ابنك متعب فى الأكل أعمليله كيك بالكوسه

عندك إيس كريم بالكوسة ؟ نكته بيخة جدا بيقولها أطفال كتير فى سن الرخامة بتاع المدارس بس مش كلها غلط .

الام بتعانى عشان تأكل اولادها الأكل الصحى المفيد … و تبعدهم عن Junk food . اللى كله ألوان صناعية و سكر كتير قوى .

الرخامة ان الأولاد دايما بيبعدوا عن أكل الفاكهة و الخضار خاصة  لو بيعانوا من اى نوع من Disorders حتى ولو بسيط و يحتاجوا الى أنواع أكل معينة و بتكون الحكاية صعبة عليكي جدا .

و يا حرام بقى لو عندك طفل ملمس مع التوحد أو  فرط الحركة دول أولادهم متعبين جدا فى الأكل و بيحصروا أنفسهم فى أصناف قليلة قوى .. كتير منهم حواس التذوق عندهم مبتقبلش أكل الفواكة و الخضروات المختلفة… و ده عصب عليهم لأن المخ بيبعت رسالة رفض إلى اللسان بخصوص النوع ده من الأكل عشان كده لازم تعملى بهلوان فى محاولة لتحصيل الفائدة الطفل .

” اللى ابنك مش هيعرفه …. لن يضره “

و هنا ممكن تعملى الحاجات اللى هو بيحبها و جواها تحطى الفائدة الى محتاجة ولا من شاف ولا من درى و الحكاية مش صعبة ،بسيطة و كمان متجربة .

” وصفة الكيك بالكوسة …. مش بهزر على فكرة ” 😈

هقولك على وصفة الكيك بالكوسة .. ايوة ده بجد على فكرة بالكوسة اللى مبتعرفيش تخلية يكملها .. لو أبنك بيحب الكيك أضمنلك انه هيطلبها منك كمان و كمان .

المقادير الكيك
3 بيضات متوسط
3/4 كوب زيت
2 كوب دقيق
1.5 كوب سكر
1 معلقة كبيرة باكنج بودر
1 معلقة صغيرة فانيليا
3 كوسات متوسطين و مبشورين ( و ممكن تستبدليها بالجزر أو خليط من الأتنين مع بعض )

مقادير صوص الشيكولاتة
1/2 كوب سكر
1/2 كوب كاكاو خام
1/4 كوب لبن
50g زبدة

طريقة عمل الوصفة
تضيفى الزيت و السكر على بعض و تضربيهم فى الخلاط و بعدين البيض و الفانيليا و تضربى… و بعدين نضيف الكوسة المبشورة و تضربيهم كلهم و هنا هتختفى بالكوسة فى الخلاط و مش هتحسى بيها و له حتى فى الطعم .
ننخل الدقيق و الباكنج بودر فى طبقا غويط و نصب عليها الخليط السابق … فى صينيه مدهونه زبدة و متبطنه بالدقيق صبى الخليط و دخليه الفرن متوسط لمدة 40 دقيقة .

اما الصوص حطى مقديره على بعض فى طاسة على نار هادية ولما تغلى تبقى جهزت .

من الأخر عامليها معاملة الكيك العادى لو عاوزها بصوص براحتك …من غير برده براحتك بس المهم انك وصلتى الفائدة لأبنك و ممكن تحلوها كلكوا عادى ذى أى كيك .
كمان ممكن تستبلدى بالكوسة بالجزر أو التفاح بس لو هتعمليها بالتفاح كفاية تفاحة ونص لان السوائل فيه اكتر جربيها و أبقى ادعيلى .

وبعد لما تقدميها لعائلتك متقوليش أنها بالكوسة وصدقيني محدش هيتوقع أبدا أنها بالخضروات 😀
جربيها و أبعتيلى رأيك و رأى ولادك فيها هستناكى ?