البزرميط الدمـاغ

10 حاجات غلط دماغك بتعملها عشان تتعامل مع الصدمات – وإزاي تصححها

كتبها سها مطر

الناس بتتعامل مع المواقف الصعبة بطرق مختلفة. عمرك سمعت خبر حزين واتعاملت معاه أنه محصلش؟ أو عمرك سمعت قصص ناس مروا بصدمات في حياتهم ومش فاكرينها لحد دلوقتى؟
“الحيل الدفاعية” هي الوسائل والطرق المختلفة اللى الإنسان بيلجأ ليها في المواقف الصعبة.
من المهم أننا ننتبه لوسائل الدفاع ونفهم ازاى نقدر نسيطر عليها بشكل أفضل. لأنك لو ملاحظتهاش، ممكن تؤدى لمزيد من الضرر على المدى الطويل. لو معالجتش مشاكلك بطريقة صحية ممكن تتسبب في مشاكل أكبر زى القلق أو الإجهاد والاكتئاب، كمان ممكن يكون ليها تأثير سلبى على علاقاتك بالناس حواليك وبالذات لو اتصرفت بطريقة ممكن تأذى بيها شخص تانى.

ودي أشهر 10 آليات دفاع مشتركة بين الناس:

1) الكظم والكبت:
عقلك بيقصد أنه يدفن كل الذكريات المؤلمة في عقلك اللاواعى علشان يمنعك أنك تفتكرها بشكل كامل. وهو بيمنع ذكريات ومشاعر معينة كوسيلة للحماية، زى مثلا إن الإنسان ممكن ينسى ذكريات مؤلمة جدا في الطفولة.

2) الإنكار:
هو واحد من وسائل الدفاع البدائية وبيحصل لما منقدرش نعالج موضوع معين وهى طريقة منتشرة بين ناس كتير. زى مثلا الناس اللى بتشرب مخدرات ممكن تنكر أنها بتعانى فعلا من الإدمان على الرغم من أنها ممكن تكون سبب في ديون عليهم.

3) التصرف بطفولة:
بمعنى أنك ممكن ترجع لطريقة صبيانية أو طفولية في التعامل مع المشاكل. بيكون رد فعلك غير ناضح لأنك حاسس أنك مش عارف تتصرف مع الموقف بعقلانية، زى مثلا أنك ممكن تدخل في نوبة غضب لو معرفتش تواجه مشاكلك.

4) إلقاء التهمة واللوم على الآخرين:
ممكن بسهولة ترمى عدم شعورك باستقرارك النفسى على شخص تانى، أو لما تكون مضغوط أكتر من اللازم. وأوقات كتيرممكن تكون حاسس باللى بتعمله بس مش قادر تتحكم في نفسك، على سبيل المثال ممكن تستغل أي موقف حد بيهزر معاك فيه أنك تقلبه بجد.

5) الإحلال أوالإزاحة:
بمعنى أنك توجه مشاعرك للشخص الغلط ، زى أنك تكون في موقف مع مديرك متقدرش تعبر فيه عن مشاعرك بشكل مباشر فبتكون النتيجة أنك ترجع لأهلك تتعصب عليهم أو على أصحابك أو كمان ممكن تطلع غضبك في صورة تانية زى أنك تمسك أي حاجة قدامك وترميها.

6) التبرير:
والمقصو هنا التبرير المستمر سواء كان تصرفك صح أو غلط وأنك تشوف كل حاجة من وجهة نظرك أنت بس، زى مثلا أنك ممكن تكدب على شريك حياتك في موضوع معين وتكون وجهة نظرك أنها “كدبة بيضا”، مبررك ممكن يكون علشان متضايقهوش أو علشان متعملش مشاكل.

7) تشكيل الارتكاس:
بمعنى أننا نتصرف عكس ما بنحس.أنك تحول مشاعرك وأفكارك في مواقف معينة، زى أنك متعترفش أنك مضايق مثلا وده ممكن يحصل كتير أو أنك تكابر في أي إحساس تانى.

8) التسامى:
بمعنى أنك تركز مشاعرك في أي حاجة ملهاش علاقة بمشكلتك الحالية، أنك بتوجه طاقتك لحاجة مختلفة تماما واللى ممكن أنه يسبب مشاكل أكتر.

9) الإبطال أوالتراجع:
بمعنى أنك تتصرف تصرف معين عكس تماما اللى بتحسه أو اللى عملته قبل كده، زى ما الاسم واضح “التراجع” بمعنى أنك تتصرف عكس مشاعرك أو تفكيرك تماما في موضوع معين. زى مثلا: الأم اللى بتلغى عقاب ابنها بأنها تعامله أحسن معاملة وممكن يكون بشكل مبالغ فيه.
أوقات بيكون محاولة مسح شعور معين أو تصليح موقف، بالتالى رد الفعل ممكن يكون فيه نوع من المبالغة.

10)التريقة:
بمعنى أنك تتعامل مع مشاكلك عن طريق أنك تتريق عليها وتحاول أنك تلقى الضوء على الجانب المضحك من المشكلة، وقتها أكيد بتكون لسه بتعانى من المشكلة.

ممكن نسيطر على الوسائل الدفاعية بطرق مختلفة: 

  • غير عاداتك:

سلوكيتنا بالوقت ممكن تتحول لعادة. انتبه كويس ازاى بتتصرف لما بتواجه مشكلات عاطفية، هل ممكن تمسك حاجة وترميها على الأرض وأنت متعصب جدا؟ هل ممكن تتكيف على اتباع استراتيجية تانية وهى أنك تمشى بعيد لحد ما تهدى أو أنك ببساطة تتنفس بعمق وتعد ل 10؟ هل ممكن بدل ما تلجأ أنك تشرب وتدمن لما تواجهك مشكلة كبيرة، أنك تتجه لأسلوب صحى أكتر فى الحياة وتحاوط نفسك بناس إيجابية أكتر؟

  • مترميش اللوم على حد:

ممكن بسهولة أوى لو مقدرتش تواجه مشكلة معينة أو مقدرتش تتحمل مشاعر أو أفعال معينة، تلجأ أنك ترمى اللوم على أي شخص، اللى ممكن يعرض علاقتك بيه لخطر أو على الأقل تخليه يحس بتأنيب ضمير.حاول أنك تكون صادق أكتر وتصارح الشخص اللى معاك بمعاناتك الحقيقية من غير ما تحس بالإحراج. أوقات كتيرة، ممكن من كلامك مع الناس تطلع بوجهات نظر مختلفة وتقلل إحساسك بالوحدة.

  • متنكرش مشاعرك السلبية:

التخلص من المشاعر السلبية بيكون تحرر كبير ليك. مفيش حد مثالى، ومش مفروض أننا نسعى للكمال، لأن الأحداث السيئة بتحصل ومن العادى جدا أننا نحس بضيق ناحيتها. لازم تدى لنفسك وقت لأنك تتخلص منها (مش تعيش وتتمادى فيها)، لما تمر بظروف صعبة متنكرش دور جسمك في البكاء لو احتاجت.حاول تكون صادق وتعبر عن مشاعرك بدل ما تحاول تخبيها أو تكبتها، لأن في الحالتين مشاعرك هتتطلع بشكل غلط.

  • اتبع أسلوب حياة صحى:

حتى لو أن اتباع نظام صحى مش هيغير ظروفك، لكن أنت اللى هتتغير وهتقدر أنك تواجه مشاكلك بشكل أفضل. تغذية الجسم والعقل والروح من أكتر الحاجات الإيجابية اللى ممكن تعلمها، واللى هيكون ليها تأثير كبير على مشاعرك وعلى الحيل الدفاعية.حاول أنك تتبع نظام غذائى سليم، كمان ممارسة الرياضة والتأمل بيكون ليهم تأثير كبير علي حياتك.

عن الكاتب

سها مطر

منـاقشة