تعرف حد من ” الشخصيات المؤذية “.. يبقى لازم تجري يا مجدي
وأنت بتدور على شريك حياتك لازم تأخد بالك أوي لما تلاقيه من تصرفاته، لأن تصرفاته هتبقى أفعاله ومبادئه، ودا هيعكس تعامله معاك بعد كدا، وهيقولك هتبقى مرتاح معاه ولا لأ، صحيح مرآيه الحب عامية، لكن مينفعش المراية تتكسر في قلبنا وتخنقنا وتموت فينا الحب والحياة، فيه أنواع من الشخصيات المؤذية بيكون وجودك معاهم صعب ويكاد يكون مستحيل.
أنواع الشخصيات المؤذية
1-الشخصية السوداوية الكئيبة :
على طول حزينة ومتشائمة والدنيا سودا، والحياة زي الزفت، والناس كلها عندهم حظ وأنا معنديش، دا نوع من الحقد والحسد، هتقعد مع حد مش راضي بالي في أيده أنت متخيل أنه هيرضى بيك مهما عملت؟
2-النرجسي المغرور :
كل كلامه عن نفسه وعن إنجازاته وعن هو عمل أيه وهو يستحق أيه وهو عاوز أيه، عمره ما بيفكر أنت إحتياجاتك أيه ولا عاوز أيه، عمره ما فكر فيك لأن عقله طول الوقت مشغول بنفسه، دي عقدة نقص بيعوضها في شكل الغرور
3-الشخصية المزاجية الغير مسؤوله :
كلنا حالتنا بتتغير حسب اليوم ووضعنا وخصوصاً لو ستات عشان الهرومانات، لكن فيه شخصيات مش مسؤوله أبداً عن قرارتها، مش هتخليك مستريح وأنت معاها، يوم يكون بيحبك ويوم بيحب غيرك، يوم مهتم ويوم ملوش نفس يكلمك، العلاقة هنا هتبقى شبه الملبيه حبه فوق وحبه تحت وأنت مش عارف راسك من رجلك
4-الشخصية الأتكالية :
حبوني، اسألوا عني، ليه مش بتسألوا عني وتجبولي ورد، اعملولي الشغل دا عشان مش في المود، دي الشخصية إلي نفسها حد يتبناها ويحبها ويجبلها ورد وشكولاته ويشيلها ويهشتكها وينيمها ويصيحيها الصبح يجبلها الفطار لحد السرير
5-الشخصية العدوانية :
طول الوقت بتحب الخناق والعنف، عايشة في حلبه مصارعة، كل موضوع بسيط بتكبر فيه عشان تعمل مشكلة وتسيطر عليك وتعند حتى لو هي إلي غلطانة، بتعتمد على العنف اللفظي والجسدي سواء كان ضرب أو تحرش وبيوصل لـ الإغتصاب
6-الشخصية المدمنة :
سواء كان إدمان مخدرات أو عادات سيئة، المدمن بيكون عبد لشيء، مش حر نفسه ولا مسؤول عن تصرفاته بالتالي مش هيكون قادر كفاية أنه يكون مسؤول عنك
أفعال الشخصيات المؤذية
1- المسيطر :
- الكلمة كلمته، والرأي رأيه، مينفعش تقولي رأيك ولا تتناقشي معاه، ولو حاولتي هتتقابلي بهجوم وأنتقاد ليكي وممكن يوصل للضرب، أو حتى التهديد بالضرب، هيحاول يخوفك منه ومن نفوذه ومن حمه المحامي إلي هيخليكي تتنازلي عن كل حقوقه لو مسمعتيش كلامه
- فيه بعض الناس عندهم صفات القيادة لكنها بسيطة في شكل حابب أعرف الأول وتسمعي كلامي بس عادي لو عملتي حاجة مقتنعة بيها، لازم نفرق بين المسيطر والقائد
2-الإهانة :
- الشخص الغير سوي بيحب دائماً يستخدم ألفاظ تقلل منك ومن شغلك ومن شخصيتك، حتى من أختياراتك لأصحابك ولبسك، سواء كانت أهانة لفظية أو حتى غير لفظية في شكل نظرات، بيرمي الحاجات في وشك
3- العزل :
- هيبدأ يعزلك عن العالم الأول بالطريقة الحلوة أقعدي معايا، 24 ساعة سوا، وبعد كدا هتحسي أن كل الناس والعالم بتبعد وأنك بقيتي لوحدك معاه، ومع الوقت لما هتحاولي تخرجي من الدايرة دي هيبدأ يعزلك بالفعل وبالتهديد والحبس في البيت
4- أنتي السبب في كل حاجة :
- هيبدأ يحسسك أنك المسؤول الأول والأخير عن كل حاجة، حتى لو كانت تغيراته المزاجيه، وهيبرر أفعاله بأنك السبب، منا ضربتك عشان أنتي إلي عصبتيني، مهو لو تسمعي كلامي من الأول مكنش حصل دا كله، وهو ملوش دخل كل أفعاله رد فعل على عمايلك أبداً، دا تقريباً شخصية والدته معرفتوش يعني أيه عقاب لما تغلط فمبقاش يتحمل نتيجة أفعاله
5- عديم الأخلاق والدين :
- مبيراعيش حقوق ربه هيراعي حقوقك، وبردو بلاش تنخدعي بشخصيات متدينة شكلاً لكنها مضموناً بتأخد الدين من غير فهم، زي إلي يقولك الراجل ليه يتجوز أربعه وهو أصلا مش عارف يلبي طلباتك ويعاملك بما يرضي الله
- إلي هتلاقي معاملته مع الناس وحشه مكروه من الناس ومن أهله دا محدش يرتاح معاه أبداً
- بيكذب، مش واضح ومش مفهوم ومش مريح، تسأليه على سؤال يماطل ولو جاوب هتلاقي نص أجابته كذب
6- البخيل :
- البخيل في مشاعره، مش بيراعي أحتياجاتك العاطفية، وحبك ليه، هو بيخاف يخرج مشاعره تقل
- البخيل في الفلوس، مش عاوز يخرج الجنية من جيبه يموته
- البخيل في تعامله، وأعتذاره وكلامه، في خروجاته، نفقاته، تلبيته لطلبات البيت وليكي
7- النسوانجي
- سواء كان لسه بصباص صغير بيبص من غير ما تأخدي بالك أو كان خاين على كبير وبجح، الخاين لا يؤتمن، مش مجبره أنك تعيشي مع حد بيخون، إلي بيخون بيخون لمبدأ الخيانة مش لمبدأ الأحتياج، هو معندوش بيديهيات مبدأ الأخلاص أصلاً
كل شخص فينا جواه عيب ممكن يضايق شريك حياته لكن لو العيب دا هيقتلك مع الوقت يبقى لازم تأخد حذرك وتهرب منه بسرعه، تلحق نفسك، و خلي بالك لتكون من شخصيات القط ميحبش إلا خناقه وعندك متلازمة ستوكهولم: ليه القط بيحب خنّـاقه؟،كمان العيوب إلي فينا بدرجات فيه درجات عادية ممكن نتحملها ومع الوقت بتتحل، ولو طلبنا منهم يتخلصوا من بعض الصفات البسيطة عشان حبنا وأستجابوا تمام، لكن فيه صفات بتبقى طباع والشخص رافض تماماً أنه يعترف بيها، عشان كدا ألحق نفسك، تابعونا عشان نقولكوا حلول لو بتتعاملوا مع الشخصيات المؤذية
قولولنا أيه أنواع الشخصيات المؤذية إلي قابلتوها ولو قدرتوا تغيروها شاركونا بتجاربكم؟
