العلاقات

الإدمان : ازاي تساعدي شريك حياتك في العلاج وترجعي علاقتكم سوية

الإدمان

الإدمان من أكثر المخاطر إلي بتأثر على حياة المدمن لوحده وحياته مع شريك حياته، علاقتك بشخص مدمن علاقة مؤذيه ليكي ولأولادك، مينفعش أبداً تفضلي ساكته ومتحمله، لازم تأخدي موقف وخطوات تخليه يوافق على العلاج، أو تنهي مأساتك أنتي وولادك وتخليه يعيش حياته لحد ما يفوق لوحده..

معاناة الزوجة إلي شريك حياتها بيعاني من الإدمان:

1- الشك :

  • على طول شاكك فيها وفي تصرفتها، خلصت الفلوس على أيه خرجت فين، كلمت مين، كل دا بسبب قلة ثقته في نفسه وعدم قدره على مواجهة الإدمان، علشان كدا

الحل : أوعي تحطي شكه في دماغك، دا خارج من إنسان غير مسؤول عن نفسه، أنتي زي الفل

2- الأذى :

  • سواء الأهانة اللفظية أو الجسدية لما بيفقد وعيه

الحل : أتعلمي دفاع عن النفس ومتسكتيش على ضربه ليكي، دافعي عن نفسك، وخلي وشه يعلم من أيدك، عشان لما يفوق يعرف أنتي عملتي كدا ليه ويحس بمعانتك

3- النظافة :

  • البيت على طول متكسر لما يفقد وعيه يفضل يكسر فأي حاجة، وممكن يحصله قيء، وأنتي تفضلي تنظفي كل دا قبل ما يفوق

الحل : متنظفيش حاجة، خلي كل حاجة زي ما هي، لما يفوق يشوف إلي عمله ويصلحه بنفسه ويعتمد على نفسه إلي كسره هو مسؤول عنه

4- شغله :

  • لحد أمتى هتفضلي تبرري غيابه لمديره أنه تعبان، أو ابنك تعبان

الحل : خليه هو يشوف حل ويبرر غيابه عن الشغل،  متبرريش موقفه

5- فلوسك بتضيع :

  • مصروف البيت بيضيع على المخدرات أو الخمرة، كل حاجة غالية في البيت هتضيع من دهب وعفش

الحل : بيعي دهبك وحطي فلوسه في البنك أو شيلي الدهب عند أهلك، لو بتشتغلي متحطيش مرتبك في البيت، أقرب فروع فودافون كاش أو أي شركة بتستخدميها وحطي المرتب فيهم واسحبي اسبوعياً على أد مصروفك

المواجهة والعلاج لـ الإدمان :

1- المصارحة والمواجهه:

  • صارحيه أنك تعبتي وشكله فصاد ولاده بقى سيء، وأنه لازم يتعالج لو تجاوب وحابب يتعالج خليكي جمبه لحد ما يتعالج ولو مش حابب يتعالج يبقى الأنفصال هو الأريح ليكي ولأولادك

2- سحب المخدر من الجسم:

  • المرحلة دي يفضل تكون في مركز تأهيل لعلاج الإدمان بس يكون مضمون، وبتفضل من أسبوعين لسته، لحد ما نسبة المخدر تتسحب من جسمه

3- تفهم موقفه :

  • لازم تفهمي موقفه أنه في مرحله سحب المخدر وبعدها هيدخل في إكتئابات وضغط نفسي لحد ما يتأقلم، فلازم تطمنيه من وقت للتاني لحد ما يرجع طبيعي، ومتنسيش تخلي ولادك عند أهلك في الوقت دا، عشان نوبات العصبيه إلي هتجيله

4- شجعيه على العلاج الجماعي :

  • الجروب ثربي، كل شخص بيحكي قصته وأزاي بيواجهه الإدمان وليه، دا هيساعده وهيزود حماسه

5- شجعيه على العلاج النفسي :

  • الإدمان في أوقات كتيره بيكون سببه نفسي، مشاكل، عقد، ضغط نفسي، عشان كدا لازم يستشر طبيب نفسي ومختص لحالات الإدمان

6- شجعيه على الأنشطة الروحانية :

  • الصلاة والصوم والزكاه عشان ربنا يخرجه من الأزمة دي

7-خليه يقطع علاقته بأي صاحب سوء :

  • كل إلي كان بيتعاطى معاهم، أول ليهم ذكريات سوا، ممنوع يكلمهم ولا يقابلهم لحد ما يتعالج على الأقل

8- تسمعي أوامر الدكتور :

  • لو الدكتور طلب حجزه في المستشفى، وافقي، حتى في طريقة معاملتك لو طلب قسوة وبلاش حنيه زيادة أسمعي الكلام، هو هيبتزك عاطفياً عشان يرجع للمخدرات غصب عنه في حالات العصبيه، لازم تتحكمي في عاطفتك ومتخليهوش يصعب عليكي

اقري كمان عن العلاقات المؤذية تعرف حد من ” الشخصيات المؤذية “.. يبقى لازم تجري يا مجدي والتعامل معاهم

شاركونا بأهم الحلول للتعامل مع المدمن؟

 

عن الكاتب

سلمى شرف الدين

سلمى شرف الدين ، خريجة إعلام ، وبحب الدوبلاج والكتابة