ازاى تتعامل مع الضغط النفسي في الشغل

44

مش معنى إنك بتشتغل بضمير إنك لازم تفضل مضغوط نفسيا وعصبيا طول ما انت في الشغل، طبيعي أي حدد فينا بتعدى عليه فترات من الضغط العصبي والتوتر في شغلة، سواء عشان مرتبط بمواعيد تسليم شغل معين او عشان الشغل كتير وصعب، بس استمرار الضغط العصبي في الشغل كل الأوقات ممكن يعرضك لأضرار جسدية ونفسية كتيره.

وفى أبحاث كتيره اكدت ان اغلب الناس بتعان من ان الشغل هو مصدر ضغط عصبي أساسي في حياتها، ممكن متقدرش تمنع الضغط العصبي اثناء الشغل، بس لازم تتعلم شوية حاجات تخليك تقدر تتعامل معاة صح عشان ميأثرش عليك وعلى صحتك.

أهم أسباب الضغط النفسي في الشغل

في حاجات أساسية في أي مجال شغل ممكن تخلى الشخص حاسس بضغط عصبي شديد وهي:

  • المرتب القليل.
  • ضغط الشغل المبالغ فيه.
  • فرص الترقي قليلة.
  • الشغل ممل ومفيهوش جديد.
  • مفيش دعم من الناس المحيطة.
  • مفيش سلطة كافية لاتخاذ القرارات المهمة.
  • المطالب المبالغ فيها والتوقعات العالية جدا من الرؤساء.

إيه اللى ممكن يحصلك لو مقدرتش تسيطر على الضغط النفسي في الشغل

ضغط الشغل مش بينتهى لما تروح البيت، بالعكس ده بيفضل معاك طول اليوم ولو الضغط دة زاد عن حدة ممكن يأثر على حياتك وصحتك، دة كمان ضغط الشغل ممكن يعملك اعراض جسمانية زي الصداع المستمر او ألم المعدة او النوم المتقطع وتقلب المزاج وصعوبة التركيز، غير كدة كمان دة ممكن يأثر على حالتك الصحية ويعملك مشاكل صحية زي الاكتئاب او السمنة او أمراض القلب، واللى بيزود المشكلة عند أغلب الناس انهم بيتعاملوا مع المشكلة غلط زى انهم بيأكلوا كتير او ياكلوا اكل غير صحى او يدخنوا بشراهة او يتعاطوا الكحول والمخدرات معتقدين ان دة هيساعدهم ويقلل الضغط العصبي عليهم.

خطوات عملية هتساعدك تتخلص من الضغط النفسي في الشغل

  • راقب المواقف اللي بتضغطك نفسيا: لازم تتابع احساسك بالضغط العصبي لمدة أسبوع او اثنين وتكتب في نوتة اية اكتر المواقف او الحاجات اللي حسستك بالضغط والتوتر ورد فعلك عليها كان اية، ومتنساش تسجل افكارك واحاسيسك في المواقف دي واهم المعلومات عن البيئة المحيطة بالموقف بما فيها الأشخاص والظروف وطريقتك ورد فعلك في كل موقف، لأن كل ده هيساعدك تحدد بالظبط تحدد الحاجات اللي بتضغط عليك نفسيا في الشغل وتحدد رد فعلك عليها.
  • حاول تطور ردود فعلك بطريقة صحية: يعنى مثلا بدل ما انت بتحارب الضغط النفسي بالأكل السريع الغير صحى، حاول لما تكون متوتر تاكل اكل صحى اكتر، وممكن كمان تمارس رياضة بتحبها لان الرياضة من احسن الحاجات اللي ممكن تخلصك من التوتر، اليوجا كمان اختيار ممتاز، وياريت تخصص شوية وقت تمارس فيهم أي هواية بتحبها زي القراءة او حضور حفلات موسيقى او حتى انك لعب لعبة أوتقضى وقت مع اسرتك، حاول كمان تنام كويس وقت كفاية لان ده هيساعدك جدا تتغلب على الاجهاد وعود نفسك على عادات نوم صحية زي انك تبطل تشرب أي مشروبات فيها كافيين في وقت متأخر من اليوم، وانك تقلل استخدام الشاشات زي التليفزيون والموبايل قبل النوم بشوية.
  • حط الحدود اللي تناسبك في حياتك: خاصة انه بسبب التكنولوجيا اللي بقينا عايشين فيها بقي سهل جدا أي حد يوصلك في أي وقت في اليوم، يعنى مثلا بلاش تفتح ايميلك بليل ومتردش على التليفون بعد ساعة معينة في اليوم، كل الحاجات دي هتقلل من احساسك بالصراع النفسي وضغط الشغل طوال ال 24 ساعة في اليوم.
  • اشحن طاقتك: عشان نقدر نتجنب الإرهاق المزمن والاجهاد المستمر لازم ندى لنفسنا وقت نشحن فيه ونبعد عن الشغل خالص ومنفكرش فيه، عشان كدة بنقول لازم نحط حدود ونفصل عن مسئوليات الشغل في وقت معين في اليوم، متخليش اجازتك تضيع من غير ما تستمتع فيها، لازم تسترخي في الاجازة وتريح عشان تقدر ترجع الشغل وانت كلك طاقة ومستعد تقدم أفضل ما عندك للشغل، لو لقيت نفسك صعب تاخد إجازة دلوقتى مش مشكلة حاول تفصل بس شوية حتى لو كام ساعة تفصل فيهم تليفونك وتعمل حاجة بتحبها او تدلع نفسك.
  • اتعلم أزاي تسترخي: في حاجات هتساعدك على الاسترخاء زي التأمل او تمارين التنفس العميق، خصص كام دقيقة كل يوم تعمل فهم نشاط بسيط زي التنفس العميق او المشي او الاستمتاع بأكلة بتحبها، ومهاراتك في التركيز الهادف والاستمتاع بمهمة واحدة هتزيد مع التعود وهتقدر تمارسها في باقي جوانب حياتك.
  • أتكلم مع مديرك: كل ما كانت صحتك ونفسيتك أحسن هتقدر تنتج أفضل في الشغل، أتكلم أكتر مع مديرك مش عشان تشتكي من ظروف الشغل، لكن عشان تحطوا خطة مع بعض تخلى التعامل مع ضغوط الشغل أسهل وتساعدك تقدم أحسن ما عندك، ولازم يكون من ضمن أجزاء الخطة إنك تنمى مهاراتك في الشغل زي مهارة إدارة الوقت مثلا عشان تقدر تنجز احسن في شغلك، أو ممكن كمان تعمل تغييرات في مكتبك او مكان شغلك عشان تريحك اكتر وتقلل توترك وقت الشغل.
  • احصل على الدعم من الناس اللي حواليك: اتعود تقبل المساعدة من الناس اللي بتثق فيهم او من افراد عيلتك ودة هيساعدك تقلل من توترك في الشغل، لو استمر عندك إحساس الضغط الشديد من الشغل ده لازم تستشير دكتور نفسي هو هيقدر يساعدك بالطريقة اللي ممكن تتعامل بيها مع التوتر اثناء الشغل.
اترك تعليق