6 خدع سريعة هتساعدك تتغلب على العصبية
وأنت قاعد دلوقتى تخيل نفسك في طيارة على بعد 10 آلاف قدم من الأرض ورجليك متعلقة في الهوا ، الباراشوت مربوط على ضهرك ومفروض تنزل حالا … حسيت بإيه ؟
الإجابة هتكون أكيد أن أعصابك اتشدت ، طبعا الموقف ده مش بنعيشه على طول ، لكن أحنا يوميا بنتعرض لمواقف بتضغط على أعصابنا زى أننا نتعرف على ناس جديدة أو أننا نروح انترفيو أو اجتماع مهم أو أول معاد مع الإنسان الى مرتبطين بيه . غالبا في الأوقات دى بنحس أننا مش قادرين على التحدى وبنكون عايزين نهرب من الموقف بأى طريقة ، لكن بيكون أفضل حل هو المواجهة ودى 6 طرق علشان تتغلب على الأوقات دى :
- ركز على أحسن حاجة عندك :
ايه أكتر حاجة بتكون فيها في أحسن حالة ؟ كل إنسان بيختلف عن التانى ، لكن كلنا متفقين أن فكرة أنك تكون في أحسن حالة عندك هي حالة موجودة جواك مش في أي حاجة حواليك . فكر للحظة في الأوقات الى كسبت فيها رهان أو قضيت وقت كويس مع أصحابك أو أهلك في رحلة أو كنت بتمارس هوايتك أو رياضتك المفضلة .
وعلشان تكون في أحسن حالاتك ده محتاج منك حاجتين : أول حاجة هي أنك تجذب كل حاجة حلوة في حياتك وكل الأوقات الى كنت مبسوط فيها ، تانى حاجة هي أنك تبعد عنك كل المخاوف والقلق والشك والعصبية وأنك متفكرش في أي حاجة سلبية.
- نظم طريقة نفسك :
لأننا لما بنكون متعصبين ده بيخلينا نفكر بطريقة غلط أو بنجذب أفكار سلبية كتيرة ممكن تسيطر علينا ، وبنكون في دايرة مقفولة ، ولأن الطريقة الى بنتنفس بيها هي من أكتر الحاجات االى بتتحكم فيك في الأوقات دى ، أى مرة تكون متعصب فيها ركز أكتر حاجة على نفسك وهو بيتحرك جوه وبره جسمك و متحاولش أنك تنظمه بقوة .
ومن أهم تمرينات الاسترخاء هي أنك تأخد نفس لمدة 10 ثوانى وتكتمه وتطلعه براحة وبالتعود والتمرين هتقدر تقضى على التوتر والعصبية .
- عيد ترتيب توقعاتك :
لأننا بطبيعتنا بنحب نوصل لليقين وفى ومحاولتنا أننا نوصل لليقين بنحط توقعات ونتايج كتيرة جدا بتكون بين النجاح والفشل ، لكن للأسف أغلب الوقت التوقعات السلبية هي الى بتكون مسيطرة على عقلنا وبنديها تركيز أكبر وده بيأثر على سلامتنا النفسية ، في الوقت ده بتكون محتاج أنك تتخلص من توقعاتك السلبية علشان تحرر نفسك .
- طمن نفسك :
الأعصاب بتحكى عن كل الحاجات والأحداث الصعبة الى بتحصلنا وبنمر بيها،
ولأننا دايما بنتعب أعصابنا مع أى حاجة مؤلمة ممكن تحصلنا ، حاول على قد ما تقدر تطمن نفسك وتعرف أنك واجهت تحديات كبيرة قبل كده وعديت منها وبقت ماضى ، فحتى لوبتواجه مشكلة دلوقتى خليك واثق أنها بعد فترة سواء صغيرة أو كبيرة هتكون مجرد ذكريات.
- اتقبل فكرة الرفض :
لازم تكون عارف أنك عادى أنك تترفض ومش لازم طول الوقت تتقبل ، أكيد كلنا بنكره الشعور بالرفض ، لكن مينفعش أن الشعور ده يوقف حياتنا ويخلينا بتجنب مواقف كتيرة لمجرد الخوف من الرفض. لازم تحط كل حاجة في حجمها الطبيعى وتعرف أنه مش شرط الرفض يكون لعيب موجود فيك ، وأن ده بيحصلنا كلنا من وقت للتانى .
- اختار أفكارك كويس :
ايه هي أكتر فكرة بتكون مسيطرة عليك وأنت متوتر ؟ ” أنا مش هعرف أعمل حاجة ” أو ” مش هقدر أكمل ” أو ” مش عايز أكون هنا ” …
أكيد مش بتكون مجرد فكرة واحدة سلبية لكن بتكون مجموعة أفكار ، علشان متملاش دماغك بالأفكاردى حاول تدخل فكرة واحدة إيجابية وبالتدريج أفكارك هتتغير ، كمان لو أنت قاعد فى مكان ممكن تغير مكانك وتغير كمان الوضع بتاعك يعنى لو أنت قاعد حاول تقف ، كل ده هيساعدك أنك تطرد اى فكرة سلبية مأثرة عليك .
