اية الفرق بين الغضب والعدوانية؟

اية الفرق بين الغضب والعدوانية؟
70

الغضب هو مشاعر عادية جدا وطبيعية كلنا مرينا بيها في مواقف كثيرة في حياتنا، والغضب أحيانا ممكن يكون مخيف جدا سواء بالنسبة لينا أو للأخرين، لأنه ممكن يتسبب في أفعال وسلوكيات متهورة وغير عقلانية، أما بقي العدوانية فهو سلوك مرتبط بالغضب، وممكن الأشخاص أثناء الغضب يتحولوا لأشخاص عدوانين.

الغضب

أولا لازم نعرف ان الغضب مش دايما حاجة وحشة، لأن في كثير من الأحيان الغضب لما تشوف ظلم واقع على شخص او تشوف تصرف غلط، بيكون الغضب إيجابي، لكن المهم ان الغضب لا ينتج عنه أفعال أو تصرفات متهورة، وعشان تقهم أكثر عن العصبية ممكن تقرأ مقال الأسباب النفسية والجسدية للعصبية.

وبنلاقى ناس طبعها بيميل أكثر للغضب نتيجة أي تصرف يبدو طبيعي او عادى، فى حين انه غالبا بيكون غضب بلا سبب، والناس اللي بتميل للغضب دي غضبها ممكن يستمر لفترات طويلة، وفى الحالة دي الأشخاص دول بيكونوا في حاجة للمساعدة سواء من المحيطين بيهم او من المتخصصين عشان يقدروا يسيطروا على غضبهم، ومن أهم النصائح اللي ممكن تساعدك إنك تتحكم في غضبك:

  • فهم دوافع غضبك.
  • معرفة الأسباب والمحفزات اللي بتوصلك لمشاعر الغضب والعصبية.
  • تعلم أساليب تساعدك على تهدئة نفسك، زي مثلا الاسترخاء والتنفس ببطء، أو بعض التمارين البسيطة، أو حتى اتعود تعد من 1 ل 10.
  • البحث عن طرق مناسبة تعبر بيها عن غضبك، زي النقاشات، او التركيز على إيجاد حلول للمشاكل، او الحصول على الوقت الكافي للتفكير في هدوء.
  • ممكن تقرأ المقال اللى بيتكلم عن طرق التغلب على العصبية، هيساعدك كتير انك تسيطرعلى عصبيتك.

العدوانية

العدوانية موضوع معقد الى حد كبير، وفى بعض الأحيان السلوكيات اللي ممكن ناس تشوفها على انها سلوكيات حازمة، في ناس تانية ممكن تعتبرها سلوكيات عدوانية، وفى بعض النصائح اللي ممكن تساعد على التحكم في العدوانية زي:

  • ضبط النفس ومحاولة السيطرة على الغضب.
  • التعود على الاستماع للآخرين وتقبل الآراء المختلفة.
  • تعلم التواصل بإيجابية مع الأطراف الأخرى.

الوجه الثاني من الغضب والعدوانية (الاعتدال والحزم)

لو افترضنا ان في عملة ليها وجهين، وجهها الأول هو العصبية والعدوانية، تفتكر هيكون اية هو الوجه الثاني ليها؟ او بمعنى آخر أزاي تكون “مش عصبي” “ومش عدواني”؟؟؟؟

الأشخاص البعيدين عن العصبية والعدوانية غالبا بيكونوا أشخاص بيتميزوا باللطف، سهل التعامل معاهم، والأشخاص اللي بيتمتعوا بالصفات دي غالبا بيتصفوا “باعتدال المزاج”، والأشخاص دول هتلاقيهم غالبا متوازنين جدا من الناحية العاطفية ويتميزوا بضبط النفس، ونادرا ما يغضبوا او يتعصبوا إلا إذا كان الموقف يستحق الغضب فعلا.

أما بقي الحزم فهو مش عكس العدوانية أبدا، لكن الأشخاص الحازمون بيميلوا الى انهم يدافعوا عن أنفسهم وعن غيرهم من غير أي سلوكيات سلبية او عدوانية، وبيقدروا يكونوا هادئين حتى تحت الضغط، وبيقدروا يوصلوا وجهة نظرهم من غير ما يتعصبوا ولا يزعجوا الآخرين.

اترك تعليق