البنات وتربيتهم…يامخلف البنات وشايل الهم للممات
اتكلمنا عن تربية الاولاد ووعدنا هنتكلم ازاى نربى البنات
بس الاول لازم ناخد بالنا ونشيل من جوانا شوية المعتقدات البزرميط عن خلفت البنات …..تفتكروا فعلا هو هم للممات؟
ولما يبقى فى اى عداء مع ام اى بنت هووب…يطلع المثل الماثور اقلب القدره على فومها تطلع البنت لامها
من زمااان اووى من ايام الجاهلية واللى كان بيخلف بنت فى بعض القبائل كان بيقتلها ……دلوقتى تقدمنا وعرفنا من الاديان ان القتل حرااام.
بس تصدقوا لسه برضوا بنقتلهم بس بطريقه مختلفه …دايما بنديهم شعور انهم مالهمش اى قيمه الواد هو الاساس هو اللى بيشيل اسم ابوه ?
وغالبا الناس اللى بتقول كدا بتبقى فاهمه البنت بتشيل النيش ??
بس لو شوفت بوجهة نظر تانيه هنلاقى البنت بتشيل اسم ابوها وبتشيل ابوها نفسه ومامتها… وبتساعد اخواتها وتراعى اولادها …..وجوزها… وشغلها
البنت بنربيها دايما على ان كل حاجه عيب وغلط بس الولد متاح له كل حاجه…ودا غلط ؛-الغلط غلط- على الكل والصح صح للكل….المبادىء مابتتفصلش..
مش لازم البنت من اول ماتبدء تكبر شويه…تبقى مسؤله هى عن الخدمه فى البيت
الفرق اللى لازم نعامل بيه البنت عن الولد ان البنت ارق ومشاعر حساسه اكتر
طب نربى ازاااى البنات الخطوات ايه؟؟؟
١. اول ما ربنا يرزقنا ببنت نعرف انها هديه من ربنا مش هم للممات
٢.نعامل البنت من صغرها معامله جميلة تناسب انوثتها
٣.نخليها تشترك فى الرياضه الى بتحبها حتى لو هتلعب كره ? هى اللى تحدد عايزه ايه مانقولش دى للولاد وبس مادام حاجه ماتاذيش تكونها الانثوى
٤. لما نيجى نطلب منها تساعد فى امور البيت من ترتيب لاكل…. لرعايه اخواتها الاصغر ….يبقى الهدف نقول لها بكره هتبقى ام بعلمك تتعاملى بحنيه ازاى…مش بعلمك تنضفى ازاى..? هتفرق مع ان المهام واحده
٥.فى سن المراهقه قربى منها اكتر افهميها سيبيها تسألك فى كل حاجة..???..مش احسن ماتسال برا وماتعرفيش مين هيرد ?
٦. نديها ثقه فى نفسها ونسمع لرايها ونشوف فكرها رايح فين ونقومه من غير عنف تبع عاداتنا وتقاليدنا وديننا
تابعونى هنتكلم دايما عن اولادنا وبناتنا نربيهم ازاى
مع تمنياتى حياة اسرة سعيدة ❤
شيرين محمود زمرة
