10 جمل هاتهدم علاقتك بمريض الاكتئاب
الاكتئاب بقى مرض العصر من كثرة المشاكل والضغوط وأسباب كتيرة، بقى بسهولة جداً تلاقي شخص قريب ليك عنده اكتئاب، من غير قصد بنبدأ نقوله جمل هو مش هيتحملها في الوقت دا، بنكون فاكرين أننا بالجمل دي خلاص هنحل الموضوع والعلاقة بينا هتتحسن، لكنها بالعكس بتسوء أكثر
10 جمل مينفعش تقولها لحد عنده اكتئاب
1-هو أنت مكتئب؟
- أنت لما هتسأل شريك حياتك ولا صديقك السؤال دا متخيل هيرد عليك يقولك أيه؟ يعني شكله زعلان من البرد مثلاً، فلاش السؤال الأستفساري العجيب دا، خصوصاً لو مكئتب ومش حابب يحكي أو باين عليه
2-مش أحسن لو مكان :
- صيغة مش أحسن لو مكان صاحبنا إلي البيت وقع عليه وخسر فلوسه، وتفضل تقوله في قصص مأساوية عن كل الناس عشان تبين ليه أنه أحسن، مش وقته خالص المقارنة، هو حاسس الدنيا كلها طابقة عليه فمش هيشوف نفسه أحسن من حاجة
3- معلش :
- بجد مش عارفة من غير المعلش دي كان ممكن يعمل أيه، كان هيفضل قاعد متأثر نفسياً مستنيك تمعلشه، بلاش كلمة معلش لأنها بتضايق أكثر، حاول تخرجة من حالتة من غير معلش، أقرا المقال دا عشان تعرف تستخدم أيه بدل معلش معلشني شكراً: لقد أوشك رصيدك على النفاذ
4- هتعدي والجاي أحسن :
- مش وقت تامر حسني خالص، هو أخر ما جايب تعبه دلوقتي، فهتفضل تقوله هتعدي وبكرة أحسن وجو التنمية البشرية دا مش هيجيب معاه
5- العياط مبيرجعش إلي راح :
- متمنعوش أنه يعيط بالعكس خليه، العياط طاقة سلبية ووجع وكلام مش عارف يقوله بيخرج في شكل دموع، رحمه من ربنا عشان متتخزنش جوانا، فمتقولوش أسترجل متعيطتش، الموضوع ملوش علاقة بالرجولة، ولا تقول العياط مبيرجعش إلي راح، هو إلي راح كدا كدا مش هيرجع بس سبها تعيط، حقها تخرج وجعها
6- لازم تحكيلي :
- هو مش حابب يحكي، متجبروش، بلاش زن، مش عايز يحكي عشان مش قادر يتكلم مش عشان مش واثق فيك
7- هو إلي عندك دا ليه وهيخلص أمتى :
- والله هو لو كان عارف إلي عنده دا ليه كان خرج نفسه من الاكتئاب، بأنه يشيل السبب، ولو عارف الاكتئاب هيخلص أمتى، كان سافر قعد مع نفسه الفترة دي في جزر المالديف يتأمل القمر في أنتظار أنتهاء الاكتئاب
8- الاكتئاب مش للي زيك :
- مهما بلغت قوتة وتفائلة وشجاعته وشغله وطموحه، عادي يجيله فترة ضعف ويقع، والشخصيات القوية بتبقى أكثر ناس الاكتئاب صعب عليها، بيكون صعبان عليها نفسها، وصعبان عليها وضعها وصعبان عليها معاملتكم ليها، مبتحبش تشوفف نظرات الشفقة عليها، بس كمان متمنعوهمش أنهم يكتئبوا ويضعفوا، الاكتئاب بيجي في أي وقت سواء كان شاب أو مراهق وحتى الأطفال، فمفيش مقولة الاكتئاب مش للي زيك
9- لما تهدى أبقى كلمني :
- هو مش قادر يهدى واحتمال لما يهدى ويفهم أنك اتخليت عنه ميكلمكش أصلاً، أنت ممكن تبقى جمبه من بعيد لبعيد وتطمن عليه وتديله الأمان، بدل ما تقوله لما تهدى كلمني، حاول تسنده لحد ما يهدى أكيد محتاجك جمبه حتى لو مقالش دا
10- الموضوع مش محتاج دكتور :
- أنت عرفت منين؟ الاكتئاب مرض نفسي زي الأمراض العضوية، لو حد تعبان هتقوله متروحش للدكتور، أقعد متتعالجش، مش شرط علاجه يحتاج أدوية ممكن يبقى بتعديل سلوك، أو جلسات مع مدرب ينظم ليه المشاكل ويساعده فيها، حد متخصص يقدر يطلع معاه الكلام إلي ميقدرش يخرجه غير معاه
مريض الاكتئاب غصب عنه مبيقدرش يشوف أي جمال ولا فرحة ولا هو عاجبه حالته دي، ممكن تساعده بأنك تقرب منه ومتحسسوش أن مرضه خطير، أهتم بيه وأديله من حبك، مش محتاج غير حب وأهتمام تساعده بيهم لكن بالعصبية وتهويل الموقف والاهمال تعبه هيزيد أكثر وهتفقد بسببهم إنسان بتحب
شاركونا بأكثر الجمل إلي بتضايقك لما حد يقولهالك وأنت مكتئب؟
