ازاى تساعد شخص يتغلب على نوبات الهلع؟

300

الموضوع بيكون فعلا صعب لما تلاقى شخص يهمك بيعانى من القلق أونوبات الهلع، بس فى حاجات تقدر تساعد بيها، وهنقولك على شوية نصائح ممكن تساعدك.

متضغطش عليهم:

متضغطش على صاحبك او أى شخص من افراد اسرتك انه يعمل حاجة هو حاسس انه مش مرتاح ليها، مهم جدا انك تكون صبور، وتستجيب لرغبتة وتمشى الامور بوتيرة مناسبة ليه، مفهوم انك بتكون عاوز تساعده لمواجهة مخاوفه وانه يلاقى حلول عملية لمشاكله، بس فعلا احساس الشخص انة مجبر على موقف معين هو مش مستعد ليه بيكون صعب جدا، مجرد احساس الاجبار دة ممكن يقلق أكتر، وخليك فاكر ان عدم القدرة على السيطرة على القلق هو جزء من القلق نفسة، محدش بيختار انة يعيش قلقان، الشخص اللى بيعانى من نوبه الهلع بيكون محتاج يحس بالهدوء والقبول أكثر من حاجتة لأى كلام منطقى او عقلانى.

حاول تفهمه

  • أعرف معلومات اكتر عن القلق عشان تقدر تساعدهم يتخطوا القلق ونوبات الهلع.
  • أسأل عن تجاربهم، اعرف ازاى القلق بيأثر على حياتهم اليومية، واية اللى بيقلل او بيزود القلق عندهم، انصاتك لتجاربهم هيساعدك تعرف هما بيحسوا بأية وهيخليك تتعاطف معاهم.
  • خليك حنون، ومتصدرش أحكام قولهم ان القلق هيعدى، وانك موجود جنبهم.

أسأله ازاى ممكن تساعد

صاحبك او أى شخص فى اسرتك عارف انك ممكن تساعدة فى المواقف الصعبة اوتتكلم معاه بهدوء او تعمل معاه تمارين التنفس، بس سؤالك عن طريقة المساعدة اللى الشخص بيفضلها هيخليك تقدر تدعمه بشكل احسن عشان يتحكم فى نفسه وقت القلق، مجرد احساس الشخص ان فى حد موجود جنبة عارف يساعدة ازاى لو مر بنوبة قلق او زعر دة بيزود عنده احساس الامان والهدوء.

ادعمه عشان يلاقي المساعدة الصح

لو لقيت حد من اصحابك او من افراد اسرتك بيعانى من القلق لدرجة ان القلق دة بقى مشكلة فى حياتة، ممكن تشجعة يطلب العلاج عن طريق استشارة دكتور عام او معالج نفسى، كمان ممكن:

  • تساعدهم فى حجز ميعاد مع الدكتور، لوكانوا خايفين يخرجوا من البيت، وممكن تقترح عليهم انهم يتصلوا بالدكتور العام عشان يحددلهم هما محتاجين لزيارات منزلية ولا استشارات تليفونية، ممكن تدعمهم كمان فى مواعيد زيارة الدكتور وتعرض عليهم انك توصلهم للدكتور وتنتظرهم فى غرفة الانتظار، ممكن كمان تساعدهم فى طلب المساعدة من الطبيب المعالج.
  • وتقدر كمان توفر ليهم خيارات مختلفة للدعم زى الخدمات المجتمعية او مجموعات الدعم.

إوعى تنسى تهتم بنفسك الأول

أكيد ممكن تحس بالتعب والارهاق من مساعدتك لشخص بيعانى من مشكلة نفسية، بس مهم جدا انك متنساش تخلى بالك من صحتك النفسية عشان يكون عندك الطاقة والوقت والمساحة اللى محتاجها لمساعدة شخص تانى.

  • خلى دايما فى حدود للمساعدة،لانك لوتعبت مش هتقدر تساعد نفسك ولا تساعد غيرك، اعرف حدود قدرتك على المساعدة ومتحاولش تتخطاها.
  • شارك دورك فى رعاية الشخص مع ناس تانية لو تقدر، غالبا بتكون رعاية اى شخص اسهل لو كان معاك حد تانى بيساعدك.
  • واتكلم دايما عن اللى انت حاسس بيه، بس طبعا اتكلم بحذر ومتقولش اى معلومات خاصة بالشخص اللى انت بتساعدة، ودة هيخليك أنت كمان تحس بدعم كبير.
  • ابحث عن حد يدعمك انت كمان، وفى منظمات كتيرة تقدر تقوم بالمهمة دى، وفى علاجات ومجموعات دعم ممكن تساعدك.

مساعدة شخص بيعانى من نوبة هلع

احنا عارفين انك لازم تكون خايف لو شخص يهمك أمرة اتعرض لنوبة هلع، خاصة لو حصلتلة النوبة دى بشكل مفاجىء وبدون سابق انذار، بس انت تقدر تساعدة لوعملت الحاجات دى:

  • حاول تكون هادىء.
  • حاول تعرفهم بلطف انك فاهم انهم بيتعرضوا لنوبة هلع، وانك موجود جنبهم لمساعدتهم.
  • شجعهم على التنفس بهدوء وعمق، ممكن كمان يعملوا اى حاجة بشكل منظم ومتكرر زى العد بصوت عالى او انهم يراقبوك بتركيزوانت بترفع وتنزل ذراعك ببطء.
  • شجعهم على تحريك رجليهم والدبدبة على الارض عشان يهدوا.
  • خليهم يقعدوا فى مكان هادىء يقدروا يركزوا فيه على تنفسهم لحين التحسن.

أوعى تخلى شخص بيعانى من نوبة هلع يتنفس جوا كيس من الورق، دة غير آمن تماما وممكن يكون خطر على حياته.

اترك تعليق