من الموظفين الجداد عشان متتسحبش السجادة من تحت رجله .
  • بيعاملك بكل حب و عشم كأنه معرفة عمر ،برغم أنك بتشتغل من أقل من أسبوع .
  • بيظهرلك أنه همه الأول مصلحتك و ده بإيضاح امور حقيقية عن العمل و المديرين عشان تقع فى شباكه .
  • و بعد ما نطمن و تحطى مشاكل الشغل تلاقيه بيسحب منك أخبار تعاملات الناس و أسرار عملك عشان يعرف يحفرلك صح طبعا ده على أساس معرفته بالمكان و العاملين فيه .
  • ممكن يقلب و يبانلك الوش الشرير الحقيقى و ممكن تفضل مخدوع فيه سنين و متعرفش أنه ورا كل مشكلة وقعت فيها فى شغلك .

وبعدين طب.. ازاى اتقى شره ؟

  1. طبعا نظرية حرص ولا تخون هتساعدك تعامل الناس كلها كويس ،بس برده لازم تاخد وقتك عشان تقيم مين ممكن تصاحبه فى الشغل و مين تبقي زماله بس .
  2. أوعى تخرج كلمة من حوار تم بينك و بين أى مدير أو أى أسرار شغل الى صاحب داخل الشركة ،لانه هيلف المكاتب كلها ويحكي فيها ولو مكنش صاحبك بوشين فممكن يلف على طريقة متقولش لحد.
  3. أعمل تجربة صغيرة عشان تتاكد انه بيحافظ علي اسرارك ،جرب تحطه في موقف حتى لو كنت مخترعه و شوف لو رجعتلك الحدوته نفسها مرة تانية من شخص مختلف ،يبقى نقلها لكل الناس و لو فضلت سر تبقى نقطة فى صالحه .
  4. وقت الشغل عشان نتعلم و تترقى و نوصل لمناصب أحسن ودا هيحصل لما نركز اكتر في شغلنا ولو فى صاحب ليك فالشغل يفضل ان العلاقات دي تبقي بعد وقت الشغل عشان متتعطلش .

من الأخر انا مش بعقدك بس فى بداية حياتك العملية محتاج

تخلي باك اكتر عشان متشربش من الكاس اللى شرب منه قبلك كتير

عيش و أشتغل  وغامر وقرب من الناس بس دايما حافظ على شغلك من العلاقات اللي جواه .

عن الكاتب

نهلة شعلان