العلاقات

8 حاجات لو موجود حاجة منهم في شريك حياتك، سيبه دلوقتي

كتبها سها مطر

الأذى مش شرط أنه يكون جسدى لكن ممكن ياخد أشكال مختلفة، والإساءة بشكل عام بتكون واضحة، بس أوقات كتير بيكون في إساءة صعب أننا نشوفها وهى الإساءة العاطفية أو النفسية الى مش بنعتبرها نوع من الأذى أو العنف مع إن ممكن تكون أخطر من الأذى الجسدى .

الهدف من الموضوع ده هو أنك تعرفى علامات السلوك المؤذى معنويا  في شريك حياتك الى ممكن متكونيش واخدة بالك منها ، ودى أمثلة عليها :

  • بيحاول دايما يسيطر عليكى : وده بيبقى ليه كذا شكل زى المكالمات الكتيرة ، عايز يعرف دايما بتعملى ايه وبتروحى فين وكمان مين أصحابك وبتصرفى فلوسك في ايه ، ودايما عايز يسيطر عليكى كلها علامات مفروض تاخدى بالك منها لأنه بيكون عايز يمحى شخصيتك .
  • بيقلل منك : دايما بيحاول يحبطك ويقلل منك قدام الناس أو يبرز عيوبك سواء في مظهرك أو شخصيتك وده بيوضحها أكتر للناس حتى لو مش واخدين بالهم منها.
  • بيوجهلك اتهامات طول الوقت : دايما بيفكر أنك غلطانة ، أو بيشك فيكى وفى علاقاتك مع الجنس الآخر وطريقة تعاملك معاهم .
  • مفيش تواصل بينكم : غالبا لو في مشكلة بينكم أو حتى لو مفيش ،  بيكون متعصب من كلامك ومش عايز يسمعك .
  • بيهددك : لو بيهددك دايما أنه هيسيبك فده نوع تانى من سوء المعاملة .
  • بيتريق عليكى : دايما عنده لهجة سخرية في كلامه معاكى وبيقلل من أي نجاح ليكى .
  • مزاجه متقلب : عواطفه دايما مش مستقرة ، وبيكون نوع من التطرف لأنه بيتحول ” 180 درجة ” من غير سبب واضح . وغالبا بيوجهلك اللوم أن أنتى السبب حتى لو مكنتيش غلطانة .
  • بيحبك لو … : بمعنى أن حبه ليكى مرتبط بشروط معينة ، بيستخدم الجمل دى على طول ”  بحبك بس … ” ، ” بحبك لو …” . ده آخر نوع من الإساءة الغير معلنة لأن الحب الحقيقى بيكون مش مشروط .

عن الكاتب

سها مطر