أعراض الرهاب وأنواعه وعلاجه
أعراض الرهاب وأنواعه وعلاجه كلها حاجات لازم يعرفها المصابين بيه، علشان يعرفوا يتعاملوا معاه إزاي. الرهاب يعني خوف كبير من موقف أو حاجة مع أنها عادية ومتخوفش. بيدي إحساس دايمًا بالخطر وأن في حاجة مؤذية هتحصل. مثلًا، اللي عندهم رهاب الخلاء بيخافوا من أي مكان أو موقف مش قادرين يطلعوا منه.
زي طابور زحمة، أو مكان مقفول وغيرها من الأماكن والمواقف اللي ممكن تحسسهم بقلة الحيلة.
شاكك إن عندك اكتئاب؟ دوس هنا واعمل اختبار الاكتئاب أونلاين
المحتويــات
أي هي أعراض الرهاب؟
أعراض الرهاب بتحصل لما يتعرض الشخص لحاجة أو موقف بيخوفه، مش بس كدا دي كمان بتحصل بمجرد ما يفكر فيه. من الأعراض دي:
- ضيق في التنفس
- دوخة ورجفة وضربات قلب كتيرة
- خوف من الموت
- غثيان
- مشغول دايمًا بالحاجة اللي بتخوفك
- حاسس أن ملكش لازمة
نتيجة لأعراض دي ممكن ييجي لبعض الناس حالة اسمها “اضطراب القلق الاجتماعي (SAD)” أو “الرهاب الاجتماعي” فيبدأوا يعزلوا نفسهم عن الناس والحياة اليومية. ومع الوقت هيخسروا شغلهم أو دراستهم أو الناس اللي بيحبوهم.
أنواع الرهاب
رهاب الخلاء: بيخلي اللي عنده يخاف من أي مكان أو حاجة مش قادر يطلع منها. مثلًا ركوب المواصلات. كما ممكن يتطور جدًا لدرجة أن الشخص يخاف يطلع من بيته.
رهاب محدد: معناه الخوف من شيء بالتحديد. مثلًا كائن معين زي التعبان أو العنكبوت أو الصورصار أو الكلاب. الخوف مش من الحيوانات والحشرات بس. لأ ممكن من حاجات زي الإبر، والأماكن العالية، والطيارات، والكوارث الطبيعية يعني الزلازل وغيرها.
الرهاب الاجتماعي: يعني الخوف من التجمعات. ناس كتير بتخاف تطلع عالمسرح أو تتكلم قدام عدد كبير ودا نواع من الرهاب الاجتماعي.
مضاعفات الرهاب
الرهاب لو متعالجش هيأثر على الحياة جدًا. مثلًا اللي بيخاف من الطيران مش هيقدر يسافر لو عنده شغل أو عايز يتعالج أو غيرها من أسباب السفر. كمان اللي عندهم رهاب اجتماعي مبيقدروش ينجحوا في شغلهم وممكن يغيبوا كتير وبتفصلوا. والولاد ممكن ميروحوش المدرسة بسبب خوفهم من الكلام قدام زمايلهم والمدرسين.
كما في علاج بين الرهاب وإدمان الخمرة، الدراسات بتقول أن اللي عندهم رهاب معرضين أكتر للإدمان بأكتر من 10 مرات عن الناس العادية. كمان الناس المدمنة بالفعل بيكونوا أكتر عرضة لأن يجلهم رهاب. وزي ما قولنا أن الرهاب بيسبب أعراض زي ضيق النفس وضربات القلب السريعة. وعلشان كدا الرهاب بيهدد حياة ناس كتير وأنها تتصاب بأمراض في القلب.
أسباب الرهاب
مفيش سبب محدد للرهاب، لكن بيعتقدوا أنه بيحصل في عائلات معينة وبيتأثر بطريقتهم في الحياة يعني كأنه بيتورث، ودا علشان طريقة التفكير بتكون قريبة وكمان الظروف اللي حواليهم.
علاج الرهاب
علاج الرهاب ليه طرق كتيرة، والعلاج المناسب واقف على الشخص نفسه ونوع الرهاب اللي عنده. مثلًا” العلاج بالتعرض” دا معناه أن اللي عنده رهاب من حاجة بيفضل في مواجهه معاها لمدة كبيرة من غير أي فرصة لهروبه. علشان يتأكد أن اللي بيخاف منه مش هيأذيه. طريقة تانية للعلاج بتعلم الشخص إزاي يتعامل مع الحاجة اللي بيخاف منها، ويتعلم إزاي يهدا. وغالبًا الطريقة دي بيستخدمها الناس اللي مش قادرة تواجه مخاوفها مباشرة. وكمان بتنفع مع الأطفال والمراهقين.
كمان في أدوية بتعالج الرهاب الاجتماعي زي مضادات الاكتئاب (مثبطات امتصاص السيروتونين الانتقائية) والأفضل تتاخد مع العلاج السلوكي المعرفي علشان تجيب نتيجة أكبر. الأدوية دي بتحاول تحسن مستويات السيروتونين في الدماغ. ومن أمثلتها:
فلوكستين (بروزاك)، سيرترالين (زولوفت)، باروكستين (باكسيل)، فلوفوكسامين (لوفوكس)، سيتالوبرام (سيليكسا)، إسيتالوبرام (ليكسابرو)، فوروكسيتين (برينتيليكس)، وفيلازودون (فيبريد). الآثار الجانبية للأدوية دي بتختلف من شخص للتاني وهي؛ جفاف الفم، والضعف الجنسي، والغثيان، والدوخة، وصعوبة النوم، والإمساك أو الإسهال. وفي ناس بتتخن مع الوقت.
كمان الرهاب بيتعالج بأدوية اسمها حاصرات بيتا، ودي بتقلل الأعراض الجسدية اللي ليها علاقة بالخوف. ودا عن طريق منعها لتأثير الأدرينالين على الجسم. مثال على حاصرات بيتا هو البروبرانولول. كمان في حالات بتحتاج علاج بالبنزوديازيبينات أو المهدئات. لكن الخوف من أنها ممكن تسبب الإدمان وعلشان كدا مش بيستخدموها كتير. وهي زي ديازيبام (فاليوم) وألبرازولام (زاناكس) ولورازيبام (أتيفان) وكلونازيبام (كلونوبين). طبعًا مينفعش حد ياخد الأدوية دي إلا بوصف دكتور.
