العيال

ابنك اللى بيكتب على الهواء بصوابعه مش مجنون

انانى

ابنك اللى بيكتب على الهواء و التلفزيون بصوابعه مش مجنون بس متعلق بالأجهزة الtouch .
مشهد كلنا بنشوفه اليومين دول فى ولادنا ان أبنك او بنتك اللى مكملش 4 سنين يجرى على التلفزيون و يحاول يختار و يحرك صوابعه گأنه تاتش .

طبعا ما هى الدنيا كلها بالنسبة له بقت تاتش فين أيام ماكنت لازم تقوم عشان تغير القناة و لا الاريل اللى كان لازم تعدله عشان الصورة تتظبط طبعا ده بقى كلام جدك خلاص .
من الأخر تقسيمة الجيل بقت مبنية على التكنولوجيا .
فلما تلاقى أبنك او بنتك بتكتب على الهواء بصوابعها أعرف أنهم مش مجانين هو بس متعلق بتكنولوجيا الجيل ده .

أعرف منين أن التعلق زاد عن حده ؟!

* لما يقضى وقته كله مع التابلت أو الآيباد و يلعب و يدخل على النت أكتر من الكبار .

* كمان تلاقى طفلك بيعيط بحرقة و صدمة لما النت يقطع .
* و لو حاولت تلعب معاه من غير اجهزة يغضب و يزعل .
* و لو ضغطت عليه و خرجت بيه ،طول ما هو ماشى يحرك صوابعه فى الهوا كأنه بيلعب علي الموبايل .
* أما بقى لو طولت في الخروجه ،هندخل فى أعراض عصبية و نوبات غضب لانه للأسف مدمن أجهزة رقمية .

طب وايه المشكلة لما يحب الموبايل و الآى باد ؟

المشكلة فى الأضرار الكتير الجاية من وراه دا
الإنطوائية : هيفضل الوحدة و المعاملة مع الأجهزة أحسن من اللعب مع الأطفال .
القلق و التوتر و الإكتئاب : طبعا لو بعدته عن الأجهزة
مشاكل فى الخطابه : طريقة كلامه هتقلب كارتون وهينفعل مع المواقف باللغه دي و ممكن يقلب معاه بمظاهر توحد من كتر العزلة.
مشاكل زى صعوبات التعامل و نقص الذاكرة و عدم الأنتباه .
– ده غير أضرار التعرض للإشعاع الساعات طويلة جدا على جسمه و تفكيره .

أزاى نعالج إدمان الآيباد و النت ؟!

– يجب تحديد مدة الأستخدم و بتكون حسب عمر الطفل مثلا لا يفضل ألأستخدام قبل عمر سنتين و لو كان يبقى من 20:15 دقيقة .

اما فوق عامين فالمدة بتزيد بالتدريج بحد أقصى ساعة فى اليوم .

– لازم نتفق على المدة و ننبه الطفل قبل ما تخلص بشوية عشان يستعد و ميتتصدمش .

مراعاة المحتوى اللى بيتابعه سواء ألعاب أو كرتون يعنى بلاش الحاجات العنيفة أو اللى مش بتناسب سنه .

– لازم نتوقف عن استخدام الأجهزة قبل النوم بمدة كافية عشان ينام نوم عادى .

– شارك طفلك باللعب و التعامل مع الأجهزة عشان متبقاش مراقبتك رخمة استمتع بوقتك معاه .
– ممكن تستخدم الأجهزة عشان طفلك الى مغلبك وقت الأكل او عشان يعمل المطلوب منه بس بالمعقول بشرط نساعده على السلوك المؤدب .

اى حاجة بالمعقول حلوه مع ولادنا لا نخنقهم و لا نسيبهم ،الوسط حلو عشان يخدوا الفايدة من كل الدنيا حولهم .

عن الكاتب

نهلة شعلان