إزاي تخلي تجربة الطلاق سهلة ومتأثرش عليك؟

62

محدش بيتمنى الفشل ولا بيتجوز وهو متوقع إنه هيفشل، وعلى الرغم من كدة فبنسبة ٢٠%  بيحصل طلاق في أول خمس سنين، وبنسبة ٤٨% بيحصل الطلاق بعد ٢٠ سنة جواز، وأيًا كانت المُدة اللي كانت موجودة قبل الطلاق، فإزاي نخلي الطلاق يحصل بشكل صِحي ومن غير أضرار؟

متصعبّش الدُنيا عليك ومتقفلش على نفسك

الطلاق بيحطك تحت ضغط من مشاعر كتير متضاربة زي القلق والغضب والحُزن والخوف، وللأسف بتكون المشاعر دي زي وحش كاسِر بيهاجمك بس مع الوقت مشاعرك بتهدى، لكن المُهم في الوقت ده إنك متكونش قاسي على نفسك لإن الأبحاث اثبتت إن الناس اللي بتساعد على نفسها وبتهون على نفسها بيكون سهل عليهم بعدين يتعاملوا مع صعوبات الطلاق.

انت مش في حرب، لازم تتعامل على إن الطلاق مُجرد انتهاء لعلاقتك مع شريك حياتك مش معركة ولازم تكسبها، وعشان تريح دماغك من المحاكم والقواضي والمفاوضات ممكن تِلجأ لوسيط يكون بينكم ويخلص الأمور ببساطة، لإنك لو واجهت شريك حياتك بعد الطلاق ممكن تدخلوا في نفس المشاكل اللي كنتوا فيها قبل الطلاق وتفضل في دوامة الضغط دي فعلى إيه؟، إنت لو لجأت لوسيط بينكم هتكون بتحافظ على نفسك وعلى ولادك وعلى اللي باقي بينكم من الاحترام والتفاهم.

ممكن آخر حاجة تكون عايزها في الوقت ده إنك ترجع تتواصل مع شريك حياتك السابق لأي سبب، بس في أغلب الحالات بيكون فيه بينكم مصالح مُشتركة زي الشراكة المادية أو وجود أطفال، فهو شر لا بد منه وممكن تستعين بطبيب نفسي قبل اللقاء ده عشان تعرف تحافظ على هدوئك وصحتك، غير إنك لازم تتعلم إزاي تتعاون مع شريك حياتك السابق عشان تخرجوا من علاقتكم بأقل الخساير ليكم وللأولاد، ولو الموضوع صعب للدرجة دي ممكن تتواصلوا حتى عالنت.

حافِظ على عيالك

مفيش شك إن الطلاق تجربة صعبة جدًا عالأطفال، بس مش أصعب عليهم من إنهم يعيشوا في مشاكل مبتتنتهيش بين أهلهم طول الوقت، وده لإنهم بيتأقلموا على الطلاق بعده بحوالي سنتين، لكن المُهم وقت الطلاق إن الأبوين يتفقوا عالحضانة بسهولة من غير ما يدخلوا ولادهم في المشاكل دي لإنها بتأثر عليهم نفسيًا وجسديًا.

وأحسن حاجة في الوقت ده إن الأبوين يقرروا يسيبوا مجال لولادهم يتواصلوا معاهم طول الوقت من غير ما يحسوا إنهم خسروا حد من أهلهم، وعشان هما لسة عيال ومش قادرين يستوعبوا الفكرة فلازم تمهدولهم إنهم هيروحوا بيت جديد ومدرسة جديدة وحياة ناقصة فرد عشان ميتصدموش ويتعبوا نفسيًا.

خلي بالك من نفسك

بعد الطلاق هتتغير بشكل كبير جدًا، لكن لو مهتمتش بنفسك في الوقت ده هتتدمر، المهم في الوقت ده إنك تتواصل مع أهلك وجيرانك وأصحابك ومتقفلش على نفسك وتسيب الاكتئاب والقلق ينهشوا فيك، حاول تِفصل ومتشوفش كل حاجة إنها بقت سودة وابدأ صفحة جديدة والعب رياضة وكُل أكل صحي وعيش حياتك لنفسك ولولادك وبس.

 استعين بأخصائي علاقات

الأخصائي النفسي هينورلك الضلمة اللي هتدخل فيها بعد الطلاق وهيقدر يوجهك صح وازاي تتعامل مع كُل المشاكل اللي هتواجهك بعد كدة وازاي تحافظ على نفسك وعلى ولادك وتبدأ حياة جديدة من غير آثار الماضي الصعبة.

اترك تعليق