سايكويكي

الاكتئاب النفسي : أحياناً مرض وأحياناً عرض وليه أنواع كتير

الاكتئاب النفسي

مصطلح الاكتئاب النفسي بيُستخدم بشكل شائع عشان نعبر بيه عن مشاعر الحُزن اللي بتجيلنا كلنا في أوقات معينة من حياتنا. إنمـا الاكتئاب النفسي بقى فهو عبارة عن اعتلال عقلي الشخص بيعاني فيه من الحزن ومن كتير من المشاعر السلبية لفترات طويلة، وبيفقد جزء كبير من حماسه وعدم الاهتمام. وهو من أكتر الاضطرابات النفسية انتشارًا.

وصدقني لو عرفت يعني إيه اكتئاب نفسي بجد وإيه اللي بيحس بيه مريض الاكتئاب هاتبطل تقول ” أنا عندي اكتئاب ” عالفاضي وعالمليان وهاتستبدلها بحاجات من عينة “انا مش في الموود” أو “أنا متضايق” للتعبير عن حالتك السيئة.

فأحيان كتير الكآبة مابتبقـاش اضطراب نفسي، وإنما بتبقى رد فعل طبيعي لحاجات حصلت في حياة البني آدم، زي إنهـا تكون أعراض بعض الحالات الطبية خاصة المزمنة، أو واحدة من الآثار الجانبية لبعض العلاجات الطبية، الخ..

يعني الاكتئاب ممكن يبقى مرض في حد ذاته، أو عرض من ضمن أعراض لأمراض تانية سواء كانت أمراض نفسية أو عضوية.

أنواع الاكتئاب النفسي حسب أنواعه

  • الوراثة تعتبر سبب مهم من أسباب الاصابة بالمرض وماحدش عارف لحد دلوقتي إزاي بالظبط الاكتئاب بيتنقل من الأهل لأولادهم.
  • خلل في توازن الناقلات العصبية المسؤولة عن تنظيم الإشارات العصبية في خلايا الدماغ ومن أهم الناقلات العصبية اللي لو نقصت هاتؤدي لظهور أعراض وعلامات الكآبة هي مادة السيروتونين.الاكتئاب النفسي
  • ممكن جداً عوامل توتر خارجية زي فقدان شخص عزيز أو فقدان مستوى اجتماعي أو اقتصادي معين اتعودنا نعيش فيه أو الشعور بالذنب المبالغ فيه.. كل ده ممكن يدخل الإنسان في اضطراب ما بعد الصدمة اللي ممكن ينتج عنه الاكتئاب النفسي كمصاحب ليه، وساعتهـا عشان الإنسان يتعالج ويبقى أحسن لازم الأول يتعامل مع الاضطراب اللي حصله نتيجه الصدمة الفلانية .. ثم نبتدي نشوف موضوع الاكتئاب ده لو ماخفش لوحده وعالأقل إبتدى يخف.
  • المشروبات الكحولية بتلعب دور مهم في الاكتئاب النفسي ومشكلة الكحوليات زي ماتكلمنا قبل كدة عن الاضطراب إنها بتقوم بدور المهدئ فالمريض ممكن يلجأ ليها بسهولة.. لكن تأثيرهـا على المدى الطويل مضر جداً. سواء للمريض أو غيره.
  • فترة ما بعد الولادة في الأمهات نتيجة للاضطرابات اللي بتحصل لمستويات الهرمونات في جسم الست الحامل بعد الولادة زي ماتكلمنا قبل كدة عن اكتئاب ما بعد الحمل.
  • الأمراض العضوية المزمنة بتؤدي إلى الكآبة إما نتيجة للطبيعة المزمنة للمرض وتقبل المريض لده واللي بيجبره يغير أسلوب حياته .. أو نتيجة لاستعمال أدوية معينة في العلاج بتؤدي بصورة غير مباشرة لـ ظهور أعراض الاكتئاب.
  • الاكتئاب برضه جزء من اضطراب ثنائي القطب اللي بيتميز عن الاكتئاب فـكذا حاجة بس أهمها إن مريض ثنائي القطب بيجيله نوبات فرح غير منطقي ونوبات كآبة غير منطقي.. ساعتهـا الاكتئاب بيعتبر عرض لمرض تاني إسمه اضطراب ذو اتجاهين أو الاضطراب الوجداني ثنائي القطب أو اختصارًا الهوس الاكتئابي.
  • ممكن كمان يبقى طبع البني آدم كدة، وبيحس بالكآبة والحزن لفترة طويلة من حياته وبتختلف عن أعراض اضطراب الإكتئاب الشديد في حدتهـا ومابتجيش على شكل نوبات اكتئابية. لأن الشخص اللي بيعاني من إضطراب الإكتئاب الشديد بيحس بالكآبة وبيفقد استمتاعه بالحياة تماماً. التركيز بتاعه بيقل والطاقة بتاعته كمان، وده بيأثر بالسلب على عادات الأكل (ياكل كتير أو قليل) والنوم (ينام كتير أو قليل). كمان إحساسه بفقدان الأمل واليأس بيخلوه عرضه إنه يفكر في الانتحار.
  • في أنواع تانية تعتبر خفيفة من الاكتئاب زي اكتئاب الشتا أو الاكتئاب الموسمي بشكل عام وبنقول “خفيفة” لأنهـا المفروض مابتأثرش على الحياة الطبيعية.

من الحاجات اللي بتساعد على الوقاية من الاكتئاب النفسي

  • الرياضة
  • الحـافز المستمر
  • تقليل التوتر والإرهاق
  • النوم المنتظم والأكل الصحي

من العلاجات المتوفرة لاضطراب الاكتئاب النفسي

  • الأدوية النفسية للاكتئاب بتلعب دور مهم جداً عالأقل في تهدئة الأفكار السلبية اللي بتيجي في دماغ المريض أو مساعدة الأعصاب على إفراز كميات أكبر من السيروتونين.
  • العلاج السلوكي المعرفي واللي بيقوم على مساعدة المريض في إدراك وتفسير طريقة تفكيره السلبية؛ بهدف تغيرها إلى أفكار أو قناعات إيجابية والأهم تبقى أكثر واقعية.
  • علاج الإيقاع الشخصي المتناسق ودوره مساعدة المريض إنه يعرف يعيش (أو بتعايش) مع الأشخاص القريبين ليه زي العيلة أو الصحاب أو الشغل أو العلاقات مثلًا.
  • العلاج العائلي وبيقوم على مساعدة المريض في حل مشاكله مع افراد عيلته بما إنهم أقرب ناس ليه وأكتر ناس بيأثروا في حالته النفسية
  • في حاجات تانية زي العلاج بالصدمات الكهربائية (خاصة في حالة وجود ميول انتحارية أو محاولات انتحار تمت بالفعل قبل كدة) والعلاج بالتحفيز المغناطيسي وهكذا

الاكتئاب ليه علاجات كتير ومنهـا حاجات فعاليتهـا قوية جداً .. لكن تبقى المشكلة الأساسية وهي حافز الشخص نفسه للعلاج وده دور الناس اللي حواليه.

لو عندك اكتئاب أولاً روح لدكتور فوراً .. ثانياً إبعد عن النـاس المزيفة فحياتك.. وبما إن نظرتك هاتبقى سلبية فحط ثقة أكتر في الدكتور النفسي اللي بتتابع معاه واتناقش معاه مين المفروض تقرب منه أكتر ومين اللي القرب منه هايضرك أكتر ما هينفعك.

لو تعرف حد عنده اكتئاب .. أرجوك خليك سنده، عشان هو محتاجك، حتى لو ما قالش ده!

عن الكاتب

أحمد الفرماوي