اضطراب القلق العام: حل مشكلة الـOver thinkingلا أحد يتحملك حتى نفسك

التفكير التفكير، طول الوقت حاسس بـ ” اضطراب القلق العام “مخك شغال 48 ساعة مفيش فاصل ابداً، وأنت عندك حبيبتك إلي كل شوية تسألك أسئلة وجودية وتزعل منك على أسباب عادية بسبب أفكارها الغريبة عنك، التفكير الزيادة واضطراب القلق العام الـ Over thinking من أكثر الحاجات إلي بتستهلكك نفسياً وعصبياً، وبتبوظ علاقتنا، ولأنه مش بأيدك ونفسك تفهم ليه بيحصلك كدا فالمقال دا ليك

أيه هو اضطراب القلق العام ،الـ Over thinking في العلاقات

الشخص إلي بيفكر في أي حاجة وكل حاجة، بتبقى أنت قاعد جمبه بتفكر في ولا حاجة وبتتفرج على المسرحية وهو قاعد بيفكر في هو أنت ساكت ليه هو ممكن تكون زعلان منه طيب أنا عملت أيه يمكن على موقف أول أمبارح لما أتصلت ومردتش، هو بطل يعملي لايك ليه بقى يتخفى مني، طيب مهو بيعمل للبنات الثانية، يبقى بيخوني! هو متصلش ليه زعلان طيب أتصل أنا طيب ما أنا لو أتصلت يمكن مشغول وهبقى كدا بزن عليه وحمل، بس لو متصلتش ممكن يفهم أني بطنشه

أحنا ليه بـ Over thinking حتى لو بنحب وواثقين؟

1-اضطراب عام: القلق والخوف الغير مبرر، زي أنك تكون لسه مرتبط وخايف لما تخلف يحصل حاجة لعيالك، أو مراتك تسيب البيت، فتفضل تفكر وتتخيل وتزعل على كل دا وهو لسه محصلش ممكن تقرأ المقال دا اضطراب القلق العام: بكرة النكد بكرة

2- الصدمات : حادثة، تجربة فاشلة، تراكمات مشاكل، ناس كنت بتحبها وطلعوا بلاستيك، خصوصاً لو أديت كل ثقتك لحد بتحبه وخان الثقة وبعدها سامحته هتفضل تفكر في كل تصرف بيعمله وتربطه بالي قبله وأنه ممكن يرجع يخونك تاني عادي

3- التربية: الأم إلي كل شوية بتزعق وبتحاسبك على أقل حاجة حتى لو قفلت الباب بصوت عالي، تفضل تتخانق عليه، والأب إلي بيحاسبك على النفس، هيخليك بعد كدا تفكر في كل حاجة بتعملها بدل المرة ألف مهما كانت حاجة متستاهلش التفكير

4- الحالة النفسية : حالتك النفسية في وقت ما أول ما بتبدأ تتدهور وتتعب، بتبدأ تجيب ليك كل حاجة القديم والجديد، وتقولك يلا ننكد على بعض ونفتكر ونشغل مخنا ونتعب نفسنا، وكمان الاكتئاب سبب كبير في أضطراب القلق العام

5- نمط الشخصية : هتلاقي التفكير الزيادة عند الستات أكثر من الرجالة، لأنهم بطبعهم بيقدروا يفكروا في أكثر من حاجة في نفس الوقت البيت والشغل والعيال، وكمان فترة المراهقة وتأثيرها لو كان سلبي هيخليك شخص قلوق بطبعك

أنت عارف شريك حياتك  الـ Over thinking بيحس بـ اضطراب القلق العام  أزاي؟

1- القلق العام : على طول قلقان مش مرتاح من أي حاجة ولا من تفكيره

2- التفكير الزيادة: ممكن يوقف حياته العملية وكل مشروعاته بتبدأ تبوظ

3- حاسس أنه حمل تقيل : كثر تفكير في أي حاجة وفيك، هيخليه كل شوية يزن عليك بكلام عادي زي هو أنت لسه بتحبني؟ هو أنا مش مضايقك؟ هو أنت متصلتش ليه؟ أنتي مبقتش تعملي لايكات ليه! ولأنك ملكش ذنب في أنه بيفكر كتير هتكون أجابتك عاديه جداً، فهو هيترجمها أنك زهقت لأنه حمل تقيل، هو أصلا حمل تقيل على نفسه

4- الاكتئاب : بيدخل في حالات حزن شديدة ممكن تكمل معاه أيام، وبيفضل ينعزل عن الكل عشان ميحسش أنه تقيل عليهم، وينسحب من الحياة الاجتماعية ويقعد يفكر لوحده

5- التغيرات المزاجية : عادي جداً يقولك خارج تتصل بيه بعدها بساعة تلاقيه مش خارج، هو قعد يفكر لو هيخرج معاك ممكن يحصل مشكلة زي ما عملك مشكلة قبل كدا، طيب ما كدا هيضايقك وأنت جاي تنبسط، وهو هيضايق لا خلاص خليه في البيت أحسن، مليش مزاج أخرج خلاص

أعمل أيه شريك حياتي هيضيع مني بسبب مشكلة تشتت الطاقة الفكرية؟

1- الصراحة : الصدق أحسن الحلول، أبعت لشريك حياتك وقوله أنا بفكر كتير الموضوع مش بأيدي، بحبك لكن مش بأيدي أوقف أفكاري بحاول، ممكن أفشل لكني بحاول، بس عايزك جمبي، متفكرش أن تفكيري في أي تصرف شك فيك، دا تفكير مجرد تفكير

2- أكتب وفكر نفسك : أكيد مريت بتجارب كتير وسيناريوهات عملتها من القلق وطلعت مش موجودة، كل ما تقلق أكتب أقرب موقف قلقت وفكرت فيه كتير وطلع الموضوع عادي، أكتب لما قعدت تتصل كتير ومردش أفتكرته زعلان منك وطلع موبايله صامت عادي مفهاش حاجة

3- أهتم بصحتك : رياضتك، يوغا عشان النفس والهدوء وموسيقى هاديه، وأكل صحي ملحه قليل عشان الضغط، مشروبات دافية، البابونج عشان الأعصاب، والشكولاته عشان القلق يروح

4-أشغل وقتك: الوقت الفاضي عندك جريمة في حق نفسك، أملى أي دقيقة فاضية أعمل فيها اي حاجة ولو هتحفظ كلمة، تمارس هواية، تتطمن على صحابك، تقعد تتكلم مع أهلك، المهم متسبش وقت فاضي

5- تنام: تنام مش تقعد على السرير تفكر، هتقعد تفكر يبقى قوم أقرأ أو اعمل أي حاجة السرير عملوه عشان ننام مش نقعد ونفكر ونعيط ماشي؟

أنا بحب شخص جنني بسبب الـOver thinking أعمل أيه؟

1- أمشي : تقدر تسيبه بكل سهولة وتبدأ حياتك مع شخص تاني، قوله مش هقدر أكمل، والموضوع دا هيريحه من أنه يفضل يفكر أنت عايزة ولالا، وأمشي ..

2- المفتاح : لو بتحبه بجد دور على مفتاحه وكلمة السر بتاعتة عايز أحس بالأمان، الشخص القلوق المفكر بزيادة مش عايز أي حاجة منك غير الأمان، كل اسئلته البسيطة وزعله الصغير بيبقى عشان فاقد الأمان، أديله الأمان، لو قالك أنت متصلتش ليه قوله كنت في إجتماع بس أنت وحشتني جداً، أهتم معاه بتفاصيله الصغيرة إلي بتريحه، أعمله لايكات وكومنتات، أيوة هيفرق معاه أنك معترف بيه ومتفاعل معاه قصاد الناس، قوله كلام كويس عن نفسه ولو كلمه بسيطة كل يوم، أبعد عن أي نقد سلبي عشان هو مش ناقص هو بيفكر فيه وبينكد على نفسه لوحده، أديله الأمان وأطلب منه لما يقلق يحكيلك وتطمنه هتلاقيه مع الوقت تفكيره الزيادة أبتدي يقل

شارك معانا برأيك وتجربتك؟