ازاى الضغط النفسى ممكن يأثر على بشرتك ويسبب حبوب؟

213

الضغط النفسى والقلق المبالغ فيه ممكن يغير من كيميا الجسم والعقل، وده ممكن يأثر على بشرتك ويسبب ظهور حبوب على البشرة. القلق كمان ممكن يخلي بشرتك تعجز أسرع وتظهر عليها شوية تغيرات زى:

  •  ان البشرة تبقى جافة اكتر وبيحصل فيها تجاعيد وخطوط، القلق كمان بيخلى شكل البشرة شاحب ومجهد، ودة بيحصل نتيجة نقص انتاج الكولاجين والهايلرونيك اسيد في البشرة، وكل دة بيحصل من ارتفاع مستوى هرمون الكورتيزول وهو الهرمون الأساسي اللى بيفرزة الجسم نتيجة القلق، والهرمون دة بيرتفع جدا بعد مرور الشخص بفترات من القلق الشديد والضغط العصبي.
  • القلق كمان ممكن يتسبب في انه يخلى البشرة تتعرض لشيخوخة مبكرة بسبب زيادة مركبات كيميائية ضارة في الجسم.
  • وكمان العادات الغير صحية وقت التعرض للقلق والشغل لساعات طويلة متواصلة واضطراب النوم والنظام الغذائي الغير صحي وشرب مشروبات فيها كافيين كتير والتدخين ممكن يتسبب في انتفاخات تحت العين ويخلى البشرة مظهرها شاحب ومرهق، حتى البشرة اللى فيها حبوب شباب بتفقد لمعانها وبتبقي باهتة وتعبانة.

القلق بيعمل جفاف في البشرة

  • لما الجسم بيكون تحت ضغط وقلق لفترة طويلة، بيزيد معدل افراز هرمون الكورتيزول في الدم وبيزيد الادرينالين في الجسم، وبالتالي بيزيد التعرق بصورة ملحوظة، ودة بيخلى الجسم يفقد كمية مياه كبيرة في وقت قصير وبالتالي بيتعرض للجفاف، خاصة إذا كان الشخص مش بيشرب مياه بكميات كافية.
  • الكورتيزول كمان بيعطل انتاج الجسم لحمض الهاليرونيك (ودة مادة كيميائية بينتجها الجسم بشكل طبيعي عشان تساعدة على الاحتفاظ بالمياه اللى بتقوم بتليين الانسجة الداخلية للجسم) وعشان كدة البشرة بتجف جدا.
  • الأيام اللي الشخص بيكون الشخص مضغوط او قلقان زيادة، ممكن ينسى يهتم ببشرته وينسى يحط مرطب، ودة ممكن يضر البشرة ويأجل عملية التقشير الطبيعي الدورية اللي بتحصل للبشرة، ودة ممكن يتسبب في ظهور حبوب الشباب خاصة لأصحاب البشرة الحساسة.

زيادة دهون البشرة الدهنية نتيجة القلق

  • على الرغم من ان القلق بيتسبب في زيادة جفاف البشرة الحساسة والجافة الا انه بيزود انتاج الدهون في البشرة الدهنية، ودة بيخلى مسام البشرة تتسد ويطلع فيها حبوب الشباب، وزى ما قلنا قبل كدة زيادة تعرض الشخص للقلق بيدفع الجسم انه ينتج كميات كبيرة من الكورتيزول في مجرى الدم، ودة بيخلى الغدد الدهنية تفرز دهون اكتر.
  • زيادة القلق كمان ممكن تتسبب في بطء عملية التئام الجروح، بسبب ان هرمونات اللي الجسم بينتجها وقت التعرض للقلق بتعطل عملية التئام الجروح الطبيعية اللي الجسم بيقوم بيها.

والأبحاث اكدت ان كثرة التعرض للقلق بيخلى الجسم يعمل استجابات كيميائية كتيرة بتضر الجسم والبشرة بشكل عام، ولازم تاخد بالك وقت العصبية إنك متشدش جلدك او تمسك بشرتك بعصبية عشان ده ممكن يضر بشرتك ويسبب عدوى او ندوب في البشرة.

ازاى أقدر امنع ظهور الحبوب في البشرة بسبب القلق؟

الجمعية الامريكية للأمراض الجلدية بتوصى بضرورة معالجة أسباب التوتر والقلق من الأساس لتقليل آثارها السلبية على البشرة، اقرا المقالة دى عشان تفهم اكتر عن اضطراب القلق العام، ودة ممكن يقلل من ظهور حبوب الشباب اللى بتظهر غالبا نتيجة القلق.

  • بالنسبة لبعض الناس انهم يخصصوا وقت هادى للراحة كل يوم ده ممكن يقلل القلق عندهم جدا.
  • ممكن الوقت الهادي ده يكون تمشية حوالين البيت، او التأمل او سماع موسيقى هادية او أي نشاط بيحبوة لتقليل القلق والتوتر، ودة بيخليهم يستمتعوا اكتر بالنشاط ده مع نفسهم، وممكن مدة الراحة دي تكون مجرد دقائق مش اكتر من كدة.
  • الأكل الصحى وتجنب الاكل الجاهز والاطعمة المصنعة هيساعد جدا فى الحصول على صحة احسن وبالتالى بشرة نضرة اكتر، حاول تقرأ المقال دة عشان تعرف اية الصح والغلط فى أكلنا وعلاقتة بالاكتئاب وتقلب المزاج.

ومع تقليل القلق حاول كمان تعمل الحاجات دي عشان تهتم ببشرتك

  • اهتم بتنظيف وتقشير البشرة، لأن ده هيزيل أي أوساخ او زيوت زيادة جوا البشرة وبالتالي هيقلل فرصة ظهور حب الشباب.
  • ممكن تستخدم ادوية هتساعدك كتير فى علج الحبوب، حمض السالساليك والبنزويل بيروكسايد من اكتر المكونات النشطة المستخدمة لعلاج حب الشباب، وببنصحك تستشير طبيب امراض جلدية عشان يحددلك الدواء المناسب ليك لعلاج حب الشباب.
  • الليزر بقى هو الحل المثالى، في بعض الحالات بيكون العلاج بالليزر الاحترافي هو اكتر علاج فعال لعلاج الندبات اللي بتحصل نتيجة حبوب الشباب، والليزر كمان بيكون فعال جدا في علاج مشاكل جلدية تانية زي البقع والتصبغات.

الدراسات العلمية اثبتت أن 30% من الامراض الجلدية بتحصل بسبب مشاكل نفسية، وفى علاقة طردية بين تدهور الحالة النفسية والامراض الجلدية، يعنى كل ما تكون نفسيتك سيئة هتكون معرض اكتر للإصابة بالأمراض الجلدية، عشان كدة لازم تدور على الأسباب اللى بتقلقك وتتعبك نفسيا وتحاول تعالجها وتطور مهاراتك عشان تقدر تواجهها، بننصحك تقرأ المقال دة عشان هيساعدك كتير فى علاج الاكتئاب بدون أدوية.

ويا ريت كمان تحاول تعمل شوية رياضة لأنها هتساعدك على افراز الاندروفين في الجسم ودة هيقلل التوتر عندك بنسبة كبيرة، بلاش تاخد دش بمياه سخنة مولعة وبلاش الصابون اللى فيه كيماويات، رطب بشرتك دايما بعد الدش على طول، وحط واقي شمس مع عامل حماية مش أقل من 15 SPF عشان تحمى بشرتك من أشعة الشمس الضارة، واهتم بنظام غذائي صحى غنى بالفاكهة والخضار واشرب مياه كتير طول اليوم.

اترك تعليق