ديسبراكسيا ” أيه أنواع صعوبات التعلم عند الأطفال ؟
أتكلمنا سوا قبل كدا عن صعوبات التعلم و تأثيرها على الطفل بذات أن مفيش علامات محددة ممكن تكشفلك الموضوع من بدرى.
لأن الحكاية دى ممكن يعانى منها الأطفال الطبيعين و كمان اللى بيعانوا من مشاكل أو إضطرابات نفسية .
يعنى هى مشكلة عامة رغم أن المتخصصين بيعرفوها عن طريق مقارنة نتائج الطفل بالمتوقع منه فى العادى طبعا حسب مستوى ذكاءه و سنه.
بس بيكون عندنا علامات عامة خصوصا مع الأطفال فى سن المدرسة لو أتجمع منها 3 أو 4 يبقى ممكن طفلك يكون بيعانى من نوع من أنواع صعوبات التعلم.
ايه هى أعراض صعوبات التعلم عند أطفال فى سن المدرسة ؟
- بيكون صعب عليه أوى أنه يتعلم الحروف الأبجادية.
- مش بيعرف يربط بين طريقة نطق الحرف و تكوين الكلمات.
- مشاكل في تعلم الأبجدية، نظم الكلمات، أو الربط بين الحرف وطريقة نطقه.
- دايما يكرر نفس الغلاطات لما يقرأ بصوت عالى و يبدأ يتلجلجفى الكلمات اللى الأم أو المدرس متأكد أنه عارفها كويس.
- بيكون صعب عليه يفهم الكلام و هو بيقرأ.
- ده غير مشكلة الهجاء مهما حفظ الكلمة برده ميعرفش يتهجى صح.
- مش بيعرف يمسك القلم صح و خطه وحش و مش مفهوم.
- مش بيعرف يعبر عن أى فكرة بالكتابة كمان تكوين الجملة بيكون مشكلة صعبة بالنسبة له .
- عنده دايما تأخر فى تعلم اللغة و نطق الكلمات مش بيعرفيحفظ مفرادات كتير ذى أصحابه فى الفصل.
- عنده مشاكل فى انه يفتكر الحروف بتنطق أزاى ؟ عشان كدا تلاقيه بيعطل شوية قبل قراءة أى كلمة.
- متلخبط فى الأتجاهات ميعرفش يمينه من شماله.
- بينطق الكلمات غلط كما بتلخبطه الكلمات لما تكون شبه بعض.
- عنده مشكلة كبيرة مع فهم العمليات الحساب و الأرقام .
- كمان الرموز الحسابية بتعقده و تخليه حتى مش عارف يقرأ الأرقام حتى لو كان عرفها كويس.
- بيواجه مشكلة في تكوين جمل التعبير سواء كانت دراسته عربى أن إنجليزى.
- مبيعرفش يحكى أى حكاية بالترتيب فممكن يبتدى من النص بعدين يرجع تانى للبداية و بعدها ينط حته مش مركز فى تسلسل الأحداث.
- عنده مشكلة فى التركيز مبيعرفش يخلص أى مهمة بيبتديها.
أيه أنواع صعوبات التعلم ؟
فى صعوبات تعلم كتير أوى و يعتبر أشهرها :
صعوبات القراءة : أسمها العلمى ” الديسلكسيا ” و دى بتضم صعوبات القراءة، الكتابة، النطق و التحدث.
صعوبات الحساب : و أسمها العلمى “الدسكلكوليا” وبتشمل العمليات الحسابية ، فهم الساعة و التعامل بالفلوس.
صعوبات الكتابة : ليها أسم علمى برضه ” ديسجرافيا ” و تضم مشاكلات الخط، الهجاء وتنظيم الأفكار.
خلل الأداء أو اضطارب التكامل الحسي : ده بيسمه علميا ” ديسبراكسيا ” و بيضم مشاكل الاتزان و التوافق بين أداء الأيد و العين أو ذى ما بنسمع دايما من مدربين الرياضة التوافق العضلى و العصبي.
خلل الكلام : و ده بيسميه الماتخصصين ” ديسفازيا ” متعلق بمشاكل فهم اللغة و ضعف قدرات القراءة.
اضطراب السمع: ممكن كمان تكون سبب فى صعوبات التعلم .
عشان مشاكل السمع بتخلى من الصعب على الطفل أنه يفرق بين أصوات الحروف.
كمان بتضم مشاكل القراء، كتابة الجمل و تعلم اللغات بشكل عام.
اضطراب المعلومات المرئية: و بتكون المشاكل في ترجمة العقل للمعلومات اللى عنينا شايفها .
عشان كدا بتضم مشكلات القراءة، المسائل الرياضية، قراءة الخرائط و تميز الصور والرموز.
طبعا غير مشاكل و إضطرابات الأطفال اللى بيكون صعوبات التعلم نتيجة ليها ذى التوحد و إضطرابات فرط الحركة و النشاط .
لو حسيتى أن أبنك عنده حاجة من الأعراض ديه فى يكون من الأفضل أنك تدورى على مساعدة من المتخصصين .
عشان تقدرى تعرفى عن طريق الفحوصات و الأختبارات السبب الحقيقى اللى وصله لكدا ده إذا كان عنده صعوبات التعلم أصلا .
كمان لما نكتشفها بدرى ده هيساعدنا نوفرله برامج العلاج اللى هيسهل على الطفل التعليم و يوفرلك أساليب كتير عشان تقدرى تحسنى مستوى ابنك.
