العلاقات

الضغط النفسي في العلاقات : ازاي تبني علاقات صحية بشوية نصايح بسيطة

الضغط النفسي في العلاقات

الضغط النفسي والمشاكل وتعب الحياة، معاني كتير كلنا بنفهمها غلط، أتربينا عليها وبقيت البعبع بتاع حياتنا، بيبوظ كل علاقتنا، عشان كدا لازم نفهم المعاني الغلط دي، ونبدلها بالصح، عشان نقدر نبني علاقات صحية، ونبقى مبسوطين ومرتاحين نفسياً

الأفكار الغلط عن الضغط النفسي

1- الخوف من المرض العقلي أو النفسي :

  • رغم أنك أول ما بتتعب بتكتب على وسائل التواصل، رجلي وجعاني، معدتي، عندي صداع، والناس بتتفاعل معاك وتدعيلك بالسلامة، لكن أول ما عقلك يتعب الكل بيكتم على الموضوع، أنت وأهلك، مع أن العقل دا جزء من الجسم
  • المفهوم الخطأ عن الضغط النفسي والأمراض النفسية، أنك لازم تبقى مجنون، مع أن روحك تعبت من المشاكل ومحتاجة مساعدة، لا مجنون ولا حاجة
  • حتى أهل الدكتور النفسي أو المعالج، بيتكسفوا يقولوا أن ابنهم طبيب نفسي، وكأنه بيشتغل حاجة ممنوعة
  • عشان تعرف أكثر عن المرض النفسي والعقلي أقرا المقال دا إيه الفرق بين المرض العقلي والنفسي؟

2- إلي أتكسر عمره ما يتصلح :

  • إلي راح عمره ما يرجع، والأمثال إلي كلها يأس دي غلط جداً، إلي أتكسر بيتصلح عادي جداً، حتى لو خد وقت في تصليحه، لكنه هيتصلح، أه هيبقى فيه ذكرى أنه اتكسر قبل كدا بس الذكرى دي عشان تفكرنا نحافظ عليه من الكسر مرة تانية

نصايح ليك عشان تخفف الضغط النفسي من أفكارك 

  • الحرية هي أنك تكون حر من مخاوفك، حر من أي حاجة بتقيدك وتخليك خايف، تسبها ورا ظهرك وتعيش حر مرتاح
  • محدش هيساعدك زي نفسك، أنت الوحيد إلي عارف تحل لغز نفسك، أنت الوحيد إلي عارف الصورة الكاملة ليك، الأشخاص حواليك هيساعدوك، هيدوك خيوط توصلك للصورة الكاملة ليك، لكن إلي هيرسمها في الآخر هو أنت
  • متخليش ماضيك يقيد حاضرك ويدمر مستقبلك، ماضي يعني خلص خلاص، عيش الحاضر ومتفكرش في المستقبل كل حاجة هتبقى بخير
  • ممكن جداً تختار الحل السهل، أحنا دائماً بنميل للحلول الصعبة، وبنحس أننا لما نختار الطريق الصعب كدا خلاص نستخق النجاح، مع أننا ممكن نمشي في الطريق السهل إلي على أد قدراتنا دلوقتي، متمشيش في الصعب خصوصاً وأنت لسه مش جاهز ليه
  • قول أهلاً كبيرة للسعادة وودع الحزن بسرعة جداً، أستغل أي حاجة تفرحك، أديها مساحة من قلبك وحياتك، فرفش نفسك، أي زعل حاول تخلصه بسرعه وترجع السعادة تاني

عشان تخفف الضغط النفسي وتبنوا علاقات صحية 

علاقة الأهل مع أولادهم :

  • لازم الأهل تبني ذكريات جميلة ومريحة وسعيدة لأولادهم، ذكريات كلها حب ودفء وأمان، على الأقل يقدروا يفتكروا لما يتوهوا من تعب الحياة
  • لازم نتعلم نخلي أولادنا يعبروا عن الغضب والحزن والخوف، مينفعش نمنعهم ونقولهم بطلوا وعيب، لازم يعبروا عن الطاقة السلبية إلي جواهم، لو أتكتمت مش هيقدروا يعبروا عن طاقة الحب بعد كدا
  • التعبير عن الغضب شيء صحي، حتى لو عليك مدام في حدود المسموح
  • الأهل مش ربنا ولا أله، هما ناس زيهم زينا، بيغلطوا زي الناس العادية، لو أنت طبقت المبدأ دا مع ولادك ولما تغلط تعترف لأنك بشر، هيقل زعلهم منك على غلطاتك في حقهم
  • أكبر غلطات الأهل بتقع فيها أنهم يقولوا كل شوية الخلفة حمل، أنت مش عارف يعني أيه تبقى أب أو أم، أنت إلي أخترت تبقى أب ودي مسؤوليتك، أعملها صح

علاقتك بشريك حياتك :

  • مينفعش طرف أبداً يعاني لوحده، الطرف الثاني من حقه أنه يعرف أنك بتعاني على الأقل عشان يقدر موقفك
  • العلاقة العاطفية واحدة من العلاقات المميزة في حياتك، لازم يكون عندك حاجات مميزة غيرها، بتلاقي ناس تشاركهم هواياتك، ثقافتك وشغلك، بتعرف تسد أحتياجاتك، متخليش علاقتك بشريك حياتك هي العلاقة المميزة الوحيدة إلي مستنيها تسد كل حاجة محتاجها، لأن دا عبء ومش عادل أبداً ليك عشان لما الموضوع يخلص هتتعب جداً، وللطرف الثاني إلي عايزة يعملك كل حاجة
  • لازم تبقى على طبيعتك، من غير أي تزيف أو تزين لحقيقتك قدام شريك حياتك، تحس معاه بالأمان إلي حاسه مع صحابك
  • مش لازم تبقى مميز عشان حد يحبك، مش لازم تبان مميز عشان تلاقي علاقة صحية، كلنا من حقنا نلاقي حد يحبنا وزي ما أحنا

شاركنا بأكثر الأفكار الغلط عن الضغط النفسي في العلاقات وواجهتها ازاي؟

عن الكاتب

سلمى شرف الدين

سلمى شرف الدين ، خريجة إعلام ، وبحب الدوبلاج والكتابة