البزرميط العيال

ألعاب المنتسوري … جربيها مع ولادك و أكيد هتكسبي

المنتسوري

أتفقنا قبل كدا على أهمية التعليم باللعب للأطفال عشان نتطور قدرتهم و مهارتهم على التعلم .

تعرفى أيه عن ألعاب المنتسوري ؟

دى طريقة مهمة جدا و فعالة للتعليم باللعب بدأتها مربية إيطالية أسمها “ماريا مونتيسوري” و هى مربية و طبيبة و فيلسوفة

و أبتكرت مجموعة من الألعاب بتساعد على تنمية مهارات الطفل الإدراكية كمان بتعتمد على تفاعل حواسه مع البيئة.

 النظام ده بيقدملنا ألعاب تساعد على تطوير عقل الطفل من بداية إدراكه لحد سن 18 سنة .

هو   دلوقتى بيستخدم فى العالم كله سواء مع أطفال طبيعين أو بيعانوا من أضطرابات زى التوحد ، فرط الحركة و كمان مع متلازمات مختلفة .

طبعا أول ما بنقول ألعاب المنتسوري كلنا بيجى فى دماغنا شوية اللعب الخشب الغالية .

بس أيه رأيك لو عملنا حاجات ذي ألعاب المنتسوري فى البيت  ؟!

فنبقي أستفدنا بالنشاط الحسي للتعليم بدون التكلفة العالية كمان فى ألعاب أسعارها معقولة ممكن نستخدمها.

أنشطة منتسوري تناسب طفلك من سن 1.5 : 6 سنوات

تصنيف الزراير ” من 2 :5 سنوات

هنحتاج مجموعة أزرار ملونة كل مجموعة تكون متشابها ام بالشكل أو اللون أو الحجم فى طبق و كمان شوية أطباق صغيرة .

الأول نلخبط كل الأزرار على بعض و نطلب من الطفل أنه يصنفهم فى الأطباق الصغيرة حسب اللون أو الشكل.

تجميع علب متدرجة الجحم من 1.5 : 3 سنوات

بنحضر مجموعة متدرجة بحسب المقاس من اى حاجة تتوفر عندك فى البيت حلل ، صواني أو علب بلاستيك و بنساعد الطفل يرصهم جوه بعض أو فوق بعض .

ده بدل لعبة منتسوري أسمها ” البرج الوردى” بس طالما أحنا فى البيت هنستخدم الموجود عندنا و يأدى الغرض.

البازل البسيط

و دى لعب متوفرة فى كل مكان و يا ريت تدورى على الخشب مش الورق المقوى لأنها بتستحمل أكتر أستخدام الولاد .

كمان يكون أحسن لو جبناها بالشكل اللى يحبه أبنك عندك الحيوانات ووسائل المواصلات و غيرها.

لو الطفل تحت سن 4 سنين يفضل لو البازل له ماسك فى كل قطعة.

ألعاب الذاكرة

دى متوفرة فى السوق بسعر معقول كمان ممكن تعمليها فى البيت من الكتب المصورة القديمة.

لعبة جميلة بتساعد ولادنا على التركيز و بتنمى الذاكرة ممكن نختار 3 كروت و نفرجهم للطفل و بعدين نقلبهم و مشوف هو فاكر أيه .

كمان ممكن نرص شوية كروت و نديله كرت واحد فى أيده ونخليه يدور على الصورة المتشابهه.

تطابق الألوان

متوفرة بقطع خشبية فى ألعاب المنتسوري و كمان ممكن تعمليها فى البيت بسهولة.
شوية ورق مقوى و مشابك ملونة أو مشابك خشب بأستيكر ملونة.

و طبعا لازم تكون الكروت كلها بنفس الشكل و المقاس و الأختلاف فى اللون فقط.

ممكن نطبع الألوان من الكمبيوتر بتدريجاتها بنستخدمها فى لعبتين أو حتى نستخدم لوحات ألوان الدهان من المحلات.

  • لعبة تطابق مع المشابك مع الكروت بحسب درجة اللون.
  • لعبة ترتيب درجات كل لون على حدى نبدأ بلون واحد بدرجاته و بعدين نزود بالتدريج.

لعبة اللضم من 2.5 : 6 سنوات

بتساعد الطفل يتحكم فى عضلاته و تعالى مستوى التركيز عنده.
سهل جدا عملها فى البيت بشوية خرز و حبل من بتاع الأكسسوار و يحاول يلضم الخرز.

و كل ما كان الطفل صغير هيحتاج حجم الخرز كبير و الفتحة بتاعته كمان كبيرة بالذات فى الأول.

بعد كدا ممكن نتنقل لمرحلة أصعب لما نستخدم خرز أصغر بفتحات أصغر.

و غيرها من الأنشطة اللى هنعرضها مع بعض فى الفترة اللى جاية عشان تنمى عقل الطفل و تفتح مداركه.

جربى هتفيد الطفل جدا سواء كان بيعانى من إضطرابات نفسية أو طفل طبيعى كمان أسألى عن الحضانات اللى بتسخدم طريقة المنتسوري فى التعامل مع الأطفال.

جربى لعبة من الألعاب دي و ابعتيلى رأيك و رأى طفلك.

عن الكاتب

نهلة شعلان