البزرميط

إزاي الصنايعي ييقوم بـ تحديد المصنعية بتاعته؟

تحديد المصنعية

تيجي تروح تصلح عربيتك يديك مصنعية، ويجي زبون بعدك يعمل نفس الحاجة يديه مصنعية تانية. تجيب سباك يركبلك حنفية وتطلب منه تحديد المصنعية بتاعته يقولك 50 جنيه ونفس السباك في بيت تاني يركب نفس الحنفية بـ130 جنيه.

أقولك على حاجة؟ إنت لو واقف في محل قطع غيار وسألت على مرايا عربيتك هايقولك على سعرها تمام؟ لو جيتله بعدها بـ نص ساعة هايديك سعر تاني (حتى لو افتكرك، مش هايفتكر السعر اللي قالهولك) إلا لو عنده سيستم في المحل ودول قليلين قوي.

إيه اللي بيحصل ده وإيه اللي المفروض يحصل؟

شوف ياسيدي، المفروض إن اللي بيحدد مصنعية الصنايعي (أو العامل) سببين رئيسيين .. هانقولهم سريعاً:

أولاً الوقت: الصنايعي زيه زي أي حد شغال سواء شغلانة دايمة أو حرة (فريلانسر). بيحسب بيخشله كام في الشهر (3000 جنيه مثلاً) وبناءاً عليه المفروض يخشله كام في اليوم (100 جنيه). وعشان كدة وقته بفلوس! فممكن يعمل حاجة سهلة بس خدت اليوم كله مثلاً.

أينعم ساعتها مش هايقولك هات 100 جنيه .. إنما تحديد المصنعية هايختلف شوية لأن يومه ضاع ومش هايشتغل تاني.

ثانياً الصعوبة: معظم الصنايعية عارفين حجم الصعوبة اللي هايقابلوها في الشغلانة قبل ما يبتدوا. وبالفعل محددين تكلفة لكل حاجة تقريباً (مثلاً: تركيب مساعدين العربية 50 جنيه) بس طبعاً وارد يطلع حاجات في النص تخلي الشغلانة تطول ويضطر يغلي شوية.

أينعـم الكلام ده بيعمله الصنايعي إبن الحلال اللي بيراعي ربنا في أكل عيشه .. إنمـا إيه اللي بيحصل بقى على أرض الواقع مع الصنايعية التانيين؟

اللي بيحصل إن الصنايعي ليه نظرة كدة فيك وبيقدر يقيمك بسرعة جداً من خلال شوية حاجات. وعلى أساس الحاجات دي بيطلب مصنعيته اللي طبعاً بتختلف من شخص للتاني. لأنه ببساطه هو بيقرر هياخد منك كام، مش بيقرر الشغلانة دي تتعمل بكام؟

  1. الصنايعي بيبـص للخامات اللي إنت جايبها (نوعها، عددها، تكلفتهـا).
  2. وبيبص لمستوى منطقتك اللي ساكن فيها أو اللي الشغل هايتعمل فيها
  3. بيبص كمان للبسك وشكلك وتليفونك وطريقة كلامك.
  4. وطبعاً بيبصلك إنت شخصياً وبيقدر يحدد إنت فاهم ولا مش فاهم وعلى الأساس ده بيتعامل معاك ويقوم بـ تحديد المصنعية .

مثال 1: واحد داخل على ميكانيكي في منطقة سكنية مستواها عالي شوية، بعربية فيات قديمة عايزة عمرة. الميكانيكي هايحسبها كالتالي: “الوقت كتير تلات أيام + الموتور ده رخم وعايز مجهود والخراط بعيد + زبون الفيات معاه معهوش فلوس كتير أصلاً وإلا مكانش ركبهـا؟”

الميكانيكي في الحالة دي ممكن يرفض الشغلانة كلها 

مثال 2: واحد بيشطب شقة. وجايب كل البويات بتاعته من الغالية (Jotun مثلاً). وجايب عده نضيفة عشان مش واثق في عدة الصنايعي والشقة في الزمالك.

مثال 3: واحد بيشطب شقة نفس المساحة. إنما جايب كل البويات زيت من الرخيص. ولابس عادي وراكن المكنة تحت وساكن في عين شمس. وغالباً واخدها إيجار جديد.

تفتكر نفس النقاش اللي هايعمل الشقتين هياخد نفس المصنعية؟

طيب إيه اللي يخليك تقدر تتحكم في تحديد المصنعية:

  • أولاً فهمك للقصة دي ممكن يخليك تتعامل مع الموضوع بشكل أحسن بكتير،، إزاي؟
  • لازم تقرا وتسأل عن اللي هاتعمله! يعني مثلاً لو هاتركب رخام، لازم تعرف قبل ما تروح للصنايعي تكلفة المصنعية قد إيه تقريباً، ونوع الرخام الكويس إيه؟ وتفرق بينه وبين الصيني إزاي؟ وهكذا… ودي الطريقة اللي بتخليك تعرف تفاصل وتكسب في الفصال كمان.
  • من الأفضل إنك تتعامل مع ميكانيكي واحد. عشان  يحفظ عربيتك ويعمل معاك الواجب في المصنعية وفي الصنعة نفسها.
  • كل أنواع العربيات ليها جروبات على الفيسبوك. ودي مصدر مهم جداً لكل الحاجات اللي عايز تعرفها قبل ما تنزل تصلح عربيتك.
  • بلاش منظرة ورسم على الصنايعي. حاول على قد ما تقدر تشتغل معاه بإيدك في الحاجات الخفيفة. الوقفة دي فيها فايدتين: أولاً إنك تتعلم حاجات تنفعك بعدين عشان ماتعتمدش على الصنايعي في الحاجات الخفيفة. وثانياً إن يبقى عينك عالحاجة خاصة لو حد ما تعرفهوش.
  • لازم تتفق مع الصنايعي قبل الشغلانة. معظمنا ما بيعملش كدة وبيسيبها للظروف. ودايماً لو تاخد بالك بيحصل ظروف تخليك حاسس إنك المفروض تدفع رقم أكبر من اللي كنت ناوي تدفعه. إتفق معاه الأول وبعد الشغل لو حاسس إنك المفروض تديله أكتر، إنت حر.
  • بالنسبة للصنايعي اللي داخل يصلحلك حاجة في بيتك. لازما حتما ولابد تخبي أي حاجة ليها قيمة من الشقة. هو مش هايسرقها وهو واقف ساعتها (حتى لو إنت مش واقف معاه). إنمـا معظم السرقات اللي متخططلها كويس بيبقى فيه صنايعي دخل المكان قبلها بيومين (حرّص ولا تخوّن).
  • في ناس بتتقي ربنا دور عليها جامد. ولما تلاقي حد عنده مهارة وأمانة ماتبخلش عليه بالمصنعية وتعمل حويط. إمسك فيه بإيدك وسنانك وإكرمه ربنا يكرمك.
  • لو مضطر تختار بين صنايعي شاطر وغالي وبين صنايعي رخيص بس على قده. اختار المهارة في الحاجات اللي هي حياة او موت زي حاجات معينة في العربية (الفرامل، والعفشة والكاوتش). الموتور لو باظ العربية مش هاتتقلب بيك!
  • وتختار المهارة برضه في التأسيس (زي تاسيس الشقة) لأنها حاجات هاتتعمل مرة واحدة في الحياة. سلوك الكهربا والرمل اللي تحت السيراميك ومواسير السباكة اللي في الحيطة. الحاجات دي لو اتعملت غلط هاتكلفك كتير جداً جداً بعدين. سواء عشان الحاجة بتغلى أو سواء عشان الحاجات التانية اللي هاتبوظها معاها.

عن الكاتب

أحمد الفرماوي