إيه اللي يخلي اتنين يرجعوا لبعض تاني بعد الطلاق؟

48

لو متفاجئ من العنوان وبتسأل وبتسأل نفسك ليه هو القُط بيحب خناقّه،، ده ما صدقت، وهكذا.. فنحب نقولك إن الأبحاث بتقول إن ١٥% من الأزواج بيرجعوا لبعض بعد الطلاق لأنهم بيلاقوا في جوازهم للمرة التانية اللي ملاقهوش أول مرة وعلاقتهم بتكون أحسن.

ولو لسة بتسأل إزاي ده ممكن يحصل، هنعرفك في المقال ده الأسباب دي:

إنهم اتغيروا

السبب الرئيسي اللي يخلي اتنين يرجعوا لبعض إنهم يكونوا غيّروا في نفسهم اللي بعدهم عن بعض أول مرة، ولإن الوقت بيعلم، فاللي بيحبوا بعض بجد بيستغلوا فترة البُعد في إنهم يشتغلوا على نفسهم عشان يرجعوا المياه لمجاريها، ولما بيرجعوا بيلاقوا ثمرة محاولتهم في إن التغيير يدوم لوقت أطول والعلاقة ترجع أحسن من الأول.

عندهم أمل

الحُب دايمًا بيولّد الأمل، واللي ممكن يرجع اتنين لبعض تاني هو رغبتهم وأملهم في إن كل حاجة تتحسن المرة دي ،لإن اللي بيحس الحُب والأمان مع حد بيحاول يحافظ عليه.

إنهم كانوا صغيرين وقت قرار الطلاق

الجواز في سن صغير لناس مش ناضجة كارثة، بيخلي قرارالطلاق زي اللبانة عندهم، وبعد ما يحصل فعلًا والبُعد يقرصهم بيفهموا إن الموضوع مكنش مستاهل وإن أكبر مشكلة واجهوها هي عدم وجودهم مع بعض وإن اللي حصل بينهم كان شئ مالوش دوا إلا رجعوهم تاني لبعض.

حلّوا مشاكلهم القديمة

في أوقات كتير بيكون الطلاق بسبب مشكلة واحدة أو مشكلة بعينها، فلو المشكلة دي اتحلت سواء كانت إن مراته كانت عايزة تخرج من بيت العيلة أو هو  مش عايز نكد مثلًاإزاي معرفش؟ والمشكلة دي اتحلت يبقى مفيش خلاص سبب للبُعد.

ولإن فيه ناس حُبها لشريكها واصل لمرحلة “أنا اللي فيا كوم وانت كوم وكفة، كُل العالم يهون بس الدنيا بينا تصفى”،فخلينا نقول إن أوقات مبيكونش فيه ولا سبب من اللي قولناهم، فيه بس حُبهم لبعض ،سواء اتغيروا أو لأ سواء دي حاجة كويسة أو لأ ،هو ده اللي هما محتاجينه أكتر من أي سبب وهو رجوعهم تاني لبعض.

اترك تعليق