اكتئاب ما قبل الحيض: مليش نفس أعمل حاجة

كام مرة قومتي من النوم تعبانة وزهقانة وعوزة تعيطي،الموضوع بسيط جداً هو اكتئاب ما قبل الحيض(premenstrual syndrome (PMS)، أو متلازمة ما قبل الحيض .. معظمنا بنسبة 80 في المية بيجلنا فترة التعب اللي بتكون قبلها بأسبوع في شكل تعب وتغير في المزاج وميل للإكتئاب وعياط غير مبرر،دي حاجة عادية جداً نتيجة انخفاض مستوى السيروتونين وهو المادة الكيميائية في المخ والمسئولة عن التغيرات المزاجية والنوم، يعني عادي أعراضها هتنتهي قبل الدورة بيومين وهترجعي عادية والموضوع عادي مش جنان ..

الأعراض بتزيد في حالة :

1-المنبهات : قهوة ، شاي، كافين، زيادة هتزود الألم

2-التدخين

3-الضغط النفسي: طبيعي جداً لو طول الشهر عايشة في صراع وضغط هيأثر على جسمك وهيزود التعب

4- وراثة: تعب ما قبل الدورة ممكن يبقى وراثة، عادي تلاقي ستات مبتتعبش قبل الدورة وتلاقي ست تانية بيجلها كل الأعراض دي مع تعب زيادة، النسيان، العنف أيوة ميل للضرب أو الخناق “قوم يا صلاح عوزة أتخانق” الأرق وقلة النوم

5- الهرومونات: زيادة  معدل الاستروجين/ بروجستيرون، هرومون زيادة الأنوثة وعشان زادت أنوثتك زادت عاطفتك واحتياجك للعاطفة وعشان كدا بتخرجيها في شكل إكتئاب وعياط ، كمان نقص مستوى الإندورفين (المورفين الداخلي) ودا مسؤول عن تخفيف حدة الألم لما يقل بيزيد التعب  

أيه هي أعراضها

ا- اضطرابات المزاج : قلقانة من أقل حاجة، العصبية من أقل تصرف لو حد نقل حاجة من مكانها حتى، الميل الإكتئاب، الخنقة، مش عوزة تخرجي، مش طايقة حد ولا طايقة نفسك، التقليل من الذات شكلي مش حلو.. إبعدي عن الناس البلاستيك.

ب- اضطرابات السلوك: عوزة تأكلي كتير وخصوصاً السكريات وممكن العكس ملكيش نفس تأكلي، طول الوقت عوزة تعيطي، وتجيبي أغاني كئيبة وتعيطي ليه مزاج أعيط يا عم،أقل صوت ولا حتى خرفشة تركيزك بيضيع

ج-تغيرات بالوظيفة الجسمية: زيادة في الوزن بسبب الكمية اللي كلتيها وأحتباس الماية، صداع، دوخة، تورم الثدي، الأرهاق، تعب أسفل الظهر،القدم، حدقة العين بتوسع والنظر بيقل،أنتفاخ، مغص، ألم في العضلات والمفاصل، الحبوب بتزيد سواء حب الشباب أو فجأه تلاقي حبه في نص وشك

فلو كان بيحصل معاكي خمس أعراض على الأقل من دول قبل الدورة بأسبوع بتختفي قبلها بيومين وبترجعي طبيعية يبقى دي أعراض إكتئاب ما قبل الدورة

نصايح بسيطة جربيها عشان تخففي إكتئابها وتعبها:

1-  التقليل من حبوب منع الحمل عشان الهرومانات تتظبط عندك وياريت تشوفيلها بدايل لانهـا مُضرة.

2-الرياضة: ساعة رياضة في اليوم الصبح، رياضة خفيفة جري، نط حبل،مشي، زومبا، هتظبط مزاجك وتخفف الألم

3-الأكل: الأسبوع ما قبل الدورة زودي كمية الكاربوهيدرات (موجودة في المكرونة والرز والعيش) ونسبة البروتين(اللبن والبيض والجبنة) المكملات الغذائية (فيتامين B6 ، فيتامين E ، الكالسيوم و المانجنيز ) ، التقليل السكريات والكافين(قهوة، شاي، تدخين) والمشروبات الغازية مش ناقصة أنتفاخ، بلاش تتقلي في الأكل بليل عشان هتحسي بكسل تاني يوم

4- الماية الدافية: حمام ماية دافية بليل مفيد لبسط عضلات الرحم وعشان يحل مشكلة الأرق

5-اليوغا: مع الموسيقى هادية هاتيها من اليوتيوب وشغليها بهاند فري وتخيلي أنك شايفة نجمة وركزي خيالك عليها مع نفس عميق من الأنف بيخرج براحة من الفهم هيقلل التوتر والعصبية

6- ملابس مريحة: مش وقت أناقة أسبوع الموضة، ألبسي اللي يريحك ويريح جسمك

7-الدعم المعنوي: أطلبي دعم معنوي وعاطفي من صحابك جوزك، أهلك،الحب كفيل يخليكي هادية وتعبك يقل

8-كسر الروتين :غيري جو أخرجي برا البيت وبرا الروتين، روحي أي مكان بتحبيه، أتمشي، كلي برا البيت حاجة بتحبيها

9-الفصلان: من توتر الشغل وتوتر البيت، أطلبي المساعدة، حد يساعدك في الشغل أو في البيت وفترة وهتمر

10-أسأل مجرب: أسألي الستات الأكبر سناً كانوا بيعملوا أيه وبيأكلوا أيه لو عندهم جديد وأبعتيلنا