البزرميط

اكتئاب الدورة الشهرية: إزاي تتجاوزيه وتنجزي شغلك من غير تعب

اكتئاب الدورة الشهرية

اكتئاب الدورة الشهرية من أكثر المتاعب إلي بتواجه الستات خصوصاً لو بيشتغلوا، ممكن تصحي الصبح تبقي مش طايقة تروحي الشغل ولا طايقة المدير ولا طايقة حد وتبقي عايزة تقدمي أستقالتك، لأنك حاسة أنك مش قادرة تشيلي كوباية مش تروحي الشغل وتشتغلي وتتحملي ضغطه كمان، وعلشان كدا أحنا بنقولك أن الأعراض دي كلها طبيعية ووقتيه هتخلص أول ما الدورة هتخلص وعلشان كدا مينفعش تخسري شغلك في الوقت دا، لازم تعرفي تقللي من تعبها في وقت الشغل

الممنوعات لتقليل اكتئاب الدورة الشهرية 

  • الموالح والسكريات، والكافين زي القهوة وكمان قللي من الشكولاته، بلاش تدخين
  • البعد عن التوتر والمشاكل في الشغل، حاولي تتجنبي أي صراع جانبي سواء ملكيش دخل فيه أو ليكي دخل كبري مخك
  • ممنوع تراكمي شغلك عشان التعب، خلصيه قبلها وأعملي زيادة عشان تقدري ترتاحي لما تيجي

لتخفيف اكتئاب الدورة الشهرية أثناء الحيض

1- الدفء: خليكي في الأماكن الدافية، بعيدة عن أي برودة في الجو أو الأوض البحري، وفي الشغل حاولي تلبسي هدوم كفاية عشان تدفيكي خصوصاً منطقة الظهر والبطن، خلي معاكي ماية دافية وأدخلي الحمام من وقت للتاني في الشغل وحطيها على بطنك لحد ما تحسي بالهدوء، ومتنسيش بعد ما ترجعي من الشغل تأخدي حمام دافي عشان يقلل التقلصات

2- المشروبات : زي الميرمية، بتحسن الدورة الدموية وتقلل التقلصات والقرفة والنعناع، اطلبيهم طول الوقت وأنتي بتشتغلي بدل الشاي، وهتحسي بتحسن وطاقة

3-أرفعي رجلك: حاولي تكون رجلك في الشغل فوق مستوى الأرض، سواء حاطة كرسي صغير تحتها، أو فيه في المكتب مكان ليها، وكمان قبل ما تنامي أرفعي رجلك على مخدة

4-النظام الغذائي : ولأنك بتنسي نفسك والأكل وقت الشغل ودا هيزود الاكتئاب والتعب، علشان كدا خلي معاكي فاكهة ووجبات خفيفة سندوتشات، تأكلي منها وأنتي بتشتغلي كل ساعتين عشان طاقتك تزيد، وزودي الماغنسيوم إلي موجود في الموز، كلي موز عشان يخفف أنقباضات الرحم، والأكل إلي فيه أوميجا3 زي التونة والسلمون والسمك، زودي الوجبات إلي فيها كالسيوم وفيتامين د، زي اللبن والبيض وكمان الكربوهيدرات عشان طاقتك تزيد، بلاش الأكل المسبك والمالح الوقت دا عشان عصر الهضم، جربي الشوفان مع الزبادي بيقلل الجوع، وكمان جربي تحطي زعفران بيزود هرومون السعادة وبيقلل من اكتئاب الدورة الشهرية

5- تمارين التنفس : أول ما تتوتري من ضغط الشغل، وأنتي في مكانك غمضي عينك وخودي نفس وخرجيه براحه، لحد ما تحسي أن التوتر راح

اكتئاب الدورة الشهرية مينفعش نوقف بسببه شغلنا

6- الموسيقى: اسمعي موسيقى بتحبيها بس بلاش حزينة، وأنتي بتشتغلي هتساعدك تنجزي شغلك وتركزي فيه أكثر

7- الرياضة : قبل الشغل أعملي رياضة خفيفة أو لو شغلك قريب من بيتك روحيه مشي سريع كرياضة ، اليوجا كمان من الرياضات إلي بتخفف تعب الدورة وركزي على تمارين البطن والظهر عشان تقللي تقلصات الرحم

8- لا تراجع ولا استسلام: متستسلميش لتعبها وتقعدي في البيت دا هيزود اكتئابك وكمان هيزود ضغك الشغل عليكي

9- الدكتور : روحي للدكتور لو الدورة بتطول عندك وأعراض اكتئابها زيادة عشان يظبطلك مواعيدها وهرومانتها ويقلل من تعبها

10- المساج: بالكريمات المسكنة أو الطبيعية زي النعناع واللافندر، بحركات دائرية على البطن والظهر، هيقلل من التقلصات في الرحم ويخفف تعب أنقباضه

11- أطلبي المساعدة: لو مش قادرة تروحي الشغل أو تعملي شغلك، أطلبي من زمايلك يساعدوكي الفترة دي خصوصاً لو ستات هيتفهموا موقفك

12- الملابس : نقي هدوم واسعة ومريحة مش وقت أزياء، أنتي رايحة شغل، أختاري حاجة عملية ومريحة

13- القرأة: أقري عن اكتئاب الدورة والتعامل معاه وأحسن الطرق لتخفيفه وممكن تقري المقال دا هيفيدك اكتئاب ما قبل الحيض: مليش نفس أعمل حاجة

شاركينا ازاي بتعدي الفترة دي وتنجزي شغلك؟

 

عن الكاتب

سلمى شرف الدين

سلمى شرف الدين ، خريجة إعلام ، وبحب الدوبلاج والكتابة