ليه بننام؟ وايه اللي بيحصل وإنت نايم؟ وإزاي تستغل وقت النوم؟

كتير من الناس فاكرة إننا بننام عشان مخنا يفصل ويستريح فـ يعرف يشتغل تاني يوم وفي الحقيقة إن المفهوم ده غلط والعكس تمامًا هو اللي بيحصل. لأن وانت نايم عقلك يمكن بيبذل مجهود أكبر من وإنت صاحي من غير ما تحس. اللي بيحصل في النوم إنك بتفقد جزء كبير من الإحساس بحاجات ومنهم الإحساس إن عقلك شغال أصلًا.. لكن ده ما يمنعـش إنه شغال.

عشان كدة جسمك بيستهلك أوكسجين أكتر وإنت نايم.. ونفسك ممكن يضيق بسهولة لو الأوضة مش متهوية كويس أو فيهـا زرع كتير بيمتص الأوكسجين ده.

أولًا إحنا ليه بننام؟ و ليه الجسم محتاج ينام؟

هو أينعم الإنسان ممكن يقعد صاحي حوالي 10 سنين من غير ما ينام ومن غير ما يموت زي ما الدراسة دي بتقول .. (ماتحاولش تجربهـا لأن في ناس ماتت بعد فترة أقل من دي بكتير) إنما اللي إحنا متأكدين منه إن النوم مُهم جدًا للدماغ وللجسم ومن غيره نموت. ومش إحنا بس معظم الكائنات الحية تقريبًا كدة.

يعني فيه مرض عصبي إسمه الأرق الوراثي المميت بيبدأ إن المريض بيفقد القدرة على النوم بسهولة، ثم بيفقد القدرة على النوم أصلًا، ثم بيفضل صـاحي لحد ما الأرق يقتله.

اللي إحنـا متأكدين منه كمـان، إن النوم مهم جدًا للدمـاغ -بغض النظر إنهـا مابتفصلش وإنت نايم، بل بالعكس بتشتغل أكتر– وده لأن المخ بيشتغل بنفس الطريقة اللي بشتغل بيها وإنت صاحي إنمـا بدون تدخل حواسك الخمسة. والهدف ورا القصة دي إن المخ يقدر يعمل فلترة.. فـ ينظم الأفكار والمعلومات اللي دخلتله على مدار اليوم ويقدر يصنفهـا ويركز على المهم منهـا ويرمي اللي مش مهم.

وده يفسر ليه الأطفال محتاجين يناموا أكتر. لأنهم بيخشلهم معلومات كتير جدًا في اليوم الواحد ومخهم محتاج فترة أطول عشان ينظم الأفكار دي ويستفيد منها.

وبرضه ده يفسر ليه المعلومات اللي ذاكرتها قبل النوم على طول بتثبت أكتر وبتفتكرها أسهل في الامتحان.

إنما الحقيقة إنك وإنت نايم الحواس الخمسة ما بتبقـاش واقفة تمامًا .. إنمـا تقدر تقول كدة استجابتهـا أضعف بكتير من وإنت صاحي.. وده يفسر إنت ليه بتصحى من صوت المنبه بتاعك أو لما حد ينده إسمك.. أسهل من إنك تصحى على صوت دوشة في الشارع أو تليفزيون في البيت.

رنة المنبه”، واسمك حاجات مميزة جدًا بالنسبة لودنك اللي هاتلقطها بسهولة بدون الحاجة لبذل المجهود اللي بتبذله الصبح، عشان كدة سهل جدًا إنك ما تصحـاش لما تغير نغمة المنبه بتاعك.

إحنا كمـان متأكدين إن النوم مُهم جدًا للجسم – مش الدماغ – بس لأنهم اكتشفوا إن جهـاز المناعة بيشتغل بأقصى طاقته وانت نايم.. مش بس بيشتغل وإنمـا بيقوم بتكوين الأجسام المضادة اللي بتحارب الأمراض كمـان.. وده يفسر ليه قلة النوم ممكن تخليك تعيا بسهولة.. أو ليه التطبيق ممكن يخليك تاني يوم حاسس إنك بردان أكتر من العادي.. وهكذا..

3 حاجات مُهمة جدًا بتحصل وانت نايم:

  • جسمك بيقوم بعملية تنضيف وأكسدة كاملة وده بيفسر ليه كتير بنصحى من النوم محتاجين نخش الحمام.
  • كل المعلومات اللي مش مُهمة بتتطلع من دماغك عشان تفضي مكان للمعلومات أهم إنها تثبت.
  • عملية صيانة كاملة بتحصل للخلايا بتاعت جسمك كمان مش خلايا المخ بس.

اضطرابات النوم و الأرق وتأثيرهم عليك نفسيًا وجسديًا

  • معدل استجابتك ووعيك كمان هايقلوا جـامد وده ممكن يأثر عليك في الشغل والسواقة وكل الحاجات اللي بتعملها محتاجة لتركيز
  • معدل تركيزك بيقل طبعًا لأن الجسم والعقل ماخدوش وقتهم عشان يستريحوا من اللي اليوم اللي قبله
  • انخفاض التركيز والاستجابة والوعي بيخليك حساس أكتر للي بيحصل وده ممكن يعملك مشاكل مع الناس لأن الحاجات هتاخد أكتر من حجمها.

مُتخيل إيه اللي ممكن يحصل لو ماقدرتش تخلي مخك يفلتر بين معلومة مُهمة “زي إسم حد اتعرفت عليه النهاردة” ويثبت المعلومة دي دماغك.. وبين معلومة مش مُهمة “زي عدد التكييفات اللي في العمارة اللي قدامكو” فاترميها في الزبالة؟

4 حاجات ممكن تعملها وانت نايم

مين قال إن النوم عبارة عن وقت ضايع؟ أيوا عرفنا إن النوم مُهم للجسم والدماغ وعرفنا فوايد النوم والتأثير الإيجابي للنوم الصحي على حياتنا.. لكن تعرف إن في حاجات كتير ممكن تعلمهـا وإنت نايم تخليك تستفيد أكتر تاني يوم؟

  • اقرا حاجة قبل النوم (كتاب، قصة، حاجة في الشغل، الخ..) لأن الذاكرة بتشتغل بطريقة أحسن بكتير لما المعلومات تخش دماغك قبل النوم على طول وده هايخليك تنمي إبداعك وهايحسسك بفرق لما تصحى.
  • فكر في مشكلة محيراك قبل النوم: اتفقنا إن دماغك بيشتغل بالليل بطريقة أقوى من الصبح، وارد تصحى تلاقيلها حل، أو صرفة، أو حاجة برة الصندوق تخليك تعرف تتعامل معاها.
  • انتهز الأحلام الواعية أو الـ Lucid Dreaming: اللي هو الحلم اللي انت بتحلمه وعارف إنك بتحلمه ده. ماتقومش نفسك من النوم وانتهز الفرصة إنك تستغله إنك تعمل أي حاجة، طير، جرب حاجات جديدة، وهكذا.. ده بيشجعك على الإبداع بشكل كبير.. غير إن الحلم نفسه بيبقى كوميدي جدًا.
  • عشان جسمك ودماغك يستفيدوا من النوم: امنع موبايل وتليفزيون قبل النوم بساعة، ووقف كافيين بعد 6 بالليل، بلاش تتقل في العشا، حاول الأوضة تبقى ضلمة على قد ما تقدر، وهدوء على قد ماتقدر، نام واصحى في معاد ثابت كل يوم.
اترك تعليق