الانطوائي في الشغل : ليه تختار الشخصيات الانطوائية للمراكز الإدارية
الشخص الانطوائي معانا في الشغل، مبنعرفش نتعامل معاه وأوقات بنفهمه أنه بيفكر في خطط يوقع شغلنا بيها، رغم أنه مبيفكرش في كل دا هو كل الموضوع أنه شخص منطوي مش بيحب يتكلم كتير، ولأن معظمنا بيميل للشخصيات الاجتماعية، فبنفضل فاكرين أن الشخصيات المنطوية مينفعش تبقى في منصب كبير، مع أنهم أكثر الناس المناسبين للمناصب الكبيرة ومن أمثلتهم دوغ كونانت المدير التنفيذي لشركة “حساء كامبل” ورئيس شركة “نابيسكو للأغذية” والرئيس الحالي لمعهد كيلوغ للقيادة التنفيذية وإلي أعترف وقال أنه منطوي وشغل المنصب الكبير دا بشغله وأجتهاده فالموضوع بسيط
كمدير ليه تختار الشخص الانطوائي للمراكز المهمة :
1- يعمل في صمت :
- مبيحبش يتكلم كتير، بالتالي بينتج كتير، بيشتغل بكل طاقتة العقلية والجسدية، لدرجة التوحد مع الشغل
2- مش هيعترض كتير :
- هتقوله مشكلة في شغله مش هيعترض عليك ويقولك أنت غلط، هيروح يصلح المشكلة في صمت
3- بيحل المشاكل :
- أي مشكلة في الشغل تقدر تأخد رأيه، أكثر واحد هادي ومش بينفعل وهيقدر يشوف الموضوع بطريقة محايدة ويديك الرأي والحل المناسب
4- مش بتاع مشاكل :
- كلامه قليل، مبيحبش التجمعات، مبيحبش يقول أسرار شغله، أنت متخيل يعني أمين وصادق وكمان مش هيركز مع مين قال عليه أيه، ومين خد شغله، شخص في حاله جداً وأقل شخص الناس بتعمل معاه مشكلة في الشغل لأنهم أصلاً ميعرفوش هو بيشتغل أيه!
الشخص الانطوائي يقدر يبقى قائد وفي مركز أداري كبير كمان بسبب:
1- التفكير :
- معروفين بأنهم بيحبوا الوحدة والعزلة وبيستخدموها في التفكير العميق، ودا هيفيد جداً في عالم المال والأعمال إلي محتاجة قرارات مصيرية
2- الأعتراف :
- قول للناس أنا شخص منطوي مش بحب أتكلم كتير دا أنا ودا طبعي، عشان يتقبلوا سكوتك وميبرروش سكوتك أنك بتجهز ليهم نصيبه في الشغل أو هتطردهم
3- أبتكار وسائل مساعده :
- معظم المبتكرين لوسائل تواصل جديدة زي مارك، شخصيات منطوية، عمل السوشيال ميديا عشان يسهل توصيل أفكاره، بالبريد والشات من غير ما يتكلم كتير، وبكده سهل على نفسه شغله، وعشان كدا عادي جداً تكون مدير منطوي وتبعت الشغل أو خطط العمل في البريد من غير ما تجتمع بالناس وتتابع من بعيد
4- وقت عرض الأجتماعات :
- عادي جداً حتى الأشخاص الاجتماعين عندهم الخوف من التحدث أمام الجمهور، هو خوف طبيعي عندنا كلنا، عشان كدا أتدرب قبلها كتير وأعرف كلامك ونسقه وأفهمه، وخد وسائل مساعدة بدل ما تتكلم كتير زي الفيديو وشرائح عرض، أقرا دا كمان 7 حاجات سريعة جداً تظهرك واثق من نفسك
5- المناسبات :
- المناسبات الاجتماعية في الشغل من خطوبة حد معاك، أو سبوع أو فرح، هما عارفين أنك منطوي، فتخيل مدى فرحتهم لو شافوك في المناسبة دي حتى لو قاعد ساكت، روح وأبتسم للناس، ورد على الكلام إلي بيتوجهه ليك، ومتنساش تروح متأخر شوية، يكون المكان أتزحم ومحدش هيركز معاك ويكلمك كتير، أو تروح قبلها تبارك للشخص وتمشي، المهم تحاول تزود المناسبات
