حاجات لازم تعرفها عن رهاب العزلة
مصطلح اوتوفوبيا او رهاب العزلة هو مصطلح بيعبر عن القلق اللي بيحصل لشخص نتيجة أفكار معينة أو نتيجة خوف الشخص من انه ممكن يقضى يكون لوحدة وينعزل عن الناس، ورهاب العزلة مالوش تشخيص محدد في دليل الأطباء النفسيين، لكنهم بيعتبروة ضمن فئة الرهاب، اللى هي قلق وخوف من حاجة معينة او موقف معين، وطبعا أي نوع فوبيا مقلق جدا وليه تأثير سلبى على حياة الشخص لو مأخدش العلاج المظبوط، ورهاب العزلة زيه زي الأنواع التانية من اضطرابات القلق اللي بيكون ليها اعراض جسدية ونفسية، وخلينا عارفين ان فهم رهاب العزلة وطريقة علاجها هيخلينا نقدر نسيطر عليها، والمقالة دي هتعرفنا معلومات اكتر عن رهاب العزلة وأعراضه وطرق علاجه.
المحتويــات
إيه هو رهاب العزلة؟
رهاب العزلة هو خوف الشخص من انه يحس بالوحدة والانعزال عن الناس، على الرغم من ان الشخص اللي بيعانى من النوع ده من الفوبيا مش شرط انه يكون وحيد عشان يحس بأعراض النوع ده من الفوبيا، وفى أسماء تانية لرهاب العزلة زى اريموفوبياeremophopia او منوفوبيا monophopiaاو ايزولوفزبياisolophopia .
ورهاب العزلة هو نوع من أنواع الفوبيا اللي بتخلى الشخص المصاب بيها يعاني من خوف شديد مش منطقي من حاجات او مواقف معينة، ودة بيخلى الشخص يتجنب الحاجات والمواقف دي بس لو حصل واتعرض لحاجة من الحاجات اللي بتقلقة دي اعراض القلق بتزيد عند الشخص بشكل ملحوظ، وفى دراسات بتأكد ان 12.5% من البالغين في أمريكا بيعانوا من أنواع مختلفة من الفوبيا.
وبالنسبة لشخص اللي بيعانى من رهاب العزلة بتكون فكرة قضاء وقت لوحدة مرعبة، وعلى الرغم من كل ده منقدرش نقول ان في تعريف واضح لرهاب العزلة، لأنه نوع معقد جدا من الرهاب صعب تميزه عن اضطراب قلق الانفصال او الخوف من الهجر او اضطراب ما بعد الصدمة (PTSD).
الفرق بين رهاب العزلة والوحدة
رهاب العزلة مختلف جدا عن الشعور بالوحدة، لأن الوحدة هي مجرد مشاعر سلبية بيحس بيها الشخص نتيجة انه مش عارف يتفاعل اجتماعيا ولايعمل علاقات مع الناس، وممكن اشخاص تحس بالوحدة وهما في وسط ناس كتير دة شىء عادى وبيحصل، لكن الاصابة برهاب الوحدة بيخلى الشخص يحس بقلق شديد او رعب لو حس انه هيقضى وقت لوحدة.
أعراض رهاب الوحدة
أعراض رهاب العزلة تشبه جدا الاعراض اللي بتسببها الأنواع التانية من الرهاب وأهمها القلق الشديد، بس في اعراض مميزة لو حسيت بيها ممكن تكون مصاب برهاب العزلة زى:
- الشعور بالخوف والرعب لما تكون لوحدك او لمجرد التفكير إنك ممكن تكون لوحدك.
- تجنب المواقف اللي ممكن تخليك قاعد لوحدك.
- التعرض لنوبات هلع.
- إدراك ان الموقف اللي انت فيه مش متساهل القلق او الخوف ده خالص، وعلى الرغم من كدة بتكون خايف برضة.
- وجود قلق وضغط عصبي بشكل عام.
وعشان الطبيب النفسي يأكد تشخيص الحالة انها نوع من أنواع الفوبيا، لازم يكون الشخص بيعانى من الاعراض بشكل مستمر من 6 شهور على الأقل، وتكون الاعراض دي مأثرة على حياة الشخص بشكل كبير سواء حياته الاجتماعية او حياته الشخصية، وبالنسبة للأطفال ممكن تظهر عليهم اعراض تانية لو بيعانوا كانوا من النوع ده من الرهاب زي العياط او نوبات الغضب والتعلق الزيادة بالأم او بالشخص اللى بيرعى الطفل.
والشخص اللي بتعانى من رهاب العزلة بتظهر علية شوية سلوكيات زي:
- محاولة الهروب من البقاء وحيد بأي طريقة.
- بيحاول يلاقى ناس يقعد معاهم دايما.
- بيكون مش عاوز الناس تمشى وتسيبة عشان ميقعدش لوحدة.
- مش بيقدر يكون مستقل في أي علاقة.
وطبعا كل الاعراض دي بتخلى الشخص اللي عنده رهاب العزلة بيعانى من ضغط نفسي رهيب في اى علاقة شخصية، لأنه دايما خايف الناس تبعد عنه ويفضل وحيد، ودة أهم عرض من اعرض رهاب العزلة وممكن يتطور وللأسف في بعض الاحيان بيتطور ويتحول لاضطراب قلق الانفصال ودة أكيد أصعب.
أسباب رهاب العزلة
في أغلب أنواع الرهاب عادة بيكون سبب الإصابة مش واضح، ممكن احيانا السبب يتعلق بصدمة حصلت في الماضي او تجربة سلبية مر الشخص بيها، وبيتطور الرهاب غالبا في مرحلة الطفولة وبتفضل حالات كتيرة مش فاكرة اية هو السبب الأصلي اللي خلاهم يتصابوا بالرهاب، ممكن بسبب تجربة قاسية مر بيها الطفل زي الخوف من الهجر نتيجة طلاق الاب والام او وفاة حد منهم، وطبعا في ناس تانية بتكون اسبابها مختلفة.
أسباب تانية لرهاب العزلة
أحيانا رهاب العزلة بيتطور وبيحصل نتيجة اضطرابات القلق التانية، يعنى مثلا الشخص اللى بيحصلة نوبات هلع بيكون خايف جدا انه يكون لوحدة وتحصلة نوبة هلع وميلاقيش حد يساعدة، وأحيانا رهاب العزلة بيكون عرض لمرض تانى يعنى مثلا لو الشخص بيعانى من رهاب الخلاء ثقتة في نفسه على انجاز اى مهمة بتقل جدا ودة بيتطور الى انه بيكون قلقان من وجودة لوحدة، وساعات رهاب العزلة بيكون مرتبط باضطرابات القلق العامة او بأنواع من الفوبيا أو اضطرابات ما بعد الصدمة.
إزاي بيتم تشخيص رهاب الوحدة
لو الشخص حس انه بيعانى من رهاب العزلة ممكن يلجأ لطبيب نفسي او متخصص عشان يرشده ويساعده في العلاج، الطبيب هيسأل شوية أسئلة عن سلوك ومشاعر الشخص ودة هيخلية قادر اكتر على تقييم الحالة الصحة العقلية بشكل عام، وممكن الطبيب كمان يشخص الحالة بأنها نوع من أنواع الفوبيا في حالة استمرار القلق والمشاعر السلبية لفترة أكثر من 6 شهور، ومجرد ما يعرف الشخص سبب الاعراض اللي عنده هيقدر يتغلب عليها ويتعالج منها أسرع.
التعامل مع رهاب العزلة وعلاجه
رهاب العزلة مش بيختلف كتير في علاجه عن الأنواع التانية من الرهاب، والعلاج بيكون من خلال:
- العلاج السلوكي المعرفي: هو اكتر نوع منتشر من أنواع العلاجات المستخدمة لعلاج الرهاب، والنوع ده من العلاج بيوفر تقنيات عملية تساعد الشخص على التعامل مع القلق.
- علاج التعرض: وهو نوع تانى من أنواع العلاج السلوكي، ويتم فيه تعريض الشخص بالتدريج للمواقف اللي بيخاف او بيقلق منها بالتدريج تحت المراقبة وبطريقة آمنة، ودة بيقلل من إحساس القلق تدريجيا، وممكن كمان الطبيب يوصف بعض الادوية من حاصرات بيتا في بعض الأحيان وبتكون مهمتها تقليل تأثير الادرينالين في الجسم وهو الهرمون اللي بيفرزة الجسم في حالة الإحساس بالقلق.
- الأدوية: العلاج بالأدوية مع العلاج النفسي يقدر يخفف القلق بشكل كبير في أغلب الحالات.
