9 مواصفات لـ شريك حياتك لازم تبقى موجودة لعلاقة صحية
شريك حياتك ، فارس الأحلام، كلنا بنحلم بشريك يكملنا ويكمل معانا مشوارنا، لكن وأحنا بندور عن الشريك بننسى أهم حاجة المعايير، المعايير اللي هتخليني أكمل معاه، صفات لازم تبقى فيه، حتى لو بنسب، لأنها إلي هتخلينا نكمل العلاقة وأحنا مرتاحين، وحاسين بالحب والأمان، هي الي هتحسسنا أن بكرة أحسن عشان هو جمبنا وعشان كدا عملنا ليكم :
9 حاجات في شريك حياتك المناسب
1- التواصل، التفاهم :
- التواصل بالكلام والأفعال مهم عشان تبدأي علاقة صحية مع شريك حياتك، وهو أول أساس بيحافظ على العلاقة.
- في أول العلاقة هتلاقي فيه مشاكل، مينفعش تحصل مشكلة تتحملها لوحدك، أو تسكت عن حقك، بالعكس، أتكلم مع شريك حياتك فالمشكلة، حصلت ليه وعشان أيه كبرت، طيب بعد كدا نتجاوزها أزاي، أوعى تحمل الطرف الثاني المسؤولية الكاملة عن أي مشكلة، أي مشكلة بيكون السبب فيها الطرفين، وممكن ناتجة بسبب سوء الفهم مش لعيب منكو! “استفيد من أي مشكلة تحصل بأنها تبني جسر بينك وبينه”.
- أحنا مش شبه بعض أبداً ولازم تتقبل فقرة أن شريك حياتك عنده أختلافات معاك، مينفعش أبداً يكون أختلافنا هو سر خلافنا ومشاكلنا، بالعكس، أبدأوا أتكلموا وأتعرفوا على أختلافات بعض وتقبلوها لو كانت أختلافات جوهرية
- أفهموا كل واحد فيكوا بيحب يعبر أزاي ومحتاج أيه، طبيعي جداً تكون أنت متكلم وبتحب تعبر عن حبك بالكلام وهو بيحب يعبر بالأفعال بس المهم تحاول تعبر بلغته هو، ممكن تقروا المقال دا هيفيدكوا أكثر أنا هتكلم هندي وأنت بتفهم فرنساوي، ممكن نتفاهم؟
- تقبل العيوب، أنكو تتفهموا عيوب بعض، عيبه أنه عصبي وأنتي عيبك أنك رغاية وبتحكي لكل الناس كل حاجة، هنا مينفعش نفضل نبص على العيب كأنه العقبه اللي هتموتنا بالعكس، حاولوا تتوصلوا لحل، زي أنه لما يتعصب ينعزل في أوضه بعيد عنك لحد ما يهدى وأنتي تحاولي تكتبي اللي مضايقك في ورقة ودا هيخليكي تفكري بعقلك أكثر من مشاعرك وهتقدري لما تكلمية تكون المشكلة واخده حجمها مش أكبر من حجمها.
2- الحدود :
- صحيح أنك لما بتحب حد بتبقى عاوز تلغي كل الحدود وتكون أنت وهو شخص واحد، لكن أنتو شخصين وهتفضلوا شخصين، لكل واحد فيكوا حياته وعالمه ومستقبله، إلي لازم الطرف الثاني يحترمها وميحاولش يقلل مساحة العالم دا، وأنت تحاول توازي بين عالمك وحياتك وبين شريك حياتك، متجيش على حاجه عشان حاجه، ولا تخليه محور حياتك وتنسى نفسك وشخصيتك عشان ترضي طلباته، لأنه مع الوقت هتبقى مسخ، وهو نفسه هيزهق من المسخ دا لأنه حبك أنت، فلازم يحترمك زي ما أنت مش الصورة اللي بيحاول يعملها عشان ترضيه.
- لازم تبقى فاهم أن الحدود هي مساحة أحترامه لحياتك الخاصة، لكن دا ميمنعش أبداً أنه لما يسألك عنها تجاوبه من غير ما تجرحه وتقوله دي حياتي مينفعش تتدخل فيها!
3-أطلعوا سلمه لقدام :
- الحب والعلاقات زي الزرع محتاج تسقيه عشان يكبر، العلاقة اللي واقفه على نفس الحال من مدة طويلة هتموت من الملل قبل ما هتموت من المشاكل.
- التجديد مطلوب في كل حاجة، أبدأوا فكروا في حاجات جديدة تعملوها سوا، فكروا في مستقبلكوا لو بتحبوا بعض أرتبطوا، لو مرتبطين أتخطبوا، لو مخطوبين أتجوزوا، حتى فكروا في تجهيزات الجواز بدل ما تتزنقوا وقتها وتعملوا مشاكل كثيرة فكروا من دلوقتي.
4- الدعم والتشجيع والدعم تاني وثالث :
- الحياة صعبة، كلنا محتاجين للشخص اللي يشجعنا ويدعمنا في كل خطواتنا، يشجعنا حتى لو وقعنا أننا أقوياء ونقدر نقوم من أول وجديد، يدعمنا في كل الأفكار المجنونه لأي مشروع بيجي في بالنا حتى لو مشروع خيالي.
- لو شوفت نظرات الفرحة في عيونه، فرحان بيك بنجاحك وكأنه نجاحه، تشجيعه ليك تنزل وتمارس شغلك وتعمل الحاجات اللي بتحبها، أتمسك بيه.
- الدعم والتشجيع هي أكثر الحاجات اللي بتحسسنا بالأمان ومجرد ما هتحس بالأمان هيكون حبك أكبر وحياتك هادية، لأنك عارف أن فيه حد بيسندك وهيسندك لو وقعت، حد بيدعمك في حزنك قبل فرحك، لأنه بيحبك وعاوز يشوفك الأحسن.
5- التدين ، الدين معاملة :
- التدين هنا شامل تعلقه بدينه وفرائضه، بيحافظ عليها وبيبعد عن الحرام عشان عاوز رضى ربنا،”الي يراعي حقوق ربه عمره ما يجرح قلب حد”
- كمان في معاملته، بيعمل بالصلاة والصوم وباين في أخلاقه الإحترام والإلتزام في معاملته مع الناس، معامله كويسه، كلامه كويس بيحترم غيره، عارف المعاني الإنسانيه وبيحافظ عليها
- وأكيد في معاملتة مع أهل بيته، والدته وأخواته، لو لقيتي الي بيحب والدته وأخواته وعاوز يسعدهم وبيفكر فيهم دائماً، أتجوزيه إلي يراعي أمه هيراعيكي
6- الصدق، الوضوح :
- صادق في كلامه ووعوده الي بيقوله بينفذه، صادق في كلامه، مريح، لما بيعمل حاجة مبخبيهاش وبيقولك عليها، معروف عنه الوضوح مش اللف والدوران، مفيش حاجة في حياته خفية خايفك تعرفيها، بيقولك على كل حاجة أول بأول، من الآخر مبيخفش يقولك على غلطاته ولا عيوبه ولا بيحاول يجمل غلطه بكذبه لا بيحب الصدق.
7- كريم في كل حاجة :
- الكرم العاطفي : حنين ورمانسي وبيقدر وبيسند وبيعرف يشجع ويقولك كلام كويس، كريم في وقته معاكي وكلامه، أول ما تحتاجيه بتلاقي أحتياجك وزيادة
- كريم مادياً : الموضوع مش مرتبط بحالته المادية، لكن بكرمه هو حتى لو دخله عادي، لكنه بيحاول يوفرلك كل حاجة
- كرم أجتماعي : بيقدر لو بتحبي الناس والخروج بيخرجك، وبيقدر زيارة أهلك وصحابك
8- المسؤولية والطموح:
- مسؤول عن نفسه وعن الي حواليه، حاسه برجولته من خلال أفعاله، المسؤولية من أهم الصفات في الراجل وحتى الست المسؤولية مهمة لبعد كدا، هتكونوا مسؤولين عن بيت وكل طرف فيكوا مسؤول عن التاني فلازم نختار حد بيتحمل يشيل مسؤولية
- الشخص المسؤول هو الي يقدر يصون شرفه وأهل بيته، لو حد أتعرض ليكي هيكون مسؤول عن حمايتك ومسؤول حتى عن حمايتك من نفسه
- المسؤولية بتقولك أن الشخص دا ناضج، لأنه قادر يتحمل أختياراته ويحافظ عليها ومما يعني أنه مقدر أختياره ليكي وهيحافظ عليكي بكل الطرق لأنك أختياره
- مسؤوليته عنك هتعلمه يكون مخلص ليكي، أنتي الوحيدة في قلبه، مينفعش يشارك مشاعره مع غيرك
- عارف هو عاوز أيه، عارف مستقبله هيكون أزاي، طموح دائماً يتحسن ويوصل لحاجة أحسن .. خليكي مع الشخص الطموح لأنه مهما وقع عارف أزاي يبدأ جديد
9-والله والله دمه خفيف :
- لسه قايلين الحياة صعبة، والضحك بيطول العمر، مش لازم يكون ماشي طول الوقت بيقول نكت، لكن بيعرف يخليكي مبسوطة، بيعرف يخرج الضحكة منك ومن المواقف بيعرف يهزر
شاركونا وقولولنا أيه موصفات شريك حياتكم ولقيتوها ولا لسه؟
