العيال

التأتأة : يا ترى أيه ممكن يفك عقدة لسان الطفل ؟!

” أأأأنا عااااوز أللللعب ” كتير من الأطفال بتواجه مشاكل عيوب فى الكلام ذى مشكلة التأتأة . ودى حكاية بتقلق الأمهات جدا لأن كل أم بتهتم قوى بتطور الطفل اللغوى.
من أول ما ما يبتدى يقلد الأصوات وبعدين ينطق كلمات صغيرة ثم تكوين الجملة.

أيه هى التأتأة الطبيعية ؟!

خلينا نتفق أن التأتأة مش دايما مرضية لكنها حاجة طبيعية من سن 2 : 5 سنين لأنه بيتعلم حصيلة كلمات كتير أوى.

فبتكون التأتأة فرق سرعات ما بين تفكيره و أن الكلام يطلع على لسانه لأنه لسه مش متعود على نطق كل الكلام اللى بيفكر فيه.

ساعات بيفضل يدور فى عقله على الكلمة المناسبة فتأتأة بتكون الفاصل لحد ما يوصل للكلمة.
كمان الخبر الكويس أن 5 % بس من الأطفال هما اللى بيعانوا بجد من التأتأة المرضية بعد المرحلة الطبيعية.

فى حالات تانية برده بتكون طبيعية عشان الطفل بيكون بيتكلم كويس بس بيتهته فى مواقف معينة ذى :

  • لو كان متحمس أوى لموضوع.
  • غضبان و بيعيط.
  • مكسوف.
  • او خايف من شخص معين.

عشان كدا لازم نراقب تصرفات الطفل و تطوره النطق عنده عشان لو فى جديد ندور على السبب الحقيقى.

لان ممكن الطفل يكون بيتكلم كويس جدا و مرة واحدة تلاقى أتغير و بدأ يعانى و كلامه مش مفهوم  .

أيه اسباب التأتأة عند الأطفال؟

  • لو فى حد فى العيلة بيعانى من المشكلة يعنى الجينات الوراثية هى السبب.
    الضغط العصبي على الطفل لأن فى أمهات بتعامل أبنها على أنه زويل المستقبل وتفضل تضغط عليه فممكن ده يخليه يتهته.
  • كمان تأخر النمو اللغوى عند الطفل و اللى غالبا بيصيب الولاد أكتر من البنات.
    الخوف الشديد من العقاب والمعاملة الغنيفة للطفل.
  • لو استمرت حالة التأتأة أكتر من 6 شهور عند الطفل فيكون أحسن لو عرضناه على مختص سواء كان دكتور أو أخصائى تخاطب.
  • عشان نبدأ نساعده يتخلص من الحالة دى بسرعة لأنها بتأثر أوى فى نفسيته.

أزاى التأتأة بتأثر على نفسية طفلك؟

يعنى لو الطفل فى سن المدرسة بتكون مشكلته أكبر عشان : 

  • ثقته و أحترامه لنفسه بيقل أوى.
  • معاملة الولاد فى المدرسة بتفرض عليه أنه يكون أنطوائى.
  • كمان ممكن تخليه سلوك الطفل عنيف فى معاملته مع زملاءه فى المدرسة.
  • تجنب أى موقف أو تجمع هيفرض عليه الكلام قدام الناس.
  • القلق و الخوف من القراءة فى الفصل بصوت عالى .
  • كمان لو الموضوع أستمر معاه كتير بيخلية فى حالة أكتئاب.
  • كل ما الوقت أتأخر مشاكله بتزيد أكتر عشان كدا مهم أننا نبدأ خطوات العلاج بسرعة.

لأن العلاج هيساعده يحس براحة كمان تحسن فى النطق و الكلام هيشجعه يساعد نفسه.

نصائح تساعد الطفل يتكلم بسلاسة أكتر

  1. وفرى للطفل وقت ولو 1/2 ساعة يكون أهتمامك بيه هو و بس عشان تقربى منه أكتر.
  2. مهما كان أسلوب كلامه صعب شجعيه ياخد وقته ،يكمل كلامه و حسسيه أنك مهتمه تسمعيه.
  3. بلاش تكملى لطفلك جمله سبيله فرصه ينهى كلامه بنفسه و يعبر عن اللى جواه بطريقته.
  4. حاولى تكلميه ببطء شوية عشان تسهلى عليه الرد عليكى و خلى كلامك واضح.
  5. ممكن كمان تخدى وقتك بين الجمل عشان تحسسى الطفل أنه مش لازم يحاول يرد بسرعة ممكن برده ياخد وقته.
  6. خليكى دايما إيجابية بلاش تتخضى أو تزعقى للطفل لما يبدأ يتأتأ عشان ممكن يكون فى المرحلة الطبيعية اللى قولنا عنها.أو بيدلع عشان يلفت نظرك و طبعا العيوب لو ركزنا عليها ممكن تثبت فساعات التجاهل فى البداية أفضل.

أما بقى لو الحكاية مرضية و مستمرة فبردوا مهم قوى أنك تدعمى طفلك عشان يتحسن .
و تبعدى عنه أى ضغوط نفسية طبعا ده بجانب توفير المساعدة الطبية المتخصصة.

انتى دلوقتى شايفة المشكلة كبيرة أوى بس بجد مع الوقت والعلاج هتحسى بتحسن طفلك.
و هتفتكرى أيام التعب دى كأنها ذكرى بعيدة لأن ولادنا يستاهلوا تعبنا وصبرنا.

أيه مشاكل دلع الكلام عند ولادك؟ 

عن الكاتب

نهلة شعلان