14 من أهم أعراض نوبات الهلع
أكتر حاجة بتميز نوبات الهلع هي مشاعر الرعب المفاجئة الى بتحصل للشخص بدون سابق انذار، ونوبات الهلع ممكن تحصل في أي وقت حتى خلال النوم، والناس اللى بيحصلهم نوبات الهلع بيكونوا حاسين انهم بيموتوا اوانهم هيتجننوا، كمان الخوف الشديد والهلع اللى الشخص بيمربية خلال نوبة الهلع مش شرط ابدا يكون متناسب أو مرتبط مع الموقف الحقيقى اللى بيحصل في الواقع.
وفى ناس بتعتقد انها بتمر بأزمة قلبية لتشابه الاعراض، ومع ذلك اغلب الناس اللى بيمروا بنوبات الهلع بيكونوا اتعرضوا ليها قبل كدة بسبب مواقف او احداث مشابهة، وعادة ألم الصدر اللى بيحصل وقت نوبة الهلع بيفضل في منطقة منتصف الصدر (لكن ألم الأزمة القلبية بيتحرك في اتجاة الذراع الشمال أكتر) ، ممكن كمان يحصل في نفس الوقت سرعة في التنفس وزيادة في ضربات القلب وخوف، والنوبات دى بتيجى فجأة وتختفى فجأة، بس الشخص بعدها بيكون تعبان ومرهق جدا.
خليك عارف ان لو ظهرت عندك أربعة من الاعراض دي انت ممكن تكون عندك نوبة هلع:
- قلق شديد مفاجئ ملوش سبب واضح.
- ضربات قلب متسارعة.
- إحساس بالضعف والاغماء والدوخة.
- رعشة.
- وخزات وتنميل في الأصابع واليدين.
- إحساس بالرعب وقرب الموت.
- إحساس بالتعرق الشديد.
- غثيان.
- ألم ووجع في الصدر.
- صعوبة في التنفس، وكأن نفسك قصير جدا ومخنوق.
- فقدان السيطرة تماما على نفسك.
- إحساس بفقدان العالم الواقعي والتوهان.
- الخوف من الإصابة بالجنون.
- الخوف من الموت.
ممكن نوبة الهلع تستمر وقت قد اية؟
غالبا نوبات الهلع بتستمر لفترات قصيرة أقل من 10 دقايق، بس ممكن بعض الاعراض ممكن تستمر لفترة أطول، على الرغم من ان النوبات دى متعبة ومزعجة جدا ألا انها مش منتشرة اوى ولا خطر على الحياة، نقدر نعتبر نوبات الهلع عرض من اعراض اضطرابات الهلع ، والناس اللى جالها قبل كدة نوبة هلع مش دايما بيكونوا هما الأكثر عرضة للإصابة بنوبات الهلع، وخلى بالك ان فرق بين نوبات الهلع واضطرابات الهلع، يعنى لو النوبات بتحصل بشكل متكرر وبتخليك خايف من تكرارها فأنت ممكن تكون مصاب باضطراب الهلع.
إيه اللى لازم اعرفه كمان عن اضطراب الهلع؟
دايما الأشخاص اللى عندهم اضطراب الهلع بيكونوا قلقانين او خايفين جدا لأنهم مش قادرين يعرفوا امتى هيتعرضوا لنوبة هلع جديدة، كمان لازم تعرف ان اضطراب الهلع منتشر جدا وفى اكتر من 6 مليون شخص مصابين فيه في الولايات المتحدة الأمريكية، والستات اكتر عرضة للإصابة بنوبات الهلع من الرجالة بمقدار الضعف، وعادة الاعراض بتبدى تظهر من مرحلة البلوغ.
احنا لحد دلوقتى مش عارفين بالظبط اية هي الاعراض اللى بتسبب اضطراب الهلع، في ناس كتير عندهم استعداد بيولوجي للتعرض لنوبات الهلع، وممكن الموضوع ده يتطور ويزيد لو حصلت تطورات كبيرة في الحياة (زي الجواز مثلا او إنجاب طفل، او بدء وظيفة جديدة، حاجات زي كدة) وكمان مع ضغوط نمط الحياة الطبيعية، وفى أدلة بتقول ان الميل للإصابة باضطراب الهلع ممكن يكون شيء وراثي في بعض العائلات، ودايما بيكون الناس اللى بيعانوا من اضطرابات الهلع هما الأكثر عرضة من غيرهم للاكتئاب ومحاولات الانتحار وادمان الكحول والمخدرات.
ولحسن الحظ اضطرابات الهلع ليها علاج باستخدام العلاج النفسي والأدوية وممكن الاثنين مع بعض، وأحيانا الطبيب ممكن يوصف أدوية مضادة للقلق او بعض مضادات الاكتئاب او أحيانا ادوية مضادة للاختلاج وبيكون فيها برضة خصائص مضادة للقلق، وساعات بيوصفوا فئة من أدوية القلب اللى اسمها حاصرات بيتا ودي بتساعد على منع نوبات الهلع والسيطرة عليها في حالة حدوثها.
