7 حاجات في لغة الجسد تخليك على وضعك مع الناس

كام مرة و انت فى وسط مجموعة جديدة من الناس حسيت انك قلقان و مش عارف تتصرف على طبيعتك و بتهته فى الكلام، و مش عارف تجذب انتباه اى حد من اللى قاعدين؟ كتير صح؟ نفسك الوضع ده يتغير بس مش عارف ازاى؟ .. تعالى اقولك ازاى:

1- متتكلمش من مناخيرك:

متخليش نبرة صوتك رفيعة علشان ده بيدى ايحاء انك متوتر او بتسعى لجذب الانتباه، و فى نفس الوقت متتكلمش بصوت رخيم كأنك شغال voice over لمسلسل اكشن، اتكلم ببساطة و اريحية كانك بتتكلم مع اى حد من صحابك، و علشان قطعة النفس اللى بتحصلك فى نص الكلام دى، خد نفس عميق قبل ما تتكلم، و فكر لمدة 30 ثانية و نظم افكارك.

2- حافظ على طبقة صوتك:

ماتجيش فى اخر الكلام و تتكلم كأن صوتك بيختفى، ولا تتكلم بسرعة، لان ده بيترجم للى قدامك انك مش مقتنع باللى بتقوله و مش شايفه مهم انه يتسمع!

3- بطل ال “مممم”:

لو معندكش حاجة ترد بيها بسرعة، اسكت لحظة، الصمت ده هيخلى اللى قدامك يتكلم علشان محرج، و الموقف يعدى.
و ممكن كمان تملاها بكلمات ليها معنى ضمنى، جرب تتفرج على خطابات الرؤساء فى الانتخابات (الامريكان خاصة) هتعرف يعنى “املى الوقت بكلام” من غير ما اقول اى حاجة اطلاقا!

4- متربعش:

متربعش دراعاتك، لان الوضعية الدفاعية دى بتدى ايحاء انك منغلق و كتوم، اقعد قاعدة طبيعية كأنك بتتفرج على التلفزيون!

5- ما تتنحش:

ماتفضلش باصص فى عين اللى قدامك طول الوقت، و لا تبعد عينيك عنه طول الوقت علشان ماتبانش خجول و انطوائى و مش واثق فى نفسك، امشى بقاعدة ال80 20 حافظ على التواصل بالعين 80% من الوقت، و 20% الباقيين على باقى الناس حواليك.

6- الاهتمام مبيطلبش:

ادى للى قدامك كامل اهتمامك، لو انت قاعد وسط جروب و حد جديد دخل عليكوا، اتحرك بكل جسمك ناحيته و سلم عليه بإبتسامة لطيفة و حسسه قد ايه انت مرحب بيه، و بكدة تبقى كسبت اعجاب واحد من ضمن الجروب اللى انت قاعد معاهم، لأن كلنا بنحب الاهتمام، كلنا عاوزين نجذب اهتمام اللى حوالينا، فا لو انت اديت الاهتمام ده بصدق من غير تصنع و من غير ما الشخص اللى قدامك يطلبه، هتبقى كسبته من غير اى مجهود.

7- ادينى تفاصيل:

لما تبدأ كلام مع شخص غريب اول مرة تقابله، متقولش “ازيك عامل ايه” و تسكت، حاول تخوض فى تفاصيل شخصية و فى نفس الوقت هيكون مرتاح انه يشاركها معاك، زى مثلا “صباح الخير ايه الاخبار انا انجى” طبيعى هيرد يقول مثلا “صباح النور ازيك يا انجى، انا ليث” فا ارد اقوله “اسم جميل يا ليث، طبعا وراه قصة مش كدة ههه” و بالتالى ليث هيحكيلى ليه اهله سموه الاسم ده و يبدأ يخش فى تفاصيله الشخصية وهو مبسوط ان حد مهتم ومتجاوب معاه، ونبتدى نتجاذب اطراف الحديث ونتواصل بطريقة سلسة جدا، على عكس لو كنا كملنا بمنهجية “ازيك” .. “تمام وانتى”.

و اخيرا، العلاقات الانسانية عبارة عن تواصل، و التواصل ده بيحصل بالكلام، و بالجسم، و بالعيون، و بتعابير الوش!
فـ علشان تعرف إمتى وإزاى تستخدم انهى وضعية لجسمك وانهى نبرة لصوتك، لازم تعرف طبيعة البنى آدمين و الطريقة اللى دماغنا بيعالج بيها كل المواقف اللى بتحصلنا.