أزمة صدمة الطلاق النفسية و تأثيرها على الطفل
صدمة الطلاق من أصعب الحاجات اللى ممكن تمر بيها العيلة لكن المشكلة مش فى الكبار .
لأنها بتكون أصعب على الطفل اللى فى الغالب مش طرف لكن أكتر واحد بيعانى بعد كدا من الصدمة النفسية .
بذات لو كانت الأم والأب من النوع اللى بيخابي مشاكلهم وخناقتهم عن الطفل اللى عايش فى بيئة هادية ومستقرة.
فجأة كل ده يتغير مع صدمة الطلاق بكل ظروفها بترميه فى حضن اضطرابات الصدمةالنفسية.
أزاى و ليه ؟!
- الأب و الأم العاقلين يبدأوا يقطعوا فى فروة بعض بذات فى عز ما الموقف لسه سخن.
- الطفل مضطر يسيب بيته ويعيش مع أمه فى بيت جديد ده لو محظوظ.
- أو مضطر يعيش مع أهل الأم وده بقى حوار تانى لأنه بيتنقل من عيلة مستقرة لبيت كل اللى رايح و جاى يتحشر فى حياته.
- ده غير أن فى أطفال بتحس أنها السبب الحقيقى وراء الطلاق وتدخل بقى فى جو لوم النفس.
- غير أن مستواه التعليمى بيقل أوى وتركيزه بيكون فى الضياع لأنه دايما مشغول بمشاكله.
- الحالات اللى العناد بتخلى الأب يفصل الطفل عن الأم عشان دى صدمة نفسية تانية فوق الطلاق.
بذات لو هيعيش مع حد من أهل الأب اللى مش هيقدر يبقى مسئول عنه لأن فى الحالة دى الطفل ممكن يحس أنه خسر كل حاجة.
عشان كدا مهما كانت الخلافات يا ريت نحاول نتعامل مع الطفل بحرص شديد أوى.
طبعا لو الطفل صغير جدا و مش مدرك للموقف بيكون أحسن بس ما تفتكرش أنه مش حاسس بالمشكلة حتى لو مش فاهم دلوقتى.
نصايح لتخفيف صدمة الطلاق عن الطفل
المحتويــات
1- الطفل مش السبب
حاولى توصلى لطفلك أنه مش السبب لأن عصب عنه هتلاقيه بيقول “أنا مش هزعلكم تاني”، ” مش عاوز لعب و لا حاجات جديدة بس … ”
عشان كدا مهم أنه يعرف أنها مواضيع بينك وبين الأب وهو ملوش علاقة بيه .
لأنه لو فكرة أنه السبب كبرت فى دماغه هتسبب له مشاكل نفسية خطيرة فى المستقبل.
2- بلاش الكدب
يعنى جو ” بابا مسافر و مش قادر يشوفك ده ” مينفعش لأن الكدب هينكشف و ثقته بيكى هتقل.
و هو مش ناقص صدمات عشان يفقد ثقته فى أمه كمان فى أكتر وقت هو محتاج لدعمك وحبك.
وضحى الصورة الحقيقية وبصراحة الطلاق مش معناه أنك مش أم وأب للطفل.
برغم كل المشاكل مهم أن يكون فى أتفاق مسبق ما بين الأب والأم على كل حاجة تخص الطفل.
هيعيش فين ؟
أمتى ممكن الأب يزوره؟
كام مرة فى الأسبوع؟
طبعا ده على أفتراض أن لسه فى بينكوا كلام يسمح باللأتفاق .
3- احترام الطرف التانى أمام الطفل
محاولة كل طرف أنه يسئ للتانى عشان يكسب تعاطف الطفل نظرية فاشلة عشان بتقضى على الطفل.
فيكون أحسن لو كل واحد أحترم الطرف التانى بلاش الألفظ والشتيمة للأب أمام الطفل و العكس .
لأنه مش هيكره اللى بيتشتم بس لا كمان هيكره الطرفين.
4- سبيه يعبر عن مشاعره
بلاش تجبرى الطفل على تقبل فكرة الأنفصال بالعافية بالعكس سيبيله فرصه يعيط ، يشتكى.
يعبر عن مشاعره ،حزنه وغضبه لأن الكبت ممكن يوصله لاضطرابات ما بعد الصدمة.
5- المشاركة
الحياة الجديدة محتاجة شوية تلميع عشان تعجبه، يعنى أيه ؟
الطفل أكتر واحد محتاج يحس بالتجديد حلو أنك تضيفى على روتين حياتكوا أنشطة جديدة تكون خاصة بيكى أنتى وهو بس .
و كمان تكون حاجات مسلية ولطيفة بالنسبة ليه تدعم علاقتكوا وتساعده يحب حياته الجديدة.
أقدمي لطفلك مميزات عشان يتقبل العيشة ويقدر يكمل من غير حالات غضب وحزن دائم.
الطفل بيكون لسه فى مرحلة أنتقالية كبيرة عليه عشان كدا محتاج منك دعم و حب.
فبرغم حالتك النفسية السيئة بعد الطلاق إلا أنك لازم تعرفى أن هو أهم طرف فى الحدوتة لو وحشة فهو أكتر واحد هينضر.
أيه أكتر حاجة بتأثر فى الطفل وقت الطلاق ؟!
