خمس طرق تخلصك من الأرق المرتبط بالضغط النفسي

87

الواحد مننا في حياته بيتكعبل في ضغوط مالية، أو ضغوط الشغل، أو مشاكل في علاقاته، بس هل الضغوط دي مسببالك أرق؟ لو اه اتأكد انك مش لوحدك! حوالي تلت البالغين خدوا منهم عينات عشان يشوفوا أشكال الأرق عندهم ولقوا ان بيكون عندهم يا اما صعوبة انهم يناموا، أو صعوبة في انهم يفضلوا نايمين أو الارق الشديد لدرجة انهم مش قادرين يعملوا حاجة خلال يومهم.

النوم عموما مهم جدا للصحة العامة، والأرق ممكن يأثر عليك بكذا طريقة، ممكن يخليك تحس انك بطئ في استيعاب الاحداث أو حتى بطئ في مشاعرك! بمعني اصح مش هتفهمها وهي طايرة، والأرق المتكرر ممكن يؤدي للضغط النفسي والإرهاق، والعكس بيحصل إنك لو دايما مضغوط نفسيا اكيد هيجيلك ارق، ودي خمس طرق ممكن تجربها لو عندك الأرق المرتبط بالضغط النفسي:

خلص جسمك من التوتر

ساعات لما عضلات الجسم تكون متنشنة حتي والشخص مش حاسس بيفضل فيها توتر، احسن حاجة تجربها انك تعمل استرخاء العضلات التدريجي، ودي تمارين عبارة عن تمارين تنفس وتواصل مع عضلات جسمك بحركات بسيطة بتركز فيها ان عضلات جسمك خصوصا الضهر والرقبة والذراع تتخلص من التوتر، بمعنى اصح بتتخلص من كل التوتر دا بالتنفس وانك تسترخي.

المذكرات

لو بتصحى كل يوم بالليل من عز النوم والتفكير بيشغلك، يبقى جيب ورقة وقلم واكتب الاحداث المهمة اللي حصلت في يومك، حاجة اتعلمتها أو موقف أو نكتة، وحاول تكتب مشاعرك على الورق عشان تصفي ذهنك وتفهم مشاعرك اللي مسببالك الارق، وممكن كمان تحط خطة للمواقف اللي بتوترك عادة أو الاحداث اللي ضاغطاك نفسيا.

غير طريقة تفكيرك!

احيانا الأرق بيحصل بسبب القلق، والواحد مننا بينام وهو في بطنه بطيخة صيفي لما يبقى مفيش حاجة قالقاه وعشان كده لما تغير نظرتك وتعاملك مع ضغوطاتك -خصوصا اللي مسهراك-ساعتها هتقدر تنام، غالبا ما بتكون ضغوط  الشغل هي السبب،بدل ما تحس انه تهديد حاول تتعامل مع المواقف اللي موتراك على انها تحدي لازم تثبت نفسك فيها وتقدر قيمة نفسك خلالها، لانه سواء انت عملت الشغل او معملتهوش الكوكب مش هينتهي وكل حاجة بتعدي! كونك نشيط ومتحفز انك تعمل اللي وراك وتتخلص من مشاكلك هيخلصك من التوتر والسلبية.

متدخلش النوم في حواراتك!

زي ما قولنا قبل كده لما الارق يكون شيء انت متعود عليه، انك تدخل تنام هتكون أساسا فكرة مرهقة، لو وصلت للنقطة دي يبقى في شوية حاجات لازم تعملها زي ان لما يكون النوم رايح من عينك يبقى قوم اتمشي كام دقيقة او اسمع مزيكا هادية، ولازم تكون مظبط اوضتك على وقت النوم تكون دافية ومترتبة واضاءتها قليلة، أو ممكن تعود نفسك تروق شوية في البيت قبل ما تنام ويكون ده روتينك اللي جسمك هيكون مستني بعده مكافأة وهي النوم.

اطلب مساعدة!

ناس كتير بتعاني من الأرق بس مبيطلبوش من حد يساعدهم، والحقيقة ان في علاجات كتير للارق سواء العلاج المعرفي السلوكي أو الأدوية اللي ليها علاقة بالتخلص من التوتر واللي بالتالي بتخليك تنام نوم صحي وسليم، لو فعلا عندك أرق بيتكرر في انك تنام أو انك تفضل نايم لازم تطلب مساعدة طبية.

اترك تعليق