سايكويكي

التوتر العصبي: قولون وحساسية وصداع وقصة كبيرة

صباحك توتر ، مسمعتش الجملة دى قبل كدا ؟!

كتير مننا سمع الجملة دى … من أصحابه الصبح قبل متدخل لجنة الأمتحان …. و يا سلام بقى لو رايح مقابلة شغل فى شركة بتنام و تقوم تحلم تشتغل فيها … و ده ممكن يبقى عادى بنحس بيه كلنا لكن لو كان شعور ملازمك على طول في أوقـات مش المفروض تتوتر فيهـا .. يبقى كدا إحتمال يبقى عندك توتر عصبى وقلق زيادة عن الطبيعي.

ايه هو القلق النفسي؟

التوتر العصبى Nervous Tension  هو حالة خوف جامدة قوى و معاها شوية أفكار سلبية….. من الأخر حد دايما متشائم و خايف يفشل فى أى حاجة بيعملها .

و طبعا فى ناس بتبقى اصلا غاوية توتر و عصبية يعنى عندها استعداد عشان طبعها كده … و فى ناس تانية بتتعرض لمواقف بتجبرها على انها تفضل متوترة دايما …. سواء بقى كان السبب شغل مشاكل فى البيت أو حاجات تانية كتير .

أعرف منين انى عندى توتر عصبي ؟!

التوتر النفسي من الحاجات اللى صعب نحس انه وصل لمراحل متأخرة ….. عشان بداياته عادية فمثلا لما تحس دايما ان الوقت مش مقضيك كأن حد بيجرى وراك …. مش محتمل الدشوشة و الرغي ….كمان مش مركز و مش متأكد أن المجهود اللى بتعمله ممكن يوصلك لهدفك .

ده كله حماده ….و اللى جاى حماده تانى خالص تخيل ان القلق ده ممكن يكون هو سبب للصداع اللى مجننك … ده غير القولون اللى عمرك ماشتكيت منه بس بقى أكتر حاجة معكننة عليك .

ده غير بقى وجع ظهرك و ضيق النفس اللى متعرفلوش سبب ….و لو الموضوع كبر هندخل فى مشاكل النوم …. و تقضى يومك مع القهوة والسجاير اللى هنزود التوتر العصبى .

و كمان هيبوظ علاقتك بصحابك واللي بتحبهم ؟

المشكلة أن العصبية و القلق هيخليك تخرج عن شعورك كتيررررر عشان كدا مش هتقدر تبقى Effective فى شغل ولا مع عائلتك .

راحة  البال Vs  التوتر العصبى 

اول حاجة لازم تعرف ليه انت متوتر؟ بسبب الشغل ،مشاكل فى البيت ، و ليه خايف دايما من الفشل ؟ …و نشوف المعالج النفيسى يقدر يساعدنا أزاى عشان نقلل أسباب التوتر ده

كمان العلاج الدوائى ممكن يساعد جنب جلسات المتابعة سواء فردية أو Group therapy اللى بتبقى نتيجتا كويسة قوى عشان تعرف ان دى مشكلة بيعانى منها ناس كتير و كمان فى ناس انتحسنت و قل التوتر عندها .

كمان ممكن تجرب تتعلم يوجا او نوع من رياضات الأسترخاء أو ال Therapy Meditation و ده ليه تمارين هتلاقيها فى كتب و مواقع كتير قووووى على النت.

كلها حاجات ممكن تسعدك تفك شوية ، تسترخى و تهدى أعصابك عشان تعيش حياة أحلى .

و طبعا التقرب من الله و الدعاء هيساعد على الهدوء و الإسترخاء ….. مفيش حاجة بتيجي بالساهل بس المهم أننا نحاول دايما نعيش أحسن …. متضيعش يومك فحاجات مش هتفرحنا…. عيش و جرب و أفرح و اتمتع بكل تجربه حتى لو مجبتش النتيجة اللى انت عاوزها بالظبط .

عن الكاتب

فريق بزرميط