ازاى البنت تتخلص من الاكتئاب

أحنا كبنات معروف عننا أن تقلبتنا المزاجية و النفسية أسرع بكتير جداً من الرجالة ، و دا بيرجع لتغير الهيرمونات فى الجسم اللى بتحصل كل فترة ، و أوقات ده بيدأى لوجود اكتئاب عند بعض البنات و طبعا دا  بيخليها تفكر فى القديم و الجديد كله و تقلب فى ذكرايتها من ساعة ما اتولدت و بالتالى دا بيسبب Overthinking بطريقة مش طبيعية و يليه الدخول فى نوبات عياط و زعل من اللى حواليها من غير أى اسباب منطقية مبررة

فى المقال دا هنتكلم عن شوية حاجات يقدرو يساعدو البنات فى انهم يطلعو من الاكتئاب و لو انتى حاسة انك هتبدأى تخشى فى نوبات الـ Overthinking و الاكتئاب ، يبقا الحقى نفسك اقرأى النقط اللى تحت دى أكيد عندك اكتئاب بسبب حاجة منهم و طبقى اللى هنقولك عليه فيهم ^_^

1- حبى نفسك و حبى جسمك

فى بنات كتير بتبقا كارهه تبص فى المرايا عشان شكلها و مش بتتقبله ، اللى مناخيرها مش عجباها ، و اللى كرشها الناس بتفتكرها حامل ، واللى من كتر الضغط النفسى و المجهود الذهنى اللى بتعمله مبتعرفش تاكل كويس و مبتتخنش !

الفكرة هنا انك لازم تتقبلى شكلك و جسمك زى ما هو كدا ، و بمجرد انك تتقبليه هتلاقى نفسك قادرة انك تغيرى فيه و بالتالى لو انتى عندك خوف غير مبرر من بصات الناس ليكى و عندك اكتئاب بسبب جسمك دا هيروح مع الوقت بمجرد بس ما تتقبلى نفسك و تحبيها زى ما هيا !

2- الرياضة ثم الرياضة ثم الرياضة

مؤخراً بقا فى بنات كتير جدا عندها ثقافة الرياضة و الجيم و عن تجربة فعلا مجرد ما تروحى و تبدأى تلعبى و تمارسى الرياضة ، دا بيخليكى تطلعى الطاقة السلبية اللى عندك ، أينعم مش بتطلع كلها ، بس بتساعدك بنسبة كبيرة جدا فى تحسين حالتك المزاجية و يا سلام بقا لو لقيتى جوه الجيم دا صبا و ساونا و جاكوزى 😀 الأكتئاب هيختفى يا فوزية .. بس طبعا متبقيش رايحة عشان الكلام دا بس ! انتى فى الاساس رايحة عشان تعملى تمارين رياضية لجسمك و دا هيأثر كتير جدا جدا على شكل جسمك 😉

3-خدى بالك من أكلك !

ركزى ان الأكل اللى بتاكليه دا يكون صحى ، مش بتاكلى محمر و مشمر و اى حاجة بتقع فى طريقة و خلاص ! و ركزى ان أكلك يكون بكميات مناسبة ليكى ، يعنى لو انتى عاوزة تتخنى ، هتاكلى اكل عادى جدا زى الناس اللى بتخس ( مسلوق و مشوى و خضراوات و هكذا ) بس بكميات اكبر منهم

و متاكليش حاجات تقيلة بليل لان دا بيسبب حالات مزاجية سيئة و بيأثر بشكل غير مباشر على اكتئابك و خصوصا فى الشتاء بالذات لان ناس كتير جدا بتتعرض لـ اكتئاب الشتاء

4-علاقاتك الدينية

حافظى على جزء العبادات و الخلوة مع الله فى حياتك ، هتحسى بطاقة ايجابية و حاولى دايما كل فترة تزورى الاماكن الدينية ، بيأثر بصورة غير مباشرة على حالتك المزاجية و على التخلص من الاكتئاب

5- اختارى اصحابك صح

اصحابك اللى بتقعدى معاهم 24 ساعة ، اختارى منهم الاشخاص اللى لما تقعى يسندوكى ، ميفضلوش يسودو عيشتك اكتر ما هيا سودة 😀 ، يعنى متقوليلهاش انا مكتئبة تقوم تقولك معاكى حق مفيش حاجة عدلة و مفيش حد يستاهل 😀 ، اختارى اللى تشجعك و تسندك تخرجى من حالتك المزاجية دى <3

6- خلى عندك هواية

شوفى ايه الحاجة اللى بتحبى تعمليها علطول ، تتفرجى على افلام ، تعملى كوروشيه او تريكوه ، او حتى ترغى مع اصحابك و لا تقريلك كتاب

7-ظبطى مواعيد نومك

كتر سهرك بليل دا لوحده سبب من اسباب الاكتئاب لانك بتدى لنفسك الفرصة تفضلى تفكرى كتير جداً بليل  ، و هيرمونات الجسم بليل بتختلف عن الهيرمونات بالنهار كرجالة او ستات ، و دا بيخليكى تفضلى فى مرحلة overthinking خصوصا لو انتى عندك مشاكل كتير فى حياتك ، دا غير ان السهر بيأثر بشكل كبير جدا على شكل جسمك و على صحتك

8-استشيرى الدكتور

لو حسيتى بأعراض غريبة عندك و الاكتئاب مش عارفة تتخلصى منه ، لازم تستشيرى طبيب نفسى بسرعة و متاخديش اى دواء غير بالرجوع و المتابعة مع الدكتور بتاعك  

ودايما خليكى فاكرة .. على رأى كاريوكى 😀

مهما كان قلبك ندمان .. كل حاجة بتعدى ^_^ <3

دلوقتى قوليلنا حاجات عملتيها خليتك تطلعى من فترة اكتئابك بسرعة