العيال

8 نصائح تساعد فى علاج تأخر الكلام عند الأطفال

كل أم بتستنى أول كلمة للطفل بفارغ الصبر تأخر الكلام عند الأطفال ممكن يصيبك بالقلق و الأحباط.
بس برده ممكن يكون السبب طبيعى: لو كان الطفل الأول أو وحيد و الأب و الأم مش بيتكلمه معاه كتير .
أو مش بيكلموا مع بعض قدامه كتير فطبعا لما يبقى مش بيسمع و مش بيشوف حوار هيتكلم و يقلد أزاى؟

و ممكن يكون السبب عضوى أو نفسي نتيجة معاناة الطفل من نوع من أنواع الاضطرابات النفسية ذى التوحد أو فرط الحركة و غيرها.

كل طفل ليه طبيعته فمينفعش تقارنيه بأطفال العيلة وبذات البنات لأنهم بيتكلموا أسرع.

كمان فى حاجات بتسبق الكلام وتأخره ذى أن الطفل يمشى بدرى جدا أو التسنين برده ممكن يأخر الكلام.

عشان كدا كل أم لازم تتابع تطور طفلها اللغوى و تتعرف على جدول تطور اللغة و عمر الطفل.

المتابعة مع دكتور أطفال عشان نتأكد من تطور نمو الطفل صح يعنى نطمن على وزنه و طوله و تطوره اللغوى مناسب لسنه أم لا.

أيه أسباب تأخر الكلام عند الأطفال؟

أسباب عضوية:

  • الولادة المبكرة : ممكن تكون سببت مشاكل للطفل بتظهر وقت الكلام .
    كمان ممكن دخول الطفل لفترة طويلة يخليه يعانى بعد كدا من تأخر الكلام.
  • اللسان المربوط : فى أطفال كتير بتتولد ولسنها مربوط من حرفه بنسيج فى الحلق من تحت فبتخلى الكلام يتأخر أو يكون مش واضح عند الأطفال.
  • مشاكل السمع: و دى بتبان لما تلاقى الطفل مش بيستجيب للأصوات فممكن نعمل كشف لمستوى السمع.

الأسباب النفسية :

الأطفال بتتعرض لحاجات كتير قوى تتعب نفسيتهم من و هما لسا فى بطن الأم.
الخلافات و الخناقات اللى بتغير هرمونات الأم وهى حامل لوحدها ممكن تسبب مشاكل نفسية و عضوية كتير للطفل.
كمان الطفل حتى و هو رضيع بيحس بكل اللى بيدور حوله و بيتأثر بالبيئة النفسية من حوليه.
و ده ممكن يخليه يعانى من نوع من أنواع الاضطرابات النفسية ذى التوحد أو فرط الحركة و غيرها.

  • مشاكل التخاطب: عند الأطفال يعنى فى حالات بيتأخر فيها الكلام و حالات تانية بيكون بيتكلم كويس و بعدين يبطل يتكلم فجأة.
  • التأتأة: و مشاكل التأتأة تلاقى الطفل مش قادر ينطق الحروف صح.
    ساعات بتكون نتيجة خوفه من شخص معين أو حزنه من فقد فرد من العيلة .
    مهما كان صغير و مش فاهم إلا انه بيحس ان حد بيحبه مبقاش موجود.
  • مشاكل أزدواج اللغة:

انه عايش فى بلد أجنبى و ممكن لو الأب أو الأم من جنسية أجنبية ده ساعات بيسبب له مشاكل فى الخطاب أو لا عادى بتفرق من طفل لتانى.

8 نصائح تساعد فى علاج  تأخر الكلام عند الأطفال 

  1. أجذبى انتباه طفلك دايما عن طريق ربط الأصوات بالكلام ذى أصوات الحيوانات و أسماءها.
  2. التعليم ب اللعب ذى أننا نلعب بالقطار ، الطيارة ، العربية و نقلد أصوات اللعب.
  3. كمان ألعاب المنتسورى بتساعد الطفل على التركيز و تنمية مهاراته الحسية و كمان مهارات الكلام.
  4. خلى انفعالتك ليها أصوات ذى برافو ، هايه للفرح و غيرها من التعبيرات.
  5. ربط الكلمة بحركة الجسم ذى أنه يحرك أيده و يقول باى ، لكمة لا مع حركة صباعك .
  6. أعتبرى كل حاجة بنعملها سوا جلسة تخاطب يعنى لو بتطبخى خدى معاكى المطبخ و عرفيه على الأدوات و بنعمل بيها أيه.
  7. كلميه باستمرار لأنه حتى لو مكررش دلوقتى عقله بيخزن و هتلاقيه بعد كدا بيقول حاجات كتير قوى.
  8. عرفيه المجموعات المعرفية عشان تساعدى جلسات التخاطب و ده بمجموعات كروت بضم :
    الفاكهة
    الخضار
    الحيوانات المزرعة و الحيوانات المفترسة.
    الألوان
    أدوات المدرسة
    المعكوسات سخن ، ساقع و طويل ، قصير و غيرها.
    علاقات الأشياء القلم الرصاص و الأستيكة، فرشاه الأسنان و المعجون و غيرها.
    بعد كدا نبدأ بالجمل القصيرة و بالتدريج ندخل الجمل الكبيرة.

كل دى نصائح للأم لكن طبعا متغنيش عن الكشف عشان نعرف حالة الطفل و نبدأ مرحلة العلاج.
و كل ما أبتدينا بدرى يكون أحسن بذات لو أكتشفنا الحالة قبل سن المدرسة لأن ده هيخلينا نقطع شوط كبير قبل قلق تقديمات المدارس و ده هنتكلم عنه فى مقالات تانية .

ابعتولى أمتى ابنك أتكلم ؟! 

عن الكاتب

نهلة شعلان