الصحة النفسية

السوشيال ميديا تُسبب القلق النفسي والـ FOMO وتؤدي إلى الاكتئاب

كتبها سها مطر

في دراسة انتشرت عن القلق والاكتئاب وضحت أن مستخدمى وسائل التواصل الاجتماعى أكثر عرضة للاكتئاب. وهى واحدة من الدراسات الكتيرة اللى ربطت بين وسائل التواصل الاجتماعى والقلق والاكتئاب. لكن ايه بالظبط اللى بتعمله منصات زى فيسبوك وانستجرام علشان تخلى الناس غير راضيين عن حياتهم؟ أحنا مش عارفين بالظبط، لكن دى بعض التفسيرات:

الاكتئاب هو حالة طبية خطيرة بتأثر على طريقة التفكير، الشعور والسلوك. وسائل التواصل الاجتماعى بتؤدى للاكتئاب عند الناس الأكثر عرضة للاكتئاب أو بتخلى أعراض الاكتئاب تزيد. المشكلة مش في وسائل التواصل الاجتماعى نفسها، لكن في طريقة استخدامنا ليها.

وسائل التواصل الاجتماعى كمان ليها دور كبير جدًا في تنمية متلازمة الـ FOMO وهو خوف الشخص المستمر من أن حاجة تفوته ومايعرفهاش.

علامات تبين أنك بتعانى من “اكتئاب وسائل التواصل الاجتماعى”

لو بتحس أن السوشيال ميديا ليها تأثير سلبى على حالتك المزاجية، يبقى أنت بتعانى من “اكتئاب وسائل التواصل الاجتماعى”، ودى أعراضها:

  • تدنى احترام الذات
  • الحوار الذاتي السلبى
  • المزاج المنخفض
  • الانفعال
  • عدم الاهتمام بالأنشطة اللى كنت بتستمتع بيها قبل كده
  • الانسحاب الاجتماعى

لو الأعراض دى عندك لأكتر من أسبوعين، ولو دى الطريقة اللى بتحس بيها أغلب الوقت، يبقى من المرجح أنك مكتئب. وعلى الرغم من أن “اكتئاب وسائل التواصل الاجتماعى” مش مصطلح معترف بيه طبيا، إلا أنها ظاهرة حقيقية بتأثر على 50% من المستخدمين. كمان لو حد عنده استعداد للاكتئاب والاضطرابات النفسية هيكون معرض أكتر للإصابة بالنوع ده من الاكتئاب.

وسائل التواصل الاجتماعى ممكن تضيع احترامك لنفسك

كلنا عارفين أن وسائل التواصل الاجتماعى والاكتئاب مرتبطين ببعض في حاجات، لكن ليه؟ استخدام وسائل التواصل الاجتماعى بيشوه تصوراتك عن حياة الناس حواليك وشخصياتهم. وعلشان نشرح أكتر، أغلب الناس بيحبوا يقدموا صور مثالية عن حياتهم، وصفاتهم الشخصية،ومظهرهم على السوشيال ميديا زى فيسبوك أو انستجرام. لو أنت خلط بين الصورة المثالية اللى بتشوفها والواقع، هيكون عندك انطباع غلط أن كل الناس أفضل منك، وده ممكن يسبب أن ميكونش عندك احترام لنفسك ويؤدى للاكتئاب. وده بينطبق أكتر على المراهقين وعلى الشباب اللى بيكونوا أكتر عرضة لمقارنة نفسهم مع الآخرين. لو أنت بتعانى من قلة تقدير الذات، والوهم أن كل الناس أحسن منك، فوسائل التواصل الاجتماعى أكيد هتعزز الشعور ده عندك.

التسبب في العزلة الاجتماعية وغيرها من المشاعر السلبية

سبب تانى شائع للتأثير السلبى لوسائل التواصل الاجتماعى على الصحة العقلية هو ارتباطه بالعزلة الاجتماعية. الناس اللى بتعانى من الاكتئاب بيكونوا أكتر عرضة لعزل نفسهم اجتماعيا وبيختاروا فقط التفاعل بشكل غير مباشر من خلال السوشيال ميديا. لكن التواصل عن طريق الانترنت بيميل أنه يكون سطحى جدا ومفيش مقارنة أبدا بينه وبين الحياة الواقعية. كمان وسائل التواصل الاجتماعى ممكن تخلى عندك مشاعر سلبية تانية زى الغيرة والحسد والكراهية والشعور بالوحدة وغيرها من المشاعر اللى بيؤدى لتفاقم حالة الاكتئاب.

ليه محتاجين ناخد الموضوع بجدية أكتر؟

نسب الاكتئاب واستخدام وسائل التواصل الاجتماعى بيرتفعوا جدا والاتنين بيأثروا على بعض، والمرهقين والشباب هم الأكتر عرضة للإصابة بالتأثير السلبى للسوشيال ميديا. علشان كده، لازم نبدأ نفكر في طرق صحية أكتر لاستخدام وسائل التواصل الاجتماعى.

نصايح حول استخدام وسائل التواصل الاجتماعى

على الرغم من أن النتايج مقدمتش شرح لسبب تأثير السوشيال ميديا فى الإصابة بالاكتئاب، لكن في أدلة كتيرة بثبت أن السوشيال ميديا مش وسيلة كويسة للتعامل مع الاكتئاب. للسبب ده، قدم كبار المؤلفين لدراسات علاقة السوشيال ميديا بالاكتئاب بعض الاقتراحات للأطباء والأشخاص ممكن يستفادوا منها.
أحد الاقتراحات كانت أن الأطباء يسألوا المرضى عن عادات استخدام السوشيال ميديا وكمان الوقت اللى بيقضوه في استخدامها علشان يقدروا يقدمولهم المشورة أنهم يغيروا نظرتهم لوسائل التواصل الاجتماعى ويقدمولهم طرق الاستخدام الصحيحة.
بعض المستخدمين بيكون عندهم إدمان للسوشيال ميديا، بيقضوا وقت كبير جدا في استخدامها وبيكون سلوك قهرى بيخليهم يحسوا بتأنيب الضمير وبالتالي الإصابة بالاكتئاب.

وجود علاقة غير صحية بوسائل التواصل الاجتماعى

لو حاسس أن علاقتك بوسائل التواصل الاجتماعى مش صحية، يبقى لازم تعرف الطرق الصحيحة لاستخدام السوشيال ميديا اللى بيقدمها خبراء علم النفس:

1- تجنب المقارنة الاجتماعية السلبية – لازم ناخد في الاعتبار أن الصورة اللى الناس بتقدمها عن نفسها وعن حياتها هي صورة مش واقعية، لكن أكيد هي صورة مثالية. كمان اتجنب أنك تقارن نفسك مع الآخرين لأن السلوك ده بيؤدى للحوار الذاتي السلبى وقلة الثقة بالنفس.

2- افتكر أن وسائل التواصل الاجتماعى مش بديل عن الحياة الواقعية – السوشيال ميديا بتديلك مساحة كبيرة للتواصل مع الناس من مختلف الأماكن، لكن مينفعش أبدا أنها تحل محل التفاعلات في العالم الحقيقى.

3- اتجنب الإفصاح عن المعلومات الشخصية – لسلامتك وخصوصيتك، خليك حذر من اللى بتنشره على الانترنت.

4- بلغ عن الناس اللى بيتسلطوا عليك أو بيضايقوك – من السهل أن أي حد يهدد الناس في العالم الافتراضى عن طريق وسائل التواصل الاجتماعى. متاخدش الأمور بصورة شخصية وبلغ عن اللى بيسيئوا استخدام السوشيال ميديا لمضايقة الآخرين.

النصايح دى ممكن تساعدك أن يكون عندك علاقة صحية في استخدام وسائل التواصل الاجتماعى. احرص دايما أنك تحط النقط دى في الاعتبار وأنت بتتعامل مع السوشيال ميديا. ولو أنت دلوقتى بتعانى من الاكتئاب، قول للدكتور بتاعك عن طريقة استخدامك للسوشيال ميديا علشان يقدملك بعض النصايح لو كنت محتاجها.

عن الكاتب

سها مطر