5 حاجات تخليك تكسب ثقة الناس!
هنعرف سوا إزاي تخلي الناس تثق فيك، وإيه اللي يخليك تثق في الناس. فيه خمس حاجات تمكنك من كسب ثقة الناس، ولما تلاقيهم في حد، تشجعك إنك تثق فيه!
- الثقة شيء متبادل
طبعا كل واحد منا عايز الناس تثق فيه. طب سألت نفسك تعمل إيه؟ أول حاجة وبصراحة لازم تظهر للناس وانت بتتعامل معاهم إنك بتثق فيهم. ببساطة، إزاي عاوز الناس تثق فيك وانت لا تثق في أحد. ومن الآخر لازم تثق في الناس حتى لو جرحوك، الجروح بتعلمك وتزيدك خبرة، لكنها ليست النهاية.
- خلي عندك صبر ومرونة
كلنا بشر وبنغلط، وانت كمان وطبعا عاوز الناس تغفر لك أخطائك. فكر كتير في الظروف والتجارب السلبية اللي الناس مرت بيها زيك، وخللتهم على حذر وتتأخر ثقتهم بيك شوية. الثقة بتتبني مع مرور الوقت وبتيجي بالمعاملة والعشرة، وبخاصة مع الواحد اللي مر بظروف صعبة.
- خليك قد كلمتك
خد كلمتك بجد، والتزم بيها. كلمتك تعكس شخصيتك، وتقدر تبنيك وتدمرك، وانت اختار! خليك قد كلمتك، وفكر كويس واحسب ظروفك كويس قبل ما تتكلم. لا تختلق الأعذار، وتحمل مسؤولية أخطاءك. خليك شجاع ومتخفش من الاعتذار لو أخطأت.
- بلاش التقلب – خليك ثابت
وحد سلوكك وتصرفك، وخلي الناس تعرفك بيه. مثلا: التزم بمواعيدك واوصل في الوقت المحدد، ده هيزود ثقة الناس فيك ويخليها تعتمد عليك، ومصداقيتك هتزيد. كلما التزمت بوعودك، زاد حب الناس ليك، وكبرت ثقتهم فيك.
- متقفِّلش
خليك منفتح على الناس والدنيا، والتزم بالشفافية في التواصل مع غيرك. شارك أفكارك بكل احترام وحساسية وأمانة – خليك لماح حتى لو رأيك مختلف عن الشخص اللي بتكلمه. كل ده بيساعدك تكسب ثقة الناس، ومهما كان الشك اللي عندهم ناحيتك هياخد وقته ويزول.
طبعا بناء الثقة في الشغل مهم قوي لنجاحك، وده هو سر نجاح العلاقة الزوجية. لازم نتعلم إزاي نخلي الناس تثق فينا، ومعاها هنعرف إزاي نثق في الناس. ولازم تعرف إن الثقة فيها شيء من عدم التأكيد. ليه بقة؟ عشان يفضل عقل الإنسان شغال، ويكون زي ما قلنا لماح، والمهم إنه ميتصدمش، ويواصل حياته ويتعلم من خبراته. أيوة … أنا شفت ده قبل كده … ولا يلدغ المؤمن من جحر مرتين!
