روحك في مناخيرك؟ – طيب إوعـى تعطس
أحيانا تسمع حد يوصفك: هو انت روحك في مناخيرك؟ … هو انت ابن سبعة؟ انت محمر لي عينيك ليه؟
عمرك سألت نفسك هما بيقولو كده ليه؟ هو انت سريع الغضب وانت مش عارف؟ … أو مش عايز تعرف؟
لو مش عارف، احنا هنشوف سوا إزاي أعرف إني روحي في مناخيري … لو حد حكها هتولع على طول.
المشكلة بقه انت عارف وبتطنش … أو الموضوع عاجبك وبقه إدمان … أو أقلمت نفسك على كده … دي تبقه مشكلة كبيرة لكن ليها حل … وهو إنك لازم تشوف حد يساعدك … وإلا فيه يوم هتصحى من النوم هتلاقي نفسك لوحدك … والدنيا فاضية حواليك.
إزاي أعرف طيب؟
عمرك في يوم روحت تزور واحد صاحبك وتوهت … دخلت سكة غلط بالعربية … وفضلت تسوق ومفيش فايدة؟
كان قاعد جنبك واحد لكاك … كل شوية لأ مش من هنا … ياعم احنا ماشيين هنا قبل كده؟
عملت إيه؟
- بدأت تسب وتشتم وتتنابذ بالألقاب؟
- اتصلت على صاحبك ووتصرخ في وشه ليه سكن في حتة مقطوعة زي دي؟
- ادايقت، لكن سيطرت على نفسك وفضلت تدور بالراحة لغاية موصلت؟
فيه 10 أعراض تقولك إنك ابن سبعة … وسريع الغضب … وروحك في مناخيرك
- السب والشتم والتنابذ بالألقاب
- التجريح والتقليل من الشخص اللي قدامك
- التسرع وعدم الصبر
- الطيش والانفعال – هوجان يعني
- تعليق أخطائك على شماعة الآخرين
- لما تغضب تعزل نفسك وتنزوي
- أسرتك بتخاف منك وتبعد عنك
- الناس بتحاسب قوي لما تقرب منك
- انت إنسان متقلب – مزاجي
لو بتحس بحاجة من دي، اعرف إنك سريع الغضب ولازم تدور على حد يساعدك تسيطر على غضبك وتملك زمام نفسك.
مقال جميل، تسلم إيدك!